2025 جىلدىڭ 21-23 ناۋرىز ارالىعىندا الماتى قالاسىندا ناۋرىز مەرەكەسىنە وراي ەرەكشە «ءتاتتى كادە-سىي سىيلىققا» اكسياسى ۇيىمداستىرىلادى، دەپ حابارلايدى aqshamnews.kz
بۇل شارا الماتى قالاسىنىڭ تۋريزم باسقارماسىنىڭ، الماتى حالىقارالىق اۋەجايىنىڭ، الماتى شەكارالىق باقىلاۋ قىزمەتى مەن «جەتىسۋ» كەدەن بەكەتىنىڭ بىرلەسكەن باستاماسىمەن جۇزەگە اسىرىلۋدا.
اكسيانىڭ نەگىزگى ماقساتى — قالاعا كەلگەن شەتەلدىك تۋريستەرگە مەرەكەلىك كوڭىل-كۇي سىيلاۋ جانە قازاق حالقىنىڭ قوناقجايلىعىن كورسەتۋ. وسى شارا اياسىندا الماتىعا كەلگەن شامامەن 10 مىڭعا جۋىق شەتەلدىك جولاۋشىعا سىي-قۇرمەت كورسەتىلەدى.
اكسيا بارىسىندا ءاربىر تۋريست، الماتىعا كەلىپ قونعاننان كەيىن، حالىقارالىق جولاۋشىلار تەرمينالىنداعى پاسپورتتىق باقىلاۋ مەن كەدەندىك تەكسەرۋ ايماقتارىندا ۇلتتىق ويۋ-ورنەكتەرمەن بەزەندىرىلگەن جانە كوكتەمنىڭ سيمۆولدارىمەن ناقىشتالعان ءتاتتى كادە-سىي — ۇلتتىق تاتتىلەرىن الادى. بۇل ءىس-شارا قازاقستاننىڭ باي مادەني مۇراسىن تانىستىرۋعا جانە الماتىعا كەلگەن قوناقتاردا وسى قالا تۋرالى جىلى ءارى جاعىمدى ەستەلىكتەر قالدىرۋعا باعىتتالعان.
اۋەجايدا سونداي-اق ارنايى فوتوزونا ۇيىمداستىرىلىپ، ۇلتتىق ناقىشتاعى باننەرلەرمەن بەزەندىرىلدى.
جولاۋشىلارعا قازاقتىڭ ءداستۇرلى كيىمدەرىنە (شاپان) كيىنىپ، ەستەلىك سۋرەتكە ءتۇسۋ مۇمكىندىگى بەرىلەدى. اركىم ۇلتتىق كيىمدە ءوزىن قازاق حالقىنىڭ قوناقجايلىق ءداستۇرىنىڭ ءبىر بولشەگى رەتىندە سەزىنىپ، ۇمىتىلماس ەستەلىكتەرمەن قالاعا قوشەمەت بىلدىرەدى.
الماتى — شەتەلدىك تۋريستەر ءۇشىن قازاقستاننىڭ ەڭ تانىمال قالالارىنىڭ ءبىرى. قالا ەلدىڭ حالىقارالىق تۋريزم اعىنىنىڭ 52،3%-ىن قابىلداي وتىرىپ، ءوز تاريحى، مادەنيەتى مەن تابيعاتىمەن الەمنىڭ تۇكپىر-تۇكپىرىنەن كەلگەن ساياحاتشىلار ءۇشىن تارتىمدى ورتالىق بولىپ قالا بەرەدى.