WhatsApp قولدانۋشىلارعا ارنالعان قاۋىپسىزدىك پەن پايدالانۋدى جەڭىلدەتۋگە باعىتتالعان بىرنەشە جاڭا مۇمكىندىكتى ىسكە قوستى.
ەندى WhatsApp-تا ەكراندى ءوز كونتاكتىلەرىڭىزدە جوق اداممەن بولىسۋگە تىرىسقاندا، باعدارلاما ارنايى ەسكەرتۋ شىعارادى. قولدانۋشى وسى تەرەزە ارقىلى ارەكەتتى بىردەن توقتاتا الادى، - دەپ حابارلايدى Aqshamnews.kz.
بۇل جاڭالىق تەلەفوندى «رەتتەپ بەرەمىز» دەگەن جەلەۋمەن بوتەن ادامداردىڭ ەكرانداعى جەكە اقپاراتقا، بانك قىزمەتتەرىنە نەمەسە قۇپيا دەرەكتەرگە قول جەتكىزۋىنە جول بەرمەۋ ءۇشىن ەنگىزىلگەن.
Android جۇيەسىنە ارنالعان WhatsApp-تىڭ جاڭا بەتا-نۇسقاسىندا (2.25.34.5) جادتى تازالاۋدىڭ كەڭەيتىلگەن قۇرالدارى پايدا بولدى. ەندى پايدالانۋشىلار: بارلىق حات-حاباردى تولىق وشىرۋگە، تەك مەديافايلداردى تازالاۋعا جانە جەكە فايل تۇرلەرىن عانا (فوتو، ۆيدەو، قۇجات، اۋديو، ستيكەر) جويۋعا مۇمكىندىك الادى.
ءوشىرۋ الدىندا راستاۋ تەرەزەسى پايدا بولىپ، جۇلدىزشامەن بەلگىلەنگەن ماڭىزدى حابارلامالاردى ساقتاپ قالۋ مۇمكىندىگى بەرىلەدى. بۇل قاجەت اقپاراتتى كەزدەيسوق جويىپ الماۋعا كومەكتەسەدى. كومپانيانىڭ ايتۋىنشا، جاڭارتىلعان تەتىك چاتتاردى رەتتەۋدى بۇرىنعىدان دا قاراپايىم ەتەدى. قازىرگى كەزدە فۋنكسيا شەكتەۋلى تۇردە عانا قولجەتىمدى، ال جاقىن كۇندەرى Android قولدانۋشىلارىنىڭ كوپشىلىگىنە تاراتىلادى.
ال، 2.25.34.6 نۇسقاسىنداعى بەتا-تەستىلەۋ بارىسىندا Shake-to-Report دەپ اتالاتىن جاڭا مۇمكىندىك تە سىناقتان وتۋدە. تەلەفوندى جەڭىل شايقاۋ ارقىلى قولدانۋشى بىردەن اقاۋ تۋرالى حابارلاۋ بولىمىنە كىرە الادى.
شايقاۋ ارەكەتى جاسالعاننان كەيىن قولدانبا، بۇل قادامدى راستاۋدى سۇرايدى. سونداي-اق، اۆتوماتتى تۇردە سكرينشوت دايىندايدى جانە قۇپيا اقپارات بار ايماقتاردا سكرينشوت الىنبايدى.
فۋنكسيا قاجەت بولماسا، باپتاۋلاردان وشىرۋگە بولادى. ازىرلەۋشىلەر بۇل جاڭالىق قوسىمشاداعى ماسەلەلەردى جەدەل انىقتاۋعا جانە سەرۆيستىڭ تۇراقتىلىعىن ارتتىرۋعا كومەكتەسەتىنىن ايتادى.