الماتىلىق مايرا الدامجاروۆا كوسمەتولوگيالىق ەم-شارادان كەيىن بەت تەرىسى ءبورتىپ، دەنساۋلىعى ناشارلاپ كەتكەنىن ايتادى.
ءقازىر ول بۇركەنىپ جۇرۋگە ءماجبۇر. ايتۋىنشا، قۇقىق قورعاۋ ورگاندارى ازىرگە ەشقانداي شارا قولدانباي وتىر. ارنامىزعا سوڭعى كۇندەرى پلاستيكالىق حيرۋرگيا، دەرماتوكوسمەتولوگيا ماماندارىنا زارداپ شەككەن بىرنەشە قىز-كەلىنشەك حابارلاستى، دەپ حابارلايدى Almaty-akshamy.kz Qazaqstan.tv سايتىنا سىلتەمە جاساپ.
مايرا ءوزىن مۇنداي جاعدايعا جەتكىزگەن كوسمەتولوگتى الەۋمەتتىك جەلى ارقىلى تاپقان. بەتىن ارلەتپەك بولىپ، ونىڭ كومەگىنە جۇگىنگەن. پروسەدۋرالارىن قابىلداعان سوڭ بەتى ءبورتىپ كەتىپتى.
«مەن حابارلاسقان كەزدە كىشكەنە ۋاقىتتان كەيىن كەتەدى دەدى. ولاي بولمادى. قاڭتار ايىنىڭ 4-5-نە قاراي بەتىم قىزارىپ، ىسىك پايدا بولا باستادى. كوسمەتولوگ پرەپاراتتىڭ قولدانۋ مەرزىمى ءوتىپ كەتكەن شىعار، ءبىر جىلدان بەرى سالىپ ءجۇرمىن، ەشكىممەن مۇنداي بولماعان دەدى»، - دەيدى قالا تۇرعىنى مايرا الدامجاروۆا.
مايرانىڭ ايتۋىنشا، كوسمەتولوگ ونىڭ بەتىنە «گيالۋرون» دەپ اتالاتىن پرەپارات ەككەن. كوسمەتولوگتى ىزدەپ، كلينيكاسىنا باردىق. ءبىراق، جۇمىس ورنىندا بولماي شاقتى.
شاراسىز كۇيدە قالعان مايرا قاڭتار ايىندا بوستاندىق اۋدانىنا قاراستى پب-عا ارىز جازىپ، مەديسينالىق ساراپتامادان دا وتكەن. الايدا ءبىر اپتادا دايىن بولۋى ءتيىس قورىتىندى قاعاز ءالى قولىنا تيمەپتى. ال پوليسياداعىلاردىڭ ءۋاجى مىناداي:
«بوستاندىق پب مالىمەتىنشە، ازاماتشا مايرا الدامجاراوۆانىڭ سوت-مەديسينالىق ساراپتاماسى تاعايىندالىپ، ونىڭ ناتيجەسى دايىن بولدى. سوتتىڭ قورىتىندىسى ازاماتتىڭ قولىنا تاپسىرىلىپ، وسى قورىتىندىسىن نەگىزگە الا وتىرىپ، ازاماتتىق، قۇقىقتىق تۇرعىدان ازاماتشا الدامجاروۆا سوتقا جۇگىنۋىنە بولادى»، - دەيدى قالالىق پد رەسمي وكىلى سالتانات ازىربەك.
جامبىل وبلىسىنىڭ تۇرعىنى قاماجاي بەرىكوۆا دا قاباعىن تارتتىرىپ، كوزىنىڭ اينالاسىنداعى ءاجىمىن كەتىرۋ ءۇشىن وپەراسيا جاساتقان. سالدارىنان بەتى مەن جاعى قيسايىپ، كوزىنىڭ اينالاسىندا تىرتىق قالعان.
«مەنى گريمسىز-اق قورقىنىشتى فيلمدەرگە تۇسىرە بەرۋگە بولاتىن ەدى سول كەزدە. ءقازىر مىناۋ جوندەلگەن ءتۇرى. سونىڭ وزىندە مەندە ءقازىر «كوملەكس»، ەلدىڭ بەتىنە تىكە قاراي المايمىن. ءتىپتى، مەنىڭ ميميكالارىم دۇرىس ەمەس. كۇلەيىن دەسەم، كوزدىڭ جان-جاعى دۇرىس جينالمايدى»، - دەيدى جامبىل وبلىسىنىڭ تۇرعىنى قاماجاي بەرىكوۆا،
دەنساۋلىق ساقتاۋ مينيسترلىگى شاراسىز. ولار پلاستيكالىق حيرۋرگيا، كوسمەتولوگيا قىزمەتىنە جۇگىنەردە مىنالاردى ەسكەرگەن ءجون دەيدى.
«پلاستيكالىق حيرۋرگيا، دەرماتوكوسمەتولوگيا مەديسينالىق قىزمەتتىڭ ليسەنزيالاناتىن كىشى ءتۇرى بولىپ تابىلادى. ەگەر ءسىز پلاستيكالىق حيرۋرگيا، دەرماتوكوسمەتولوگيا قىزمەتىنە جۇگىنەتىن بولساڭىز، ءبىرىنشى كەزەكتە ول ۇيىمنىڭ ليسەنزياسى بار ما، جوق پا، سونى تالاپ ەتىڭىز. ەكىنشىدەن، سىزگە قىزمەت كورسەتەتىن ماماننىڭ سەرتيفيكاتى بار ما، جوق پا، سونى سۇراۋ كەرەك»، - دەيدى ق ر دسم مەديسينالىق جانە فارماسيەۆتيكالىق باقىلاۋ كوميتەتىنىڭ باسقارما باسشىسى باعجان مۇحامبەتبەك.
زاڭگەرلەر بولسا، مۇنداي جاعدايعا تاپ بولعانداردى قورعايتىن ارنايى زاڭ بار ەكەنىن ايتتى.
«بۇل جەردە قك 317-بابى بار، بۇل باپ بويىنشا اكىمشىلىك جازاعا تارتۋى مۇمكىن. بولماسا، دەنساۋلىعىنا زيان كەلەتىن بولسا، 3 جىلعا دەيىن باس بوستاندىعىنان ايىرىلۋى مۇمكىن. ەگەر ادام ولىمىنە كەلەتىن بولسا، 5 جىلعا دەيىن باس بوستاندىعىنان ايىرىلۋى مۇمكىن. بۇل كەزدە زارداپ شەككەن ادام دالەل جيناۋ كەرەك»، - دەيدى زاڭگەر مارعۇلان شىنىبايەۆ.
بەتىندەگى بورتپەمەن الىسقان مايرا ەندى سوتقا جۇگىنىپ، شىعىندارىن وتەۋدى تالاپ ەتپەك. ول قىز-كەلىنشەكتەردى ءوزى سەكىلدى اجارلانامىن دەپ وپىق جەپ قالماسا ەكەن دەيدى.