«وتباسىنىڭ سيفرلىق كارتاسىنا» 19 ملن قازاقستاندىقتىڭ دەرەكتەرى ەنگىزىلدى. بۇل تۋرالى وڭىرلىك كوممۋنيكاسيالار قىزمەتىندە استانا قالاسى بويىنشا ەڭبەك جانە الەۋمەتتىك قورعاۋ كوميتەتى دەپارتامەنتىنىڭ باسشىسى قانات توقتىبايەۆ ايتتى، دەپ حابارلايدى قازاقپارات ءتىلشىسى.
«مەملەكەت باسشىسىنىڭ تاپسىرماسى بويىنشا 2022 جىلدىڭ 1 قىركۇيەگىنەن باستاپ پيلوتتىق رەجيمدە «وتباسىنىڭ سيفرلىق كارتاسىن» ەنگىزۋ باستالدى. شىن مانىندە، كارتا – بۇل ازاماتتاردىڭ الەۋمەتتىك مارتەبەسىنە بايلانىستى كەپىلدەندىرىلگەن مەملەكەتتىك قولداۋدىڭ قانداي دا ءبىر ءتۇرىن الۋ جونىندەگى قۇقىقتارى تۋرالى كۇندەلىكتى ەلەكتروندىق حابارلاما. بۇل - مەملەكەتتىك قىزمەتتى جەتىلدىرۋدىڭ تاعى ءبىر تەتىگى. ياعني، مەملەكەت اقپاراتتىق جۇيە ارقىلى ازاماتقا مەملەكەتتىك قولداۋ تۇرلەرىن ونلاين الۋ مۇمكىندىگىن ۇسىنادى»، - دەدى قانات توقتىبايەۆ.
ونىڭ ايتۋىنشا، باستاپقى كەزەڭدە مەملەكەتتىك ورگانداردىڭ اقپاراتتىق جۇيەلەرىنىڭ دەرەكتەرى نەگىزىندە وتباسىلاردىڭ ءال-اۋقاتىن جانە ولارعا كورسەتىلەتىن قولداۋ شارالارىن انىقتاۋ بويىنشا جۇمىس جۇرگىزىلدى. بۇگىنگى تاڭدا سيفرلىق كارتاعا شامامەن 6 ملن وتباسىنىڭ، ولاردىڭ جانۇيا مۇشەلەرىمەن قوسقاندا 19 ملن ادامنىڭ مالىمەتتەر ەنگىزىلگەن. دەرەكتەر وتباسى مەن ونىڭ مۇشەلەرىنىڭ مارتەبەسى وزگەرگەن سايىن جاڭارىپ وتىرادى. مەملەكەتتىك قولداۋ شارالارىن الۋعا رۇقسات بەرىلگەن كەزدە وعان سمس-حابارلاما جىبەرىلەدى. كەيىن الەۋمەتتىك جاردەماقى، تولەمدەر نەمەسە مەملەكەتتىك قولداۋدىڭ وزگە دە تۇرلەرىن تاعايىنداۋ جۇزەگە اسىرىلادى. تيىسىنشە، ول قاراجات ازاماتتىڭ بانك شوتىنا اۋدارىلادى.