جەكە باسىن راستايتىن قۇجاتى جوق 14 ازامات انىقتالدى
كوشى-قون پوليسياسى قىزمەتكەرلەرى ەشبىر قۇجاتسىز جۇرگەن، ونىڭ ىشىندە ءالى كۇنگە دەيىن كسسرو قۇجاتىمەن جۇرگەن ادامداردى انىقتاۋ ماقساتىندا ءبىرشاما جۇمىستار اتقارىپ كەلەدى، دەپ حابارلايدى Almaty-akshamy.kz Polisia.kz-كە سىلتەمە جاساپ.
«بەلگىلى بولعانداي، ازاماتتار قولدارىندا ەشقانداي قۇجات بولماعاندىقتان ءبىراز مەملەكەتتىك قىزمەتتەردى، ونىڭ ىشىندە دەنساۋلىق ساقتاۋ، ءبىلىم الۋ، الەۋمەتتىك كومەك، زەينەتاقى سياقتى قىزمەت تۇرلەرىن مۇلدەم الا المايدى. جانە ەشقايدا زاڭدى تۇردە جۇمىسقا ورنالسا المايتىندىعى بەلگىلى. مۇنداي تۇلعالاردى اشكەرەلەۋ وڭايعا تۇسپەيدى. سەبەبى ونداي ازاماتتاردىڭ ازاماتتىعىن انىقتاپ، جەكە ءتولقۇجات راسىمدەۋ ءۇشىن ءبىرشاما ۋاقىت كەرەك. العاش رەت جەكە كۋالىك الاتىن ازاماتتار 1974 جىلى بەرىلگەن پاسپورت نەگىزىندە جەكە كۋالىك راسىمدەپ، قازاقستان رەسپۋبليكاسىنىڭ ازاماتى رەتىندە تانىلادى. جىل باسىنان بەرى تەك قانا ءبىزدىڭ اۋدان بويىنشا جەكە باسىن انىقتاۋ كۋالىگى جوق 14 ازامات انىقتالدى»، – دەپ حابارلادى الماتى قالاسى تۇركىسىب اۋداندىق پوليسيا باسقارماسىنىڭ باستىعى ەركىن امانتايەۆ.
قۇجاتسىز جۇرگەن ازاماتتاردىڭ ءبىرى – 1965 جىلى تۋىلعان بەيبىت حاسەنوۆ. ول كسسرو پاسپورتى نەگىزىندە قر-نىڭ جەكە كۋالىگىن راسىمدەدى. 5 قاراشا كۇنى دايىن قۇجاتتى قولىنا الدى.
«بۇل ازاماتتىڭ ءومىر تاريحى باسقا دا قۇجاتسىز جۇرگەن ازاماتتار سياقتى. شىعىس قازاقستان وبلىسىنىڭ تۋماسى كسسرو قۇجاتىن اۋىستىرۋ ءۇشىن قاجەت قۇجاتتاردى دايىنداپ، ءبىراق بەلگىسىز سەبەپتەرمەن راسىمدەۋدى اياقتاماعان. اركىمگە جالدانىپ، ەڭبەك ەتكەن. الماتى قالاسىندا تۇرىپ، ءىىو-نا قۇجات راسىمدەۋگە ءوتىنىش بەرىپ، بارلىق كەرەكتى انىقتامالار جيناعاننان كەيىن ءتولقۇجات الدى. وكىنىشكە وراي، ءالى كۇنگە دەيىن قۇجاتسىز جۇرگەن ازاماتتاردىڭ باسىم كوپشىلىگىنىڭ تۇرمىستىق جاعدايى وتە تومەن دەڭگەيدە. وسى ورايدا ءبىز قۇجاتسىز جۇرگەن ازاماتتاردى تۇرعىلىقتى مەكەنجايلارى بويىنشا كوشى-قون پوليسياسىنا قۇجات راسىمدەۋ ءۇشىن ءوتىنىش بەرۋلەرىن سۇرايمىز»، – دەدى امانتايەۆ.