جازعى دەمالىس قىزا ءتۇستى. اۋا رايىنىڭ اشىق تۇرۋى بالالاردىڭ كوپ ۋاقىتىن ۇيدەن گورى سىرتتا: جاعاجايدا، سپورتتىق الاڭداردا وتكىزۋلەرىنە جانە قالا كوشەلەرىندە جاي سەرۋەندەۋلەرى ءۇشىن جاقسى مۇمكىندىك. تاجىريبە كورسەتىپ وتىرعانداي، وسى كەزەڭدە بالالاردىڭ جاراقات الۋ جاعدايلارى جيىلەيدى. مەكتەپ وقۋشىلارىنا جازدا قانداي ءقاۋىپ بار جانە ونىڭ الدىن قالاي الۋعا بولاتىنىن وكق الاڭىندا الماتى قالاسىنىڭ «بالالار شۇعىل مەديسينالىق جاردەم ورتالىعىنىڭ» قابىلداۋ ءبولىمىنىڭ مەڭگەرۋشىسى مەيىرجان قۇرمانالييەۆ ايتىپ بەردى، دەپ حابارلايدى Almaty-akshamy.kz.
بالالار جاراقاتىنا قاتىستى ستاتيستيكا جاعا ۇستاتارلىق – جىل باسىنان بەرى الماتى دارىگەرلەرىنە 42 069 بالا جۇگىنگەن. وتكەن جىلى بۇل كورسەتكىش 80 مىڭنان اسقان بولاتىن.
كوبىنە تومەنگى سىنىپ وقۋشىلارى ءجيى جاراقاتتانىپ قالادى. بالالار ساموكاتتان، ۆەلوسيپەدتەن، اتكەنشەكتەن قۇلاپ قالۋلارى مۇمكىن. كەيدە ءۇي جاعدايىندا تۇرمىستىق جاراقات الىپ جاتادى. مۇنداي كورسەتكىش 44%-عا تەڭ. ال كوشەدە بالالاردىڭ 35%-ى جاراقاتتانادى.
بالالاردىڭ جاراقاتتانۋىنا ءجيى سەبەپ بولاتىن جاعدايلار رەتىندە ساراپشى ەرەسەكتەردىڭ جاۋاپسىزدىعىن جانە بالالاردىڭ قاراۋسىز قالۋىن، بالالاردىڭ تارتىپسىزدىگىن، قايعىلى جاعدايلار مەن باسقا دا سەبەپتەردى اتادى.
«بۇل جەردە دە اتا-انالاردىڭ ءرولى ماڭىزدى. ولار بالالارمەن سويلەسىپ، قاراپايىم قاۋىپسىزدىك ەرەجەلەرىن تۇسىندىرۋلەرى كەرەك. دەمالىس كەزىندە بالا كۇننىڭ كوپ بولىگىن تازا اۋادا وتكىزەدى. سول سەبەپتى وعان مىندەتتى تۇردە كوشەدە ءقاۋىپسىز ءجۇرۋ ەرەجەلەرىن ۇيرەتكەن ءجون. ويىن كەزىندە كىشكەنتاي بالالاردى قاراۋسىز قالدىرماعان دۇرىس. قالامىزدا جىلدام قارقىنمەن دامىپ جاتقان بالالار الاڭدارى، دەمالىس ايماقتارى كوپ. وكىنىشكە قاراي، كوپتەگەن اتا-انالار وسىعان ءمان بەرمەيدى. قابىلدانعان قاۋىپسىزدىك شارالارىنا قاراماي، بالالار اتا-انالارىنىڭ جاۋاپسىزدىعىنان كوپتەگەن جاراقاتتارمەن ءتۇسىپ جاتادى»، - دەپ ءبولىستى دارىگەر.
مەيىرجان قۇرمانالييەۆ ەرەسەكتەرگە جول قوزعالىسى ەرەجەلەرىن ساقتاۋ تۋرالى بالالارعا ءجيى ايتىپ، قاۋىپسىزدىك تەحنيكاسى بويىنشا نۇسقاۋلىقتار وتكىزۋدى، دارى-دارىمەكتى بالالارعا قولجەتىمسىز جەرگە قويۋدى، بالالاردى ەشقاشان جاعادا جانە سۋدا قاراۋسىز قالدىرماۋدى، ىستىق اۋا رايىندا بالالارعا باس كيىم كيۋدى جانە ولاردى كۇننەن قورعاۋعا كەڭەس بەرەدى. اتا-انالار بالالارىنا تەز تۇتاناتىن، تەسەتىن، كەسەتىن، جارىلعىش جانە اتىس قارۋىنىڭ نە ەكەنىن جانە ولاردىڭ قانداي ءقاۋىپ توندىرەتىنىن تۇسىندىرۋگە مىندەتتى.
بالالارعا قيىن جاعدايعا تاپ بولعاندا، ولار اتا-اناسىنا عانا ەمەس، جەدەل قىزمەتتەرگە دە قوڭىراۋ شالا الاتىندارىن ايتىپ، ءتۇسىندىرۋ كەرەك. بۇل قىزمەتتەردىڭ تەلەفون نومىرلەرىنىڭ ءتىزىمى ۇيدە ەڭ كورىنەتىن جەردە ورنالاستىرىلۋى كەرەك. بۇل سانداردى بالا جاتقا بىلسە، ءتىپتى جاقسى.