سوڭعى جىلدارى كونسۋلتاتيۆتىك-دياگنوستيكالىق قىزمەتتەرگە سۇرانىس ارتقان. وعان وتكەن 9 ايدىڭ ىشىندە قور 18 ملرد تەڭگە جۇمساعان.
بۇل تۋرالى مەديسينالىق ساقتاندىرۋ قورى الماتى قالالىق فيليالىنىڭ ديرەكتورى تىلەۋحان ابىلدايەۆ ايتتى، دەپ حابارلايدى Almaty-akshamy.kz
سونىمەن قاتار، ءمامس قۇنى قىمبات وپەراسيالاردىڭ دا شىعىنىن جابادى.
«ساقتاندىرۋ قاراجاتى ەسەبىنەن كارديوحيرۋرگيا، نەيروحيرۋرگيا، ۋرولوگيا، تراۆماتولوگيا، حيرۋرگيا، ونكولوگيا، لور پروفيلدەرى بويىنشا جۇزدەگەن وتا جاسالىپ جاتىر. مۇنداي ءبىر وتانىڭ قۇنى بىرنەشە ميلليونعا دەيىن جەتىپ جىعىلۋى مۇمكىن. مىسالى، وسى جىلدىڭ 9 ايىندا ءبىر عانا الماتى بويىنشا 1300-دەن استام كارديوحيرۋرگيالىق وپەراسيا جاسالىپ، وعان قور تاراپىنان 5،7 ملرد تەڭگە تولەندى. نەيروحيرۋرگيالىق پروفيل بويىنشا 548 وپەراسيا جاسالعان. وعان 2،9 ملرد تەڭگەدەن استام قارجى تولەندى»، - دەدى تىلەۋحان ابىلدايەۆ.
بۇگىندە تىزە، جامباس بۋىندارىن الماستىرۋ وپەراسيالارىنا دەگەن سۇرانىس تا جوعارى.
«مىسالى، وسى جىلدىڭ 9 ايىندا 240-تان استام بۋىن الماستىرۋ وپەراسياسى جاسالىپ، وعان 438،5 ملن قارجى تولەندى. سونىمەن قاتار، الماتى قالاسىندا قاڭتار-قىركۇيەك ارالىعىندا جالپى قۇنى 441 ملن تەڭگە تۇراتىن 70-تەن استام ترانسپلانتاسيا جاساعان. ولاردىڭ ىشىندە 18 باۋىر-بۇيرەك الماستىرۋ وپەراسياسى دا بار. وسىنىڭ ءبارى ساقتاندىرۋ قورى ارقىلى كورسەتىلىپ جاتقان قىزمەتتەر»، -دەدى فيليال باسشىسى تىلەۋحان ابىلدايەۆ.