قازىرگى كەزدە قالادا بارلىعى 860 مەكتەپكە دەيىنگى ۇيىم جۇمىس ىستەيدى.
مەگاپوليس اكىمى باقىتجان ساعىنتايەۆ ءداستۇرلى تامىز كەڭەسىندە بالالاردى مەكتەپكە دەيىنگى ساپالى تاربيەمەن قامتاماسىز ەتۋ شارالارى تۋرالى ايتتى، دەپ حابارلايدى Almaty-akshamy.kz.
«الماتى مەكتەپتەرى پوسكوۆيدتىك كەزەڭدە: ءبىلىم ساپاسى، بالالاردىڭ دەنساۋلىعى جانە وتباسىنىڭ ءرولى» اتتى ونلاين-فورۋم بارىسىندا مەگاپوليس اكىمى باقىتجان ساعىنتايەۆ جاڭا وقۋ جىلىندا مەكتەپكە دەيىنگى ءبىلىم بەرۋ سالاسىندا وتكەن جىلى قولعا الىنعان باستامالاردى ىسكە اسىرۋ جونىندەگى جۇمىستاردىڭ جالعاساتىنىن اتاپ ءوتتى.
«ءبىز ءقازىردىڭ وزىندە مەكتەپكە دەيىنگى سالاعا جەكە سەكتوردى تارتۋدىڭ جاقسى ءۇردىسىن كورىپ وتىرمىز. بۇل جەكە ينۆەستورلار اراسىندا جۇرگىزىلگەن بەلسەندى ءتۇسىندىرۋ جۇمىستارىنىڭ، سونداي-اق قالا اكىمدىگىنىڭ ايتارلىقتاي قولداۋىنىڭ ارقاسىندا مۇمكىن بولدى»، - دەدى باقىتجان ساعىنتايەۆ.
ماسەلەن، وسى جىلدىڭ باسىنان بەرى قالادا 72 جەكەمەنشىك بالاباقشا جۇمىس جاساۋدا، ولارعا ءقازىر 4 مىڭنان استام بالا بارۋدا، ايتا كەتەرلىگى، ولاردىڭ 42ء-ى جازعى كەزەڭدە اشىلدى.
وسىلايشا، قازىرگى كەزدە قالادا بارلىعى 860 مەكتەپكە دەيىنگى ۇيىم جۇمىس ىستەيدى، ونىڭ 22%-ى نەمەسە 189-ى - مەملەكەتتىك مەنشىكتە. بۇگىندە 1 جاستان 6 جاسقا دەيىنگى 69 490 بالا مەكتەپكە دەيىنگى تاربيەمەن قامتىلعان، ونىڭ ىشىندە 3 جاستان 6 جاسقا دەيىنگىلەر - 63 920 بالا.
بيىلعى جىلى مەملەكەتتىك ءبىلىم بەرۋ تاپسىرىسى وتكەن جىلمەن سالىستىرعاندا 10244 ورىنعا ۇلعايتىلدى جانە ورنالاستىرىلدى، ونىڭ ىشىندە اعىمداعى جىلى اشىلعان 4378 ورىندى 67 جاڭا جەكە بالاباقشا دا بار.
بالالاردى مەكتەپكە دەيىنگى تاربيەمەن قامتۋدى ۇلعايتۋ جانە بالاباقشالارداعى كەزەكتى ازايتۋ ماقساتىندا وتكەن جىلدان باستاپ مەملەكەتتىك تاپسىرىس بويىنشا جۇمىس ىستەيتىن جاڭادان اشىلعان جەكەمەنشىك بالاباقشالاردىڭ تاماقتانۋ قۇنىن جەرگىلىكتى بيۋدجەت قارجىسى ەسەبىنەن سۋبسيديالاۋ مەحانيزمى بەلسەندى تۇردە ەنگىزىلدى.
ۇكىمەتتىڭ قولداۋىمەن اكىمدىكتىڭ بۇل باستاماسى جەكە مەكتەپكە دەيىنگى ۇيىمداردا تاربيەلەنەتىندەردىڭ اتا-انالارىن قولداۋعا، جەكە ۇيىمداردىڭ قولجەتىمدىلىگىن ارتتىرۋعا، سونداي-اق مەملەكەتتىك جانە جەكەمەنشىك بالاباقشالارعا بارۋ قۇنىن تەڭەستىرۋگە باعىتتالعان. بيىلعى جىلى جەرگىلىكتى بيۋدجەتتەن ازىق-تۇلىك شىعىندارىن وتەۋگە 343 ميلليون تەڭگەدەن استام قارجى قاراستىرىلعان.
جاڭا بالاباقشالاردى سالۋ جالعاسۋدا. بۇگىندە بوستاندىق جانە ناۋرىزباي اۋداندارىندا 360 ورىندىق 3 مەملەكەتتىك بالاباقشانىڭ قۇرىلىسى اياقتالدى جانە تۇركسىب اۋدانىندا 280 ورىندى بالاباقشانىڭ قۇرىلىسى جالعاسۋدا.
جاقىن ارادا 1920 ورىندى تاعى 10 مەملەكەتتىك مەكتەپكە دەيىنگى ۇيىمنىڭ قۇرىلىسى جوسپارلانۋدا.
اۋەزوۆ اۋدانىندا ۇزاق مەرزىمدى جالعا بەرۋدەن قايتارىلعان ءارى كۇردەلى جوندەلىپ، سەيسميكالىق كۇشەيتىلگەن 315 ورىندى مەملەكەتتىك بالاباقشا بالالاردى قابىلداۋعا تولىق دايىن.
ناقتىلى شارالار اياسىندا قايتارىلعان 640 ورىندى بۇرىنعى مەملەكەتتىك بالاباقشالاردىڭ 2 كورپۋسىنا قايتا جاڭارتۋ جۇمىستارى جۇرگىزىلەتىن بولادى.