بۇل سۇراققا جاۋاپ بەرگەن ق ر ءبىلىم جانە عىلىم ءمينيسترى اسحات ايماعامبەتوۆ Facebook جەلىسىندەگى پاراقشاسىندا جاڭا ءتارتىپتى تۇسىندىرگەن جازبا جاريالادى.
ءمينيستردىڭ مالىمدەۋىنشە، ەندى مەكتەپ ديرەكتورىنىڭ مىندەتىن اتقارۋشى بولىپ ءۇش ايدان ارتىق ىستەۋگە بولمايدى، دەپ حابارلايدى Almaty-akshamy.kz
«مەكتەپ ديرەكتورلارىن تاعايىنداۋدىڭ جاڭا تارتىبىنە توقتالىپ وتسەم. شىن مانىندە، بۇل – مەكتەپ ديرەكتورلارى، وقۋ مەڭگەرۋشىلەرى، پەداگوگتەر جانە ساراپشىلارمەن بىرلەسە ءبىر جىلدان اسا ۋاقىت اتقارعان تىنىمسىز جۇمىستىڭ ناتيجەسى. بىرىنشىدەن، ەندى مەكتەپ ديرەكتورىنىڭ مىندەتىن اتقارۋشى بولىپ ءۇش ايدان اسپايتىن جانە ءبىر رەتتەن ارتىق ەمەس مەرزىمدە عانا ىستەۋگە بولادى. وسى كەزەڭدە كونكۋرس وتكىزىلىپ، جاڭا باسشى تاعايىندالۋى كەرەك»، – دەپ جازدى مينيستر.
ايماعامبەتوۆتىڭ ايتۋىنشا، مەكتەپ ديرەكتورىنىڭ بوس نەمەسە ۋاقىتشا بوس لاۋازىمىنا كونكۋرس تۋرالى حابارلاندىرۋ بوس ورىن پايدا بولعاننان كەيىن جەتى جۇمىس كۇنى ىشىندە ءبىلىم باسقارماسىنىڭ رەسمي سايتىندا جانە اككاۋنتىندا ورنالاستىرىلۋى كەرەك.
«وسىلايشا بوس نەمەسە ۋاقىتشا بوس ديرەكتور لاۋازىمىنا كونكۋرس جاريالاماي-اق، جىلدار بويى ديرەكتوردىڭ مىندەتىن اتقارۋشى بولىپ جۇمىس ىستەپ جۇرە بەرۋگە ەندى جول بەرىلمەيدى»، – دەدى ول.
ونىڭ حابارىنا قاراعاندا، بۇگىنگى تاڭدا ەلىمىزدە مەكتەپ باسشىسى لاۋازىمىنا 700-دەن اسا بوس جۇمىس ورنى بار جانە، سايكەسىنشە، ول جەرلەردە ديرەكتوردىڭ مىندەتىن اتقارۋشى ادامدار جۇمىس ىستەپ ءجۇر.
«ەكىنشىدەن، ەرەجەدە ديرەكتوردىڭ ۋاقىتشا بوس لاۋازىمىنا (بالا كۇتىمىنە بايلانىستى دەمالىس، وقۋ جانە ت.ب.) تاعايىنداۋ رەگلامەنتتەلەدى. مۇنداي جاعدايلاردا دا ۇيىم باسشىسى تىكەلەي تاعايىنداۋ ەمەس، كونكۋرس ارقىلى انىقتالادى. ۇشىنشىدەن، ەندى ديرەكتور لاۋازىمىنا كونكۋرستى اۋداندىق ءبىلىم بولىمدەرى ەمەس، وبلىستىق ءبىلىم باسقارمالارى وتكىزەدى. ياعني، كونكۋرستىق راسىمدەردى ۇيىمداستىرادى جانە ديرەكتورلاردى انىقتايدى. سودان كەيىن ديرەكتوردىڭ كانديداتۋراسى بويىنشا قۇجاتتار ەڭبەك شارتىن جاساسۋ ءۇشىن ءبىلىم بولىمىنە جىبەرىلەدى. 5 جىلعا تاعايىندالادى»، – دەپ جازدى مينيستر.
ايماعامبەتوۆتىڭ ايتۋىنشا، بايقاۋ بىرنەشە كەزەڭنەن تۇرادى:
كانديداتتاردىڭ ديرەكتور لاۋازىمىنا قۇجاتتاردى تاپسىرۋى؛
ءبىلىم باسقارماسىنداعى كادر قىزمەتىنىڭ كانديداتتىڭ بىلىكتىلىك تالاپتارىنا سايكەستىگىن باعالاۋى، كونكۋرسقا قاتىسۋعا رۇقسات بەرۋى؛
ۇمىتكەرلەرگە ارنالعان ەلەكتروندىق تەستىلەۋ (باسقارۋشىلىق قۇزىرەتتەر، پەداگوگيكا، پسيحولوگيا، ق ر زاڭناماسى بويىنشا تەستىلەۋ)؛
وقۋ ورنىنىڭ قامقورشىلىق كەڭەسىنىڭ الدىندا مەكتەپتىڭ دامۋ جوسپارىن قورعاۋ (تەستىلەۋدى ءساتتى تاپسىرعان جاعدايدا)؛
ءبىلىم باسقارماسىنداعى اڭگىمەلەسۋ (قامقورشىلىق كەڭەسىنىڭ الدىندا مەكتەپتىڭ دامۋ جوسپارىن ءساتتى قورعاپ شىققان ۇمىتكەرلەر جىبەرىلەدى).
«قامقورشىلىق كەڭەستەرىنىڭ قۇرامىنا اتا-انالار، پەداگوگيكا سالاسىنىڭ ەڭبەك ارداگەرلەرى، قوعام قايراتكەرلەرى، ۇكىمەتتىك ەمەس ۇيىمداردىڭ وكىلدەرى كىرەدى. بارلىق كەزەڭنەن وتكەن ۇمىتكەرمەن ءبىلىم ءبولىمى ءتيىستى ەڭبەك شارتىن جاساپ، ونى ديرەكتور ەتىپ تاعايىنداۋ تۋرالى بۇيرىق شىعارادى»، – دەدى ايماعامبەتوۆ.