باقىتجان ساعىنتايەۆ وقۋشى ورىندارىنىڭ تاپشىلىعىن تومەندەتۋ شارالارى تۋرالى ايتتى

وقۋ جىلىنىڭ باسىندا قالادا 2120 ورىندى 8 جەكە مەنشىك مەكتەپ اشۋ جوسپارلانۋدا.

الماتى اكىمى باقىتجان ساعىنتايەۆ تامىز كەڭەسىندە جاڭا مەكتەپتەردىڭ قۇرىلىسى تۋرالى ايتتى، دەپ حابارلايدى Almaty-akshamy.kz.

«كارانتيندىك شەكتەۋلەرگە قاراماستان، وقۋشى ورىندارىنىڭ  تاپشىلىعىن ازايتۋ جانە قالالىق ءبىلىم بەرۋ مەكەمەلەرىنىڭ جەلىسىن ودان ءارى كەڭەيتۋ ماقساتىندا وتكەن جىلدان باستاپ، ءبىز بىردەن بىرنەشە جوبانى ىسكە اسىرا باستادىق»، - دەپ اتاپ ءوتتى باقىتجان ساعىنتايەۆ.

ماسەلەن، قازىرگى كەزدە قالادا 12 600 ورىندى 8 مەملەكەتتىك مەكتەپتىڭ، سونداي-اق  قولدانىستاعى مەكتەپتەر جانىنان سالىنىپ جاتقان 8263 ورىندى 17 جاڭا كورپۋستىڭ قۇرىلىسى جۇرۋدە.

بيىلعى وقۋ جىلىنىڭ باسىندا 4150 ورىندىق 9 جاڭا كورپۋس پايدالانۋعا بەرىلەدى، 4113 ورىندىق تاعى 8 جاڭا كورپۋس جىل سوڭىنا دەيىن جۇمىسىن باستايدى. سونىمەن قاتار وقۋ جىلىنىڭ باسىندا قالادا 2120 ورىندىق 8 جەكە مەنشىك مەكتەپ اشۋ جوسپارلانۋدا.

تاياۋ ارادا 3500 ورىندىق تاعى 4 مەملەكەتتىك مەكتەپتى، 4400 ورىندىق 11 جاڭا كورپۋستاردى سالۋ جوسپارلانۋدا، سونىمەن قاتار جەكە ينۆەستورلارمەن بىرگە 4 مەكتەپتىڭ جوبالىق قۋاتىن ۇلعايتا وتىرىپ، رەنوۆاسيالاۋ جانە 6 مىڭ ورىندىق 5 جەكە ۇيىم اشۋ جوسپارلانۋدا.

جوسپارعا سايكەس، سەيسميكالىق نىعايتۋ جانە بىرنەشە مەكتەپ عيماراتتارىن كۇردەلى جوندەۋ جۇمىستارى دا جالعاسۋدا. سوندىقتان وقۋ ۇدەرىسىنە كەدەرگى كەلتىرمەۋ ءۇشىن وقۋشىلاردى ۋاقىتشا كوشىرۋ ۇيىمداستىرىلدى.

باقىتجان ساعىنتايەۆ قالالىق جايلى ورتا باسقارماسى مەن ءبىلىم باسقارماسىنا بىرگە اعىمداعى قۇرىلىس پەن جوندەۋ جۇمىستارىنىڭ بارىسىنا ءتيىستى باقىلاۋدى جانە ولاردىڭ ۋاقىتىلى جانە ساپالى اياقتالۋىن قامتاماسىز ەتۋدى تاپسىردى.