كەلۋشىلەردىڭ سانى جىل باسىنان بەرى 100 000 ادامنان اسىپ كەتتى.
بۇل تۋرالى وڭىرلىك كوممۋنيكاسيالار قىزمەتىنىڭ باسپا ءسوز كونفەرەنسياسى كەزىندە الماتى قالالىق مادەنيەت باسقارماسىنىڭ باسشىسى عاني مايلىبايەۆ مالىمدەدى. ول وتكەن جىلدان باستاپ قالا اكىمى باقىتجان ساعىنتايەۆتىڭ باستاماسىمەن الماتىنىڭ الاتاۋ اۋدانىندا ارنايى شىعارماشىلىق حاب ىسكە قوسىلعانىن ەسكە سالدى، دەپ حابارلايدى Almaty-akshamy.kz.
عاني مايلىبايەۆتىڭ ايتۋىنشا، جاڭا كەڭىستىكتە بالالارعا ارنالعان 25 تەگىن شىعارماشىلىق ۇيىرمە، كوۆوركينگ-كەڭىستىك پەن شەبەرلىك ساباقتارىنا ارنالعان الاڭدار تۇرعىندارعا قىزمەت كورسەتەدى. كەلۋشىلەردىڭ سانى جىل باسىنان بەرى 100 000 ادامنان اسىپ كەتتى.
««الماتى-2050» ۇزاق مەرزىمدى دامۋ ستراتەگياسىنداعى باسىم باعىتتاردىڭ ءبىرى – شىعارماشىلىق يندۋستريانى دامىتۋ. سوندىقتان مۇندا مۇرات مۇتۇرعانوۆتىڭ «سەن جۇلدىزسىڭ» سيرك ونەرى مەكتەبى، ديانا شاراپوۆانىڭ ۆوكال مەكتەبىنىڭ مۋزىكا كۋرستارى، «Art Bit» مۋلتيمەديالىق ونەر ورتالىعى – ونەردەگى جاڭا تەحنولوگيالارعا باعىتتالعان وقۋ-كورمە ورتالىعى تەگىن جۇمىس جاسايدى. حاب قازىرگى زامانعى ونەر تۇرلەرىنەن باسقا، حالىقتىق داستۇرلەردى شىعارماشىلىقپەن زەرتتەۋگە مۇمكىندىك بەرەدى. وسىنداي ۇيىرمەلەردىڭ ءبىرى – Etnokonstruktor - حالىقتىق ءداستۇر رۋحىنداعى ويىن»، - دەدى عاني مايلىبايەۆ.
مادەنيەت باسقارماسى باسشىسىنىڭ پىكىرىنشە، «ALATAU CREATIVE HUB» مادەني، ينتەللەكتۋالدىق جانە دارىندى دامىتۋدىڭ شىنايى وشاعىنا اينالدى.
سپيكەر ستراتەگيا اياسىندا قالاداعى ماۋلەنوۆ كوشەسى، 46 مەكەنجايدا جاڭا كىتاپحانا، سونداي-اق نازاربايەۆ داڭعىلى، 122 مەكەنجايدا «MEDEU CREATIVE HUB» مۋزىكالىق ونەرگە باۋليتىن جاستار ورتالىقتارىنىڭ اشىلاتىنىن ايتتى. مۇندا جىل سايىن 500-دەن استام ءىس-شارا وتكىزۋ جوسپارلانۋدا.