الماتى قالاسىنىڭ اكىمى ەربولات دوسايەۆتىڭ تۇركسىب اۋدانى تۇرعىندارىمەن كەزدەسۋىندە الماتى تەمىرجولى ماڭىنداعى ماسەلە كوتەرىلدى، دەپ حابارلايدى اlmaty-akshamy.kz.
تۇرعىن ساۋالى:
مەنىڭ ەكى سۇراعىم بار. ءبىرىنشىسى الماتى تەمىرجول ۆوكزالىنا قاتىستى. جەڭىل كولىك قوزعالىسىن رەتتەۋ كەرەك. ۆوكزال الدىندا ۇنەمى كەپتەلىس بولىپ تۇرادى. بۇل كولىك تىعىنى شولوحوۆ كوشەسىنە دەيىن سوزىلادى. ونىڭ ۇستىنە اقان سەرى كوشەسىمەن كەلە جاتقاندا سولعا بۇرىلۋعا تىيىم سالىندى. الماتىداعى ءبىرىنشى ۆوكزالعا 50 جىل بولادى. سوندىقتان وعان از دا بولسا جوندەۋ جۇمىستارىن جۇرگىزۋىڭىزدى سۇرايمىز.
ەكىنشى ماسەلە، 1927 جىلى قۇرىلىسى باستالىپ، 1930 جىلى اياقتالعان تۇركسىبتىڭ ءجۇز جىلدىعى جاقىنداپ قالدى. ءبىزدىڭ اۋدان وسى اتاقتى تەمىرجولدىڭ اتىمەن اتالعانى بەلگىلى. سوندىقتان ونىڭ عاسىرلىق مەرەيتويىنا وراي الماتى-1 تەمىرجول ۆوكزالىنىڭ الدىنا تۇركسىب زامانىنان قالعان پاروۆوز قويىلسا دەيمىز. اۋدان اكىمدىگىمەن سويلەستىك، تۇسىنىستىك بار. وسى ماسەلەنى قاراستىرىپ، رۇقسات بەرۋىڭىزدى سۇرايمىز.
الماتى قالاسى اكىمى ەربولات دوسايەۆتىڭ جاۋابى:
بىرىنشىدەن، ەكى ستانسيا دا وتە ماڭىزدى كولىك ينفراقۇرىلىمى جۇيەسى بولىپ تابىلادى. الماتى-1 تەمىرجول ۆوكزالى ماڭىنداعى اۋماقتى رەتكە كەلتىرۋ كەرەك. ۆوكزال ماڭىندا اۆتوتۇراق رەتىندە ۇيىمداستىرۋعا بولاتىن جەكە ايماق بار. مەن جەر قاتىناستارى بولىمىنە وسىنى قاراۋدى تاپسىردىم. بالكىم، اۋماقتى كوپ كولىكتەردەن بوساتۋ ءۇشىن كوپ دەڭگەيلى اۆتوتۇراقتار سالۋ كەرەك بولار.
جولاۋشىلاردى الىپ كەتۋ ءۇشىن سىزىق بويىنا تىزىلگەن تاكسي جۇرگىزۋشىلەرىنىڭ ارقاسىندا كەپتەلىس پايدا بولادى. سولعا بۇرىلۋعا كەلسەك، قالالىق موبيلدىلىك باسقارماسىنا تەز ارادا جاعدايدى انىقتاپ، شەشىم قابىلداۋدى تاپسىرامىن. ترافيككە كەلەتىن بولساق، جاعدايدى سوڭىنا دەيىن انىقتاپ، ماسەلە شەشىلۋى ءتيىس. ۆوكزالدى جوندەۋ ءۇشىن، ەكى ستانسيانى دا قازاقستان تەمىرجولىنا قايتارامىز دەپ شەشتىك. ولار جوندەۋ جۇمىستارىن جوسپارلاپ، ۆوكزالدى دامىتۋ ءۇشىن قارجى سالۋدى كوزدەپ وتىر.
تۇركسىبتىڭ ءجۇز جىلدىعىنا كەلسەك، اكىمدەرگە، قالالىق كوميسسياعا تاپسىرما بەرىلەدى. اۋداننىڭ اتاۋى وسى تەمىرجولدان شىققاندىقتان، بۇل مەرەكە ەرەكشە اتالۋى دا ءتيىس. جوعارىدا ايتىپ وتكەنىمدەي، 2023 جىلى تۇركسىب اۋدانىنا 85 جىل تولادى. وسىعان بايلانىستى سىزدەردى تاعى دا قۇتتىقتايمىن! ءىس-شارالار ۇيىمداستىرىلادى. ءماسليحات ءوز جۇمىسىن باستاعان بويدا بيىلعى جىلى تۇركسىب ءوڭىرىنىڭ بارلىق وزەكتى ماسەلەلەرىن شەشۋدى سۇراپ، وعان جۇگىنەتىن بولامىز.