ەگدە جاستاعى ايەلدە جۇرەك تالماسىنىڭ بارلىق بەلگىلەرى بايقالعان.
ۇشاق الماتىعا قونعانشا 4 ساعات بويى مەديسينا قىزمەتكەرلەرى رەانيماسيالىق شارالاردى جۇرگىزىپ، شۇعىل كومەك كورسەتتى، دەپ حابارلايدى Almaty-akshamy.kz قالالىق دەنساۋلىق ساقتاۋ باسقارماسىنا سىلتەمە جاساپ.
ناۋرىزدىڭ 24-ىنەن 25-ىنە قاراعان ءتۇنى قازاقستاندىق تۋريستەر مىسىرلىق شارم-ەل-شەيح كۋرورتىنان الماتىعا قايتىپ كەلە جاتقان.
ۇشۋدىڭ ەكىنشى ساعاتىندا "Air Cario" بورتىنداعى 72 جاستاعى جولاۋشى اۋىرىپ قالدى. سول ساتتە وعان كومەككە الماتى قالاسى №4 قالالىق اۋرۋحانانىڭ دارىگەرى نۇرجان اجىبەكوۆ پەن س.د. اسفەندياروۆ اتىنداعى قازاق ۇلتتىق مەديسينا ۋنيۆەرسيتەتىنىڭ ءۇش ستۋدەنتى كومەككە كەلگەن.
"ءبىر كەزدە الدىندا وتىرعان ايەل ابىگەرگە ءتۇستى، ءارى ونىڭ قولىندا نارەستەسى بولدى. سودان كەيىن ستيۋاردتار ۇشاقتا دارىگەرلەردىڭ بار-جوعىن سۇرادى. مەديسينا ۋنيۆەرسيتەتىنىڭ ستۋدەنتتەرى جانە مەن جاۋاپ بەردىك. باستاپقى تەكسەرۋ كەزىندە ميوكارد ينفاركتىسىنىڭ دامۋ ءقاۋپى بار دەپ كۇدىكتەندىم. ايەل ەس-تۇسسىز جاتقان، وعان دەيىن قۇسقان، تامىر سوعىسى ءالسىز، قان قىسىمى تومەن بولدى. سودان كەيىن حاتتاما بويىنشا ارەكەت ەتتىك: قۇسۋدان اسفيكسيانى بولدىرماۋ ءۇشىن اۋىز-جۇتقىنشاقتى تازالادىق، سودان كەيىن جۇرەككە تۇسەتىن جۇكتەمەنى ازايتۋ ءۇشىن ناۋقاستىڭ اياعىن 60°-قا كوتەردىك. ناۋقاستى وتتەگى بەرەتىن بوبروۆ اپپاراتىنا قوستىق. ستۋدەنتتەر بەلسەندى تۇردە كومەكتەستى. قابىلدانعان شارالاردىڭ ناتيجەسىندە قان قىسىمى 80/60-تان 130/80-گە، قانىقتىلىق 87-دەن 96-عا كوتەرىلدى. ايەل ەسىن جيا باستادى. الدىمىزدا كەلەسى ماسەلە تۋىندادى: كەرى ۇشىپ، جاقىن جەردەگى يران ەلىنە قونىپ، جولاۋشىنى اۋرۋحاناعا جەتكىزۋ نەمەسە وتتەگى جاعدايىن ساقتاپ، قازاقستانعا ۇشۋدى جالعاستىرۋ. قۇدايعا شۇكىر، بۇل رەيس بارلىق قاجەتتى دارى-دارمەكپەن جانە قۇرالمەن جابدىقتالعان بولاتىن، بۇل بىزگە ناۋقاسقا بارىنشا كومەك كورسەتۋگە مۇمكىندىك بەردى - ۇيگە ۇشامىز دەگەن شەشىم قابىلداندى. ءبىزدىڭ مىندەتىمىز – رەيس سوڭىنا دەيىن ومىرلىك ماڭىزدى كورسەتكىشتەردى ساقتاۋ بولدى"، - دەيدى سول ۇشاقپەن ۇشقان الماتى №4 قالالىق كلينيكالىق اۋرۋحانا نەيروحيرۋرگيا بولىمشەسىنىڭ مەڭگەرۋشىسى نۇرجان اجىبەكوۆ.
نۇرجان اجىبەكوۆ – باس مي مەن ومىرتقاعا ەڭ كۇردەلى جوعارى تەحنولوگيالىق وپەراسيالار جاسالاتىن الماتى قالاسى №4 قالالىق اۋرۋحانانىڭ نەيروحيرۋرگيا بولىمشەسىنىڭ مەڭگەرۋشىسى. دارىگەر جىل سايىنعى ەڭبەك دەمالىسىنا شىعىپ، سول كۇنى وتباسىمەن دەمالىستان كەيىن ۇيىنە قايتىپ بارا جاتقان.
كۋاگەرلەردىڭ ايتۋىنشا، ۇشاقتا بولعان مامان مەن مەديسينا ۋنيۆەرسيتەتىنىڭ ستۋدەنتتەرى ايەلدىڭ جاعدايىن تۇراقتاندىرىپ، ەسىن جيعىزىپ، جاعدايىن باقىلاعان. ۇشاقتا كومەك كورسەتكەن س.د. اسفەندياروۆ اتىنداعى قازۇمۋ ستۋدەنتتەرىنىڭ ەسىمدەرى دە بەلگىلى: قاجىروۆ داۋلەت، جارقىن راحات جانە سايدا بارماعامبەتوۆا.
تۋىستارىنىڭ ايتۋىنشا، كۇلجامال راحمەتتۋللا قىزى الماتىعا كەلگەننەن كەيىن بىردەن اۋرۋحاناعا تۇسكەن، جاعدايى جاقسى.