«الەۋمەتتىك قورعاۋ جۇيەسىنىڭ ۇزدىك قىزمەتكەرى جانە ۇزدىك الەۋمەتتىك جوبا» اتتى رەسپۋبليكالىق بايقاۋدىڭ وڭىرلىك كەزەڭى اياقتالدى. ەلدىڭ بارلىق وڭىرلەرىنەن بايقاۋعا جەتى نوميناسيا بويىنشا 1041 ءوتىنىم كەلىپ ءتۇستى.
ساراپتاۋ ناتيجەسىندە رەسپۋبليكالىق كەزەڭگە 129 فيناليست ءوتتى، - دەپ حابارلايدى Aqshamnews.kz.
ق ر ەڭبەك جانە حالىقتى الەۋمەتتىك قورعاۋ مينيسترلىگى باستاماشى بولعان بۇل كونكۋرس الەۋمەتتىك سالا ماماندارىنىڭ بەلسەندىلىگىن جانە يننوۆاسيالىق باستامالارىن انىقتاپ، كوتەرمەلەۋدى، سونداي-اق ولاردىڭ كاسىبي بەدەلىن ارتتىرۋدى ماقسات ەتەدى.
الەۋمەتتىك قىزمەتكەر ماماندىعى – قوعامداعى ەڭ ىزگى ءارى ماڭىزى زور ماماندىقتاردىڭ ءبىرى. بۇل سالا ماماندارى كۇن سايىن ءومىردىڭ قيىن جاعدايىنا تاپ بولعان جاندارعا كومەك كورسەتەدى: جالعىزباستى قارتتار مەن مۇگەدەكتىگى بار ادامدارعا ۇيدە قىزمەت كورسەتەدى، وتباسىلارعا قولداۋ بىلدىرەدى، ارنايى الەۋمەتتىك قىزمەتتەر كورسەتەتىن ورتالىقتاردا جۇمىس ىستەيدى، ەلدىڭ ءال-اۋقاتى ءۇشىن باعا جەتپەس ۇلەس قوسادى. ەلىمىزدە جاريالانعان ەڭبەك ادامى جىلى اياسىندا بۇل كونكۋرس الەۋمەتتىك قىزمەتكەرلەردىڭ قوعامداعى ەڭبەگىنىڭ ماڭىزدىلىعىن ايقىنداپ، ولاردىڭ جانقيارلىق قىزمەتىنە قوعام نازارىن اۋدارۋدى كوزدەيدى.
رەسپۋبليكالىق كەزەڭگە جەتى نوميناسيا بويىنشا فيناليستەر ىرىكتەلدى. ەڭ كوپ قاتىسۋشى ۇسىنىلعان نوميناسيا – «ارناۋلى الەۋمەتتىك قىزمەتتەر كورسەتۋ ورتالىعىنىڭ ۇزدىك الەۋمەتتىك قىزمەتكەرى» نوميناسياسى بويىنشا 20 ۇمىتكەر ىرىكتەلدى. ال «ۇزدىك الەۋمەتتىك جوبا»، «ۇزدىك الەۋمەتتىك پەداگوگ»، «ەڭبەك موبيلدىلىگى ورتالىقتارىنىڭ ۇزدىك قىزمەتكەرى» جانە «ۇيدە كۇتىم كورسەتۋ ۇيىمىنىڭ ۇزدىك الەۋمەتتىك قىزمەتكەرى» نوميناسيالارىنىڭ ءارقايسىسىنان 19 فيناليست شىقتى. «ۇزدىك مەملەكەتتىك الەۋمەتتىك ينسپەكتور» نوميناسياسى بويىنشا 17 مامان، ال «ۇزدىك مەديسينالىق-الەۋمەتتىك ساراپتاما قىزمەتكەرى» نوميناسياسى بويىنشا 16 مامان ب ا ق سىنايدى.
بايقاۋعا ەلىمىزدىڭ بارلىق وڭىرلەرى بەلسەندى قاتىستى. ىرىكتەۋ قورىتىندىسى بويىنشا 13 ءوڭىردىڭ (استانا، الماتى قالالارى، اباي، اقمولا، الماتى، اتىراۋ، شىعىس قازاقستان، باتىس قازاقستان، قاراعاندى، قىزىلوردا، پاۆلودار، سولتۇستىك قازاقستان، تۇركىستان وبلىستارى) وكىلدەرى بارلىق جەتى نوميناسيادا ۇسىنىلدى.
كەلەسى كەزەڭدە دەپۋتاتتىق كورپۋس وكىلدەرى، قوعام قايراتكەرلەرى مەن الەۋمەتتىك سالا ساراپشىلارىنان قۇرالعان رەسپۋبليكالىق كوميسسيا 20 قازانعا دەيىن جەڭىمپازداردى انىقتايدى.
جەڭىمپازداردى ماراپاتتاۋ ءراسىمى 24 قازاندا، الەۋمەتتىك قامسىزداندىرۋ قىزمەتكەرلەرى كۇنى قارساڭىندا استانا قالاسىندا وتەدى.