ءۇندىستان قارۋلى كۇشتەرىمەن تاۋ دايىندىعى سالاسىنداعى ىنتىماقتاستىق 2005 جىلدان بەرى جۇرگىزىلىپ كەلەدى
تاۋ دايىندىعى ورتالىعىندا الپينيستىك جابدىقتاردى دۇرىس قولدانۋ، قوزعالىس تەحنيكاسى جانە تاۋلى جەرلەردە ۇرىس جۇرگىزۋ تاكتيكاسى بويىنشا جاتتىعۋ ساباقتارى وتكىزىلىپ جاتىر. جيىنعا ءۇندىستان رەسپۋبليكاسى قارۋلى كۇشتەرىنىڭ اسكەري قىزمەتشىلەرى نۇسقاۋشى رەتىندە كەلگەن، دەپ حابارلايدى Almaty-akshamy.kz ق ر قورعانىس مينيسترلىگىنىڭ باسپا ءسوز قىزمەتىنە سىلتەمە جاساپ.
«جيىننىڭ ماقساتى – اسكەري قىزمەتشىلەردىڭ تاۋلى جەرلەردە ساۋاتتى ءىس-قيمىل جاساۋ قابىلەتىن تەكسەرۋ، اسكەري الپينيستەردىڭ تاۋ كەدەرگىلەرىن ەڭسەرۋ داعدىلارىن جەتىلدىرۋ، اسكەري قىزمەتشىلەردىڭ فيزيكالىق تۇرعىدا توزىمدىلىك دەڭگەيىن ارتتىرۋ»، - دەلىنگەن ۆەدومستۆو مالىمدەمەسىندە.
جاۋىنگەرلەرگە الپينيستىك جابدىقتارمەن جۇمىس ىستەۋ، تاۋداعى جارتاستى جانە مۇزدى ۋچاسكەلەردى ەڭسەرۋ بويىنشا تاجىريبەلىك ساباقتار وتكىزىلەدى. جيىن بارىسىندا ىلە الاتاۋىنىڭ شىڭدارىنا كوتەرىلۋ جوسپارلانعان.
«ءۇندىستان قارۋلى كۇشتەرىمەن تاۋ دايىندىعى سالاسىنداعى ىنتىماقتاستىق 2005 جىلدان بەرى جۇرگىزىلىپ كەلەدى. قازاقستاندىق جاۋىنگەرلەر ءۇندى تاراپىنىڭ شاقىرۋىمەن تاجىريبە الماسۋ ماقساتىندا 2005 جىلى بيىكتىگى 7134 مەتر نۋن شىڭىنا، 2010 جىلى 6400 مەتر بيىكتىكتەگى باگەراتحي شىڭىنا بىرگە كوتەرىلگەن بولاتىن. 2018 جىلدان بەرى ءۇندى اسكەري نۇسقاۋشىلارى جىل سايىن تاجىريبە الماسۋ ءۇشىن قازاقستان قارۋلى كۇشتەرىنىڭ تاۋ دايىندىعى ورتالىعىنا كەلىپ تۇرادى»، - دەپ تولىقتىرادى مينيسترلىكتىڭ باسپا ءسوز قىزمەتى.
بۇعان دەيىن قازاقستان مەن رەسەي ءورت سوندىرۋشىلەرى بىرلەسكەن جاتتىعۋ وتكىزىپ جاتقانى حابارلانعان بولاتىن.