55 كوشكىن ءقاۋپى بار ۋچاسكە انىقتالعان
ناۋرىز ايىنىڭ باسىندا الماتى وبلىسىنىڭ تاۋلارىندا كوشكىن ءجۇرۋ ءقاۋپى ساقتالادى. بۇل تۋرالى الماتى وبلىسى تجد-دا ءمالىم ەتتى، دەپ حابارلايدى Almaty-akshamy.kz.
«الماتى وبلىسىنىڭ تاۋلارىندا 1-6 ناۋرىز ارالىعىندا كوشكىن ءجۇرۋ ءقاۋپى ساقتالادى. تجد ازاماتتاردان، تۋريستەردەن جانە دەمالۋشىلاردان قار كوشكىنىن تۋدىرۋى مۇمكىن بولعاندىقتان قارلى بەتكەيلەرگە شىقپاۋدى، سونداي-اق تاۋلى جەرلەردە بارلىق قاۋىپسىزدىك شارالارىن ساقتاۋدى سۇرايدى»،- دەلىنەدى حابارلامادا.
سونداي-اق ۆەدومستۆونىڭ مالىمەتىنشە، الماتى وبلىسىنىڭ اۋماعىندا ىلە-الاتاۋ تاۋلارىنىڭ وڭتۇستىك بەتكەيىندە ەڭبەكشىقازاق، تالعار جانە قاراساي اۋداندارىندا 55 كوشكىن ءقاۋپى بار ۋچاسكە بار.
«نەگىزىنەن قار كوشكىنىنىڭ ءتۇسۋى تەمپەراتۋرا فونىنىڭ جوعارىلاۋىنا جانە جاڭبىر مەن قار تۇرىندە مول جاۋىن-شاشىننىڭ تۇسۋىنە بايلانىستى بولادى»، - دەلىنگەن حابارلامادا.