سپورتشىلار جاپپاي بۇگىننەن قالماي ەكپە الۋدا
وليمپيادا ويىندارىنىڭ قارساڭىندا كوروناۆيرۋسقا قارسى ۆاكسينا وتە ماڭىزدى. ويتكەنى، كوماندانىڭ ءبىر مۇشەسى ينفەكسيا جۇقتىرسا، وندا بۇكىل ۇجىمنىڭ جۇمىسىنا ءقاۋىپ ءتونۋى مۇمكىن. سوندىقتان قازىرگى كەزدە الماتىدا كاسىبي سپورتشىلار جاپپاي ۆاكسينا الۋدا. بۇل تۋرالى "الماتى" حوككەي كلۋبىنىڭ شابۋىلشىسى ارتەم بۋردەليەۆ بىلاي دەيدى:
– سانالى عۇمىرىمدى سپورتقا ارناعان جانمىن. جارىستاردان قالمادىم. مەنىڭشە، سپورت الەمىندە مۇنداي شەكتەۋلەر بولعان ەمەس. ءبىزدىڭ كوماندا ىندەتكە دەيىن كۇن سايىن جاتتىعاتىن، ال كوروناۆيرۋستىڭ كەسىرىنەن بارلىق جاتتىعۋ پروسەسسى توقتادى. ەندى ۆاكسينانىڭ ارقاسىندا الاڭعا قايتا ورالىپ، ەركىن جاتتىعا الامىز.
وكىنىشتىسى، ادامدار ءالى دە ەكپە سالدىرۋعا سالعىرت قاراۋدا، بەتپەردە كيمەي، الەۋمەتتىك قاشىقتىقتى ساقتاماۋدا. مەن قالا تۇرعىندارىن ۆيرۋسقا قارسى كۇرەستە بىرىگۋگە، ۆاكسينا الۋعا شاقىرامىن.
جاقىندا ۆاكسينا الدىم جانە بۇل قاجەتتى شارا دەپ سانايمىن. يممۋنيتەتتى ارتتىرۋ، ونى ۆيرۋسپەن كۇرەسۋگە دايىن ەتۋ ماڭىزدى.
ءوز جانكۇيەرلەرىمە دە ايتارىم، ءبىز سىزدەردىڭ قولداۋلارىڭىزعا ءزارۋمىز. ءبىز ءۇشىن ۇجىمدىق يممۋنيتەتتى قالىپتاستىرۋ ماڭىزدى. سوندىقتان الىپقاشتى اڭگىمەلەر مەن تاراعان جالعان اقپاراتقا سەنبەڭىزدەر.
ءبىزدىڭ جەڭىسىمىزدى كورۋ ءۇشىن ۆاكسينا الىپ، حوككەيگە كەلىڭىزدەر!
نازىم قىزايباي، بوكستان ايەلدەر اراسىندا ەڭبەك سىڭىرگەن سپورت شەبەرى، ەكى دۇركىن الەم چەمپيونى:
– وتكەن جىلى باستالعان ىندەت مەنىڭ وليمپياداعا قاتىسۋىما، ەكىنشى ليسەنزيانى الۋىما كەدەرگى كەلتىردى. بۇل مەنىڭ ارمانىم ەدى. تاعى ءبىر كەمشىلىگى - سپورت زالدارى جابىلىپ، مەنىڭ ۇيدە جاتتىعۋىما تۋرا كەلدى. بيىل جاعداي وزگەردى. قالادا جاپپاي يممۋنداۋ باستالعاننان كەيىن كوروناۆيرۋسقا قارسى ەكپە الدىم. ءبىزدىڭ سپورتشىلارىمىز دا ۆاكسيناعا قارسى ەمەس. ەشقانداي ماجبۇرلەۋ بولعان جوق، بارلىعى دەنساۋلىقتى ساقتاۋعا، جاتتىعۋ پروسەسىن قالپىنا كەلتىرۋگە، زالدا جانكۇيەرلەردى كورۋگە مۇمكىندىك بەرەتىن قاجەتتىلىك ەكەنىن ءتۇسىندى. ينفەكسياعا تۇراقتى يممۋنيتەتى جوق ادامدار ۆاكسينا الۋى قاجەت. ءوز باسىم بوكسشىلاردىڭ اراسىندا العاشقىلاردىڭ ءبىرى بولىپ ۆاكسينا الدىم. ويتكەنى بۇل - COVID-19-عا قارسى كۇرەس!
تامارا پوچەكۋتوۆا، سەمسەرلەسۋدەن حالىقارالىق دارەجەدەگى سپورت شەبەرى:
– كوروناۆيرۋس ءبىزدىڭ وتباسىمىزدى اينالىپ وتپەدى، وتباسى مۇشەلەرى تۇگەل اۋىردى. مۇمكىن مەن ۆيرۋستىڭ تاسىمالداۋشىسى بولعان شىعارمىن، ءبىراق اۋرۋدى اسيمپتوماتيكالىق جولمەن باستان وتكەردىم. بۇل ىندەتتەن 85 جاستاعى اتام ۇزاق ۋاقىت اۋرۋحانادا ەمدەلدى. ول دارىگەرلەردىڭ قامقورلىعى مەن يممۋنيتەتىنىڭ ارقاسىندا جازىلىپ شىقتى. ۆاكسينا پايدا بولعاننان كەيىن اتام ەكپە الدى. ول بۇل شەشىمدى ءوز ەركىمەن قابىلدادى.
مەن ءالى ۆاكسينا العان جوقپىن، ءبىراق ەكپەنى قولدايمىن. بۇگىندە قاي ۆاكسينانى العان دۇرىس ەكەنىن تاڭداۋدامىن. بۇل - وتە ءقاۋىپتى اۋرۋ، سوندىقتان مەن ءوزىمدى، تۋىستارىمدى قورعاعىم كەلەدى. مەن ولاردىڭ ساۋ بولعانىن قالايمىن.
ىندەتكە بايلانىستى بىزدە كوپتەگەن جارىستار مەن جيىندار توقتاتىلدى. ءبىز وليمپياداعا دايىندالا المادىق، ءبىراق ليسەنزيا الۋىمىز كەرەك ەدى. ۆاكسينا – بۇل ادەتتەگى جاتتىعۋ ومىرىنە ورالۋدىڭ، جارىستارعا بارۋدىڭ، جاڭا جەڭىستەرگە جەتۋدىڭ جالعىز جولى.
وليمپياداعا دايىندىق ۇزاق ۋاقىت الادى. ەڭ ماڭىزدى جارىستارعا از ۋاقىت قالدى. سوندىقتان الماتى سپورتشىلارى بۇگىن ەكپە الادى. ءسىز دە ولارعا قوسىلىپ العىڭىز كەلسە، مەگاپوليستىڭ 208 ەكپە پۋنكتىنىڭ بىرىنە حابارلاسىڭىز. ولار مەديسينالىق ۇيىمداردا، مەكتەپتەردە، مادەنيەت، سپورت نىساندارىندا، بازار مەن قالانىڭ سوسو-دا ورنالاسقان.
16 ماۋسىمداعى جاعداي بويىنشا، 351 497 ادام ۆاكسينا سالدىردى. 60 جاستان اسقان 39 026 ادام ەكپە الدى.