قازاق مەملەكەتتىك سيركىنىڭ ارتىستەرى باتىر جانۇزاق، مارلەن ماراتوۆ جانە زارينا ديگاربەكوۆا تانىمال بريتاندىق Britai 's Got Talent («بريتانيا تالانت ىزدەيدى») تەلەشوۋىندا ونەر كورسەتتى. ولار كۇردەلى اكروباتيكالىق ءنومىردى ورىندادى، وندا قاتىسۋشىلاردىڭ ءبىرى باسپالداقپەن كوتەرىلدى، ال سەرىكتەس ونىڭ باسىنا سۇيەنىپ، ءبىر قولىمەن تىرەك جاسادى.
«وسى ۋاقىت ىشىندە ءبىزدىڭ جۇرەگىمىز قاتتى سوعۋمەن بولدى. اكروباتتار ءبىر-بىرىنىڭ ۇستىندە تەپە-تەڭدىكتى ساقتاي وتىرىپ، باسپالداقپەن كوتەرىلۋ كەزىندە ءبىزدى كەرەمەت شەبەرلىكتەرىمەن تاڭ قالدىردى. مۇنى ۇيدە قايتالاۋعا تىرىسپاڭىز»، - دەپ اتاپ ءوتتى جوبانى ۇيىمداستىرۋشىلار.
جوبانىڭ كورەرمەندەرى مەن قازىلار القاسى سايمون كوۋەلل، اماندا حولدەن، اليشا ديكسون جانە برۋنو تونيولي ارتىستەرگە قوشەمەت كورسەتتى. قازاقستاننان قاتىسۋشىلار 17 مامىردا وتەتىن جوبانىڭ ەكىنشى تۋرىنا ءبىراۋىزدان ءوتتى.
«ءبىزدىڭ ارتىستەرىمىز العاش رەت Britain's Got Talent ساحناسىندا سيرك نومىرىمەن ونەر كورسەتىپ، ەكىنشى تۋرعا ءوتتى. ءبىز وتە قۋانىشتىمىز جانە ولارعا ساتتىلىك تىلەيمىز. ولاردىڭ كەلەسى ءنومىرى دە وتە قىزىقتى بولادى جانە كورەرمەندەردى تاڭ قالدىرادى. جالپى، ءبىزدىڭ سيرك ارتىستەرى ءوز شەبەرلىكتەرىن ۇنەمى جەتىلدىرىپ، ەۋروپا مەن اقش-تا ونەر كورسەتىپ، ەلىمىزدى دارىپتەيدى. سونداي-اق، جاس ارتىستەر قالا اكىمدىگىنىڭ قولداۋىمەن ۇزدىك بەيىندى شەتەلدىك جوعارى وقۋ ورىندارىندا بىلىكتىلىگىن ارتتىرۋدان ءوتىپ، حالىقارالىق فەستيۆالدار مەن كونكۋرستارعا قاتىسادى»، - دەپ اتاپ ءوتتى الماتى قالاسى مادەنيەت باسقارماسىنىڭ باسشىسى عاني مايلىبايەۆ.
Britain's Got Talent - بۇل بريتاندىق تالانتتاردىڭ تانىمال رەاليتي-شوۋى. جوبا جەڭىمپازدارى اقشالاي سىيلىق پەن 2024 جىلدىڭ قاراشاسىندا لوندوندا وتەتىن Royal Variety Performance-تە ونەر كورسەتۋ مۇمكىندىگىنە يە بولادى.