وقۋ ماۋسىمىنىڭ اياقتالۋىنا تاياۋ.
جازعى دەمالىسقا شىققان جاستاردىڭ دەنى جۇمىس ىستەپ، ءناپاقا تابۋعا بەل بۋادى، دەپ حابارلايدى Almaty-akshamy.kz
ولاردىڭ ەڭبەككە ەرتە ارالاسۋىنا زاڭ نە دەيدى؟ ەندى-ەندى بوزبالا، بويجەتكەن اتاناتىن جاسوسپىرىمدەر ۋاقىتىن ءتيىمدى ءارى تابىستى وتكىزۋ ءۇشىن قانداي جۇمىس بار؟ بۇل جايىندا 24.kz ارناسى جۇرگىزگەن زەرتتەۋ ماتەريالىن نازارلارىڭىزعا ۇسىنامىز.
الەمدە 160 ملن ءجاسوسپىرىم بالالىق شاقتىڭ بەيقام كۇندەرىن جۇمىس ىستەپ وتكىزۋگە ءماجبۇر. بۇل دەگەنىڭىز ءاربىر ونىنشى بالا ەڭبەككە ەرتە ارالاسىپ، تالعاجاۋ اسىن تابان ەت، ماڭداي تەرىمەن ءوزى تابادى دەگەن ءسوز. ءتىپتى 73 ميلليونى اسا اۋىر جۇمىسقا جەگىلگەن. UNICEF ۇيىمى ۇسىنعان مالىمەت وسىلاي. بۇل بالا ەڭبەگىن قاناۋ ما، ەڭبەككە بەيىمدەپ، قاناتتاندىرۋ ما؟ بىزدە دە جاز شىقسا جاسوسپىرىمدەردىڭ جۇمىس كۇشىن پايدالاناتىندار كوبەيدى. ءقازىردىڭ وزىندە ەلەكتروندى ەڭبەك بيرجاسىندا 360 حابارلاما جاريالانعان. وندا مىڭنان اسا جۇمىس ورنى ۇسىنىلىپ، قىزمەتكە ورنالاسۋ ءۇشىن تاجىريبە دە، قاتىرما قاعازدىڭ دا قاجەتى جوق دەلىنگەن. ياعني، وڭ-سولىن تانىپ ۇلگەرمەگەن بالالاردى قابىلدايدى-مىس.
دەنى جازعى دەمالىسىندا كولىك جۋۋ ورىندارىندا، مەيمانحانالاردا قىزمەت ەتەتىندىگى دە جاسىرىن ەمەس. ال زاڭ جاسوسپىرىمدەردىڭ جۇمىس ىستەۋىنە شەكتەۋ قويمايدى. شەگىنەن شىقپاسا بولدى.
«ق ر ەڭبەك كودەكسىنىڭ تالاپتارىنا سايكەس 18 جاسقا تولماعان جۇمىسكەرلەرگە كەلەسىدەگىدەي ۋاقىت بەلگىلەنەدى. 14 جاستان 16 جاسقا دەيىنگى ارالىقتارداعى جۇمىسكەرلەرگە اپتاسىنا 24 ساعاتتان اسپاۋى كەرەك. 16-18 جاس ارالىعىنداعى ازاماتتارعا 36 ساعاتتان اسپاۋى كەرەك»، - دەيدى زاڭگەر اسقار استايەۆ.
ۋاقىتىن بوسقا وتكىزبەۋدى كوزدەگەندەر ءۇشىن مەملەكەتتىك جوبالار دا بار. سولاردىڭ ءبىرى – "جاسىل ەل" ەڭبەك جاساعى.
«جازعى ماۋسىمداعى نەگىزگى باستى مىندەت – جاستاردىڭ، جەتكىنشەكتەردىڭ بوس ۋاقىتىن ءتيىمدى ۇيىمداستىرۋ. وسى باعىتتاعى جىلدار بويى جۇرگىزىپ كەلە جاتقان بىرەگەي جوبا – "جاسىل ەل" ەڭبەك جاساعى. ونىڭ نەگىزگى ماقساتى – جاستاردى جۇمىسپەن قامتاماسىز ەتۋ ەمەس، سونىمەن قاتار جاستاردىڭ اراسىندا ەكولوگيالىق مادەنيەتتى قالىپتاستىرۋ جانە ەلدى مەكەندەردى اباتتاندىرۋ»، - دەيدى جاستار جانە وتباسى ىستەرى كوميتەتى ءتوراعاسىنىڭ ورىنباسارى ءبىرجان ءالىمجنوۆ.
بيىل بۇل جاساق ساپىندا 33 مىڭ جاستى جۇمىسپەن قامتۋ جوسپاردا بار. جوبا ۇيلەستىرۋشىلەر ماۋسىم-تامىز ايلارىندا وسىنشا جاسوسپىرىمگە 85 مىڭنان ەڭبەكاقى تولەۋگە دايىن. ول ءۇشىن بالا 14 جاستان اسقان بولسا جەتكىلىكتى. سونداي-اق، ءتۇرلى مەكەمەلەردە قوعامدىقتىق جۇمىس ىستەيتىندەر دە قۇرقول قالمايدى.
«جازعى ماۋسىمعا بايلانىستى ايتاتىن بولساق، دەمالىس ۋاقىتىندا 16 جاستان اسقان جاستار، ونىڭ ىشىندە ستۋدەنتتەر بولسىن، كوللەدج، مەكتەپ وقۋشىلارى بولسىن وسى قوعامدىق جۇمىسقا قاتىسۋعا تولىق مۇمكىندىگى بار. وسى جىلى ونىڭ جالاقىسى 40 اەك دەڭگەيىندە»، - دەيدى جاستار جانە وتباسى ىستەرى كوميتەتى ءتوراعاسىنىڭ ورىنباسارى ءبىرجان ءالىمجنوۆ.
بۇل دەگەنىڭىز 150 مىڭعا جۋىق اقشا. ياعني ەڭ تومەنگى جالاقىدان 60 مىڭ تەڭگەگە ارتىق.