الماتى مەن شانحاي تۋريزم سالاسىنداعى سەرىكتەستىكتى نىعايتىپ وتىر
حالىقارالىق ارىپتەستىكتى دامىتۋ جانە قالانىڭ تۋريستىك الەۋەتىن ىلگەرىلەتۋ ماقساتىندا الماتى اكىمدىگى قحر-نىڭ شانحاي قالاسىندا سەرىكتەستىك تۋريستىك الاڭ اشۋ باستاماسىن كوتەردى، دەپ حابارلايدى aqshamnews.kz
كەڭ اۋقىمدى جۇڭگو اۋديتورياعا باعىتتالعان بۇل سالتاناتتى اشىلۋ ءراسىمى 2025 جىلدىڭ ماۋسىم ايىندا Shanghai Plaza ىسكەرلىك ورتالىعىندا وتەدى. ءىس-شارا اياسىندا الماتى قالاسىنىڭ تۋريزم باسقارماسى مەن شانحايلىق تۋريستىك كومپانيا اراسىندا ءوزارا ىنتىماقتاستىق تۋرالى مەموراندۋمعا قول قويۋ جوسپارلانعان.
ازيانىڭ ەڭ ءىرى مەگاپوليستەرىنىڭ بىرىندە اقپاراتتىق-تۋريستىك الاڭ قۇرۋ — قىتايدان كەلەتىن ساياحاتشىلار ءۇشىن الماتىنى تارتىمدى باعىت رەتىندە ىلگەرىلەتۋدىڭ ماڭىزدى كەزەڭى بولماق. كەلۋشىلەرگە كورنەكى ەكسپوزيسيالار، مۋلتيمەديالىق ماتەريالدار، سونداي-اق، تۋريستىك باعىتتار، مادەني ءىس-شارالار، گاسترونوميالىق ەرەكشەلىكتەر جانە دەمالىستىڭ باسقا دا اسپەكتىلەرى بويىنشا جەكە كەڭەستەر ۇسىنىلادى.
سەرىكتەستىك الاڭنىڭ اشىلۋى قىتايدان كەلەتىن تۋريستەر لەگىنىڭ تۇراقتى وسۋىمەن تۇسپا-تۇس كەلىپ وتىر: 2024 جىلدىڭ وزىندە الماتىعا 95 مىڭنان استام قىتايلىق تۋريست كەلگەن. بۇل وتكەن جىلدىڭ كورسەتكىشىنەن 50%-عا ارتىق. جوبا الماتى مەن شانحاي اراسىنداعى گۋمانيتارلىق جانە ىسكەرلىك بايلانىستاردى كەڭەيتۋ تۋرالى كەلىسىم اياسىندا جۇزەگە اسىرىلادى. ەستەرىڭىزگە سالا كەتەيىك، 2024 جىلدىڭ قاراشا ايىندا ەكى قالا اراسىندا باۋىرلاس قالا مارتەبەسىن ورناتۋ جونىندە نيەت حاتىنا قول قويىلعان بولاتىن. بۇل كەلىسىمدى رەسمي تۇردە بەكىتۋ 2025 جىلعا جوسپارلانعان.
الماتى مەن شانحاي اراسىنداعى تىكەلەي اۋە رەيسىنىڭ اشىلۋى ەكىجاقتى ءتۋريزمدى دامىتۋعا قوسىمشا سەرپىن بەرەدى. China Eastern Airlines اۋە كومپانياسىنىڭ تۇراقتى رەيستەرى جاقىن ارادا باستالماق.
قىتايمەن تۋريستىك جانە ىسكەرلىك ىنتىماقتاستىقتى جان-جاقتى دامىتۋ جونىندەگى كەشەندى شارالار الماتىنىڭ حالىقارالىق ءيميدجىن نىعايتۋعا، شەتەلدەن كەلەتىن تۋريستەر لەگىن ارتتىرۋعا جانە مادەني الماسۋدى كەڭەيتۋگە مۇمكىندىك بەرەدى.