اقىل-وي دوداسىنا كىمدەر قاتىسادى؟
بيىلعى جىلدى الماتى قالاسى الەم چەمپيوناتىمەن جاپپاق. ناقتىراق ايتقاندا 25-30 جەلتوقسان ارالىعىندا وڭتۇستىك استانامىزدا شاحماتتىڭ راپيد جانە بليس ءتۇرى بويىنشا الەم چەمپيوناتى وتەدى. تامىرىن ءۇندى ەلىنەن الاتىن، اقىلدىلار ويىنى سانالعان لوگيكالىق ءوي-ورىستى دامىتاتىن سپورت تۇرىنەن وتەتىن الەمدىك الامانعا قانشا سپورتشى قاتىسادى؟ نەشە مەملەكەتتەن شاحماتشى كەلەدى، الەمدىك رەيتينگتىڭ كوشىن باستاپ تۇرعان سەركەلەر الاتاۋ باۋرايىنا ات بايلاي ما؟
وسى تاقىلەتتەس ساۋالدارعا ورتالىق كوممۋنيكاسيالار قىزمەتىندە وتكەن باسپا ءسوز ءماسليحاتىندا جاۋاپ ايتىلدى. جۋرناليستەر ساۋالدارىنا حالىقارالىق شاحمات فەدەراسياسىنىڭ (FIDE) پرەزيدەنتى اركاديي دۆوركوۆيچ، ق ر مادەنيەت جانە سپورت ۆيسە-مينيسترى سەرىك جاراسبايەۆ، «قازاقستان شاحمات فەدەراسياسى» رەسپۋبليكالىق قوعامدىق بىرلەستىگىنىڭ ۆيسە-پرەزيدەنتى دارمەن ءسادۋاقاسوۆ، «قازاقستان شاحمات فەدەراسياسى» رەسپۋبليكالىق قوعامدىق بىرلەستىگىنىڭ اتقارۋشى ديرەكتورى گۇلميرا داۋلەتوۆا، الماتى قالالىق سپورت باسقارماسىنىڭ باسشىسى ەردەن حايرۋللين سىندى سپيكەرلەر جاۋاپ بەردى.
الماتىدا شاحماتتان راپيد جانە بليستەن الەم چەمپيوناتى العاش رەت ۇيىمداستىرىلماق. بىرىنشىلىك الماتى اكىمدىگى جانە مادەنيەت جانە سپورت مينيسترلىگىنىڭ قولداۋىمەن وتەدى. سەرىكتەستەر اراسىندا «سامۇرىق-قازىنا» قورى جانە سپورتتى قولداۋ قورى «Sport Qory» بار.
«نەگىزى قازاقستاندا الەم بىرىنشىلىگى بىلتىر استانا قالاسىندا ءوتۋى ءتيىس ەدى، پاندەميانىڭ ەكپىن الىپ تۇرعانىنا بايلانىستى كەيىنگە ىسىرىلىپ، پولشا ەلىندە ءوتتى. بيىل، مىنە، قازاقستان قايتادان الەمدىك الاماندى وتكىزۋگە بەلشەشىپ وتىر. قازاقستان ەلىنە، ونىڭ ىشىندە الماتى قالاسىنىڭ اكىمدىگىنە، الەم بىرىنشىلىگىن وتكىزەتىن جاۋاپتى مينيسترلىك باسشىلارىنا، قازاقستان شاحمات فەدەراسياسىنا العىس ايتامىن» دەدى حالىقارالىق شاحمات فەدەراسياسىنىڭ پرەزيدەنتى ا.دۆوركوۆيچ.
«بۇل ءان بۇرىنعى اننەن وزگەرەك» دەمەكشى، شاحماتتان ەلىمىزدە بۇعان دەيىن دە الەم بىرىنشىلىگى وتكەن بولاتىن. ءبىراق استانا قالاسىندا 2019 جىلى ۇيىمداستىرىلعان الەم چەمپيوناتى كوماندالىق سايىس بولعاندىقتان، 100-گە تارتا سپورتشى قاتىسقان ەدى. بۇل جولى الەمنىڭ جەتپىسكە جۋىق ەلىنەن 300-گە تارتا الاتاۋ باۋرايىندا اپتا بويى اۋناپ-قۋناپ الەمدىك الاماننىڭ كورىگىن قىزدىرادى.
باسپا ءسوز ءماسليحاتىندا مادەنيەت جانە سپورت ۆيسە-مينيسترى سەرىك جاراسبايەۆ شاحماتتان جەكەلەي سايىس بويىنشا قازاقستاندا العاش رەت وتەتىن الەمدىك دودانىڭ ءباسى جوعارى بولاتىنىن العا تارتتى. حالىقارالىق شاحمات فەدەراسياسىمەن تىزە قوسىپ وتكىزەتىن الەم چەمپيوناتىندا جانكۇيەرلەر قىزدار قۇراماسىنا ەرەكشە ءۇمىت ارتادى. ويتەتىن دە ءجونى بار، ويتكەنى الەم چەمپيونى دەگەن اتاققا قول جەتكىزگەن ءبيبىسارا اساۋبايەۆا، جانسايا ابدىمالىك، دينارا ءسادۋاقاسوۆا سەكىلدى تاجىريبەلى شاحماتشىلاردان سىرت جاستار اراسىندا جارقىراي كورىنىپ، الەم چەمپيوناتىندا ولجا سالعان ءامينا قايىربەكوۆا، اسەل سەرىكباي، نازەركە نۇرعالي سەكىلدى ارۋلارىمىز دا جۇلدەدەن ۇمىتكەرلەر ساناتىندا.
«ەلىمىزدە وتەتىن الەم چەمپيوناتى جاس شاحماتشىلاردىڭ قاتارى كوبەبيۋىنە، وي مەن ورەنىڭ ويىنى سانالاتىن سپورتقا قىزىققان جاستاردى ىنتالاندىراتىن دودا بولادى دەپس ەنەمىن. الماتى قالاسىنا الەمدىك رەيتينگتىڭ كوشىن باستاپ تۇرعان الەم چەمپيوندارى كەلەدى. جانكۇيەرلەر شاحمات سپورتىنىڭ جۇلدىزدارىنىڭ ويىنىن تاماشالاپ، قولتاڭبا الىپ تىلدەسۋىنە دە مۇمكىندىك تۋادى دەپ ويلايمىن، بارقا قازاقستاندىقتاردى الەم چەمپيوناتىن تاماشالاۋعا، ەلىمىزدىڭ شاحمات شەبەرلەرىنە قولداۋ كورسەتۋگە شاقىرامىن»، - دەدى «قازاقستان شاحمات فەدەراسياسى» رەسپۋبليكالىق قوعامدىق بىرلەستىگىنىڭ ۆيسە-پرەزيدەنتى دارمەن ءسادۋاقاسوۆ.
ءبىزدىڭ ەلدىڭ شاحماتشىلارى بىرىككەن اراب امىرلىگىندە جاتتىعۋ جيىنىن وتكىزىپ جاتىر. «قازاقستان شاحمات فەدەراسياسى» رەسپۋبليكالىق قوعامدىق بىرلەستىگىنىڭ اتقارۋشى ديرەكتورى داۋلەتوۆا گۇلميرا حانىم قىزدار قۇراماسىنداعى ۇزدىكتەرىمىز جانسايا ابدىمالىك، ءبيبىسارا اساۋبايەۆا، دينارا ءسادۋاقاسوۆالار جەكە باپكەرلەرىمەن ازىرلىكتى پىسىقتاپ جاتىر. گۇلميرا داۋلەتوۆا حالىقارالىق شاحمات فەدەراسياسى الەم چەمپيوناتىن ۇيىمداستىرۋشى ەل ەسەبىندە ءبىزدىڭ ەلدەن 25 شاحماتشىنى قاتىستىرۋعا مۇمكىندىك بەرگەنىن قۋانا جەتكىزدى.
«بۇل دەگەنىڭىز - ءوسىپ كەلە جاتقان جاس شاحماتشىلارىمىزعا ءوزىنىڭ ورەسىن بايقاپ، شەبەرلىگىن شىڭداۋىنا وراسان زور مۇمكىندىك. اركاديي دۆوركوۆيچ باستاعان حالىقارالىق شاحمات فەدەراسياسىنا بىزگە سەنىم بىلدىرگەنى ءۇشىن العىس ايتامىز، الەمدىك دودانى جوعارى دەڭگەيدە وتكىزۋگە ازىرلىك ويداعىداي ءجۇرىپ جاتىر. الماتى تۋريستىك قالا ەكەنىن تاعى ءبىر مارتە پاش ەتەتىن شاراعا قازاقستاندىقتاردى دا بەلسەندى قاتىسۋعا شاقىرامىن»، - دەدى الماتى قالاسى سپورت باسقارماسىنىڭ باسشىسى.
ەردەن حايرۋللين الەم چەمپيوناتىنا قاتىساتىن سپورتشىلار مەن قوناقتاردى قارسى الۋعا ساقاداي-ساي دايىن ەكەنىن جەتكىزدى.
الەم چەمپيوناتىنىڭ سالتاناتتى اشىلۋ ءراسىمى 25 جەلتوقساندا بالۋان شولاق اتىنداعى سپورت سارايىندا وتەدى. اپتا بويى دوداعا تۇسەتىن شاحماتشىلاردىڭ جارىسى وسى سپورت كەشەنىندە وتەدى.
چەمپيوناتتىڭ باس سەرىكتەسى - Freedom Broker كومپانياسى، ول تولىعىمەن جۇلدە قورىن قامتاماسىز ەتتى. سونىمەن قاتار سەرىكتەستەر اراسىندا Lancaster Group، Shokan Ualikhanov School، كازاقستاندىق ستارتاپ Chess Legends، «تيولاين» كاسىپورنى بار.
قۋانىش راحمەت