اباي اتىنداعى قازاق ۇلتتىق وپەرا جانە بالەت تەاترىندا دج.ءپۋچچينيدىڭ «مادام باتتەرفلياي» ءۇش ءبولىمدى وپەراسى جاڭارتىلعان قويىلىممەن ساحنالىپ جاتىر.
اباي اتىنداعى قازاق ۇلتتىق وپەرا جانە بالەت تەاترىندا «مادام باتتەرفلياي» وپەراسىنىڭ جاڭارتىلىپ ساحنالانۋىنا وراي باسپاسوز-كونفەرەنسياسى ءوتتى. جيىنعا اباي اتىنداعى قازۇوبت ديرەكتورى نۇرباقىت بوكەباۆ، قويۋشى رەجيسسور ناتاليا كاگاديي، قويۋشى ديريجەر جانە اباي اتىنداعى قازۇوبت باس ديريجەرى ەربولات احمەدياروۆ، قويۋشى سۋرەتشى (سەنوگرافيا) ۆلاديمير ءپونوماروۆ قاتىستى.
- ءبىزدىڭ اباي اتىنداعى قازاق ۇلتتىق وپەرا جانە بالەت تەاترىندا بارىڭىزگە بەلگىلى، الەمدەگى ەڭ كوپ قويىلاتىن سپەكتاكلدەردىڭ ءبىرى – «مادام باتتەرفلياي» وپەراسى العاش رەت 1972 جىلى قويىلعان. ول كەزدە رەجيسسەرى ا.جدانوۆ، ال سۋرەتشى گۇلفايرۋس ىسمايىلوۆا بولدى. چيو-چيو-ساندى العاشقى بولىپ ءبىزدىڭ وپەرا سالاسىنىڭ كوريفەيلەرى – كۇلاش بايسەيىتوۆا، روزا جامانوۆا، راحيما جۇباتىروۆا ورىنداعان. ءبىر ەرەكشەلىگى سپەكتاكل العاشقى كۇننەن قازاق تىلىندە جۇرگەن. سول جىلداردان بەرى تولاسسىز ءجۇرىپ جاتقان سپەكتاكل قازاقستان كورەرمەندەرىنىڭ كوزايىمىنا اينالدى. سونشا ۋاقىت وتكەننەن كەيىن زامان تالابىنا ساي جاڭالاپ، قويىلىمعا ارنايى توقتالدىق. ول ءۇشىن سىرتتان كىسى شاقىرماي، ءوزىمىزدىڭ رەجيسسەر ناتاليا كاگادييگە تاپسىردىق، – دەدى اباي ات. قازۇوبت ديرەكتورى نۇرباقىت بوكەباۆ.
سونداي-اق، ول تەاتردىڭ كەلەسى جىلعا قويعان جوسپارلارىن دا ايتىپ ءوتتى:
- 2023 جىل اباي اتىنداعى قازاق ۇلتتىق وپەرا جانە بالەت تەاترىنا 90 جىل تولادى. وسىعان وراي، كەلەسى تەاتر ماۋسىمىن ۇلكەن فەستيۆالمەن اشۋ جوسپاردا بار. مادەنيەت جانە سپورت مينيسترلىگىنىڭ جوسپارى بويىنشا ءبىز جىلىنا 2-3 جاڭا قويىلىم قويۋىمىز كەرەك. سوندىقتان كەلەسى جىلى ءبىز «جۇمباق قىز» وپەراسىن قازاقشا ساحنالاۋ كوزدەلىپ وتىر. بالەتتەن «جيزەل» قويىلىمى بار. ءقازىر تەحنيكالىق مۇمكىندىكتەردى پايدالان وتىرىپ زامان تالابىن ساي قويىلىمدار كورسەتۋ – ءبىزدىڭ العا قويعان ماقساتتارىمىزدىڭ ءبىرى. سونىمەن قاتار، بىزدە بالالارعا ارنالاعان بالەتتەر جەتىسپەيدى. سول سەبەپتى «الداركوسە» بالەتىمەن تەاترىمىزدىڭ رەپەتۋارىن تولىقتىرۋدى جوسپارلاپ وتىرمىز، – دەدى ول.
سپەكتاكل رەجيسسەرى ن. كاگاديي ونى جاڭارتۋ بارىسىندا قانداي جۇمىستار ىستەلگەنىن حابارلادى.
- جالپى، تاڭعاجايىپ جاپونيا مادەنيەتىن كورسەتەتىن وپەرالار كوپ ەمەس. سوندىقتان «مادام باتتەرفلياي» قويىلىمىن جاڭارتۋ بارىسىندا قانداي دا ءبىر زامان جاڭاشىلدىعىنا تىم ارتىق بەرىلۋ دۇرىس بولماس ەدى. ءبىزدىڭ قولىمىزدا ءداستۇرلى كيىمدەرى بار ءداستۇرلى قويىلىم بولدى. ونداعى ۇلتتىق ەرەكشەلىكتى ساقتاي وتىرىپ، سپەكتاكلگە جاڭا كوزقاراسپەن قاراۋعا تىرىستىق. ول ءۇشىن جاپونيانىڭ «كابۋكي» جانە «نو» ءداستۇرلى تەاترلارىنىڭ ەلەمەنتتەرىن قولداندىق. ناقتى ايتقاندا، كيىم ۇلگىسىن جاساۋدا وسى تەاترلاردىڭ تاجىريبەسىنە سۇيەندىك. سونىمەن قاتار، «نو» تەاترى ءوز قويىلىمدارىندا بەتپەردە كيۋمەن ەرەكشەلەنەدى. ءبىز دە ەپيزودتاردىڭ بىرىندە جاپون بەتپەردەلەرىن قولداندىق. قوزعالىس (پلاستيكا) تۋرالى دا ايتپاي وتۋگە بولمايدى. جاپون ارتىستەرى مەن ەۋروپا ارتىستەرىنىڭ ساحنا قوزعالىسى بىر-بىرىنەن ەرەكشەلەنەدى. ءبىزدىڭ ونەرپازداردىڭ قوزعالىسى ولاردان بولەك. سوندىقتان ساحنا ءتىلى، ساحنا قوزعالىسىنا وسى قويىلىمدا اسا ءمان بەردىك، – دەدى قويۋشى رەجيسسور ناتاليا كاگاديي.
ايتا كەتكەن ءجون، «مادام باتتەرفلياي» وپەراسى – وپەرا ونەرىنىڭ وتە اسەرلى ءىنجۋ-مارجانى. اباي اتىنداعى قازاق ۇلتتىق وپەرا جانە بالەت تەاترىنىڭ ساحناسىندا جاڭا سەنوگرافياسى مەن كوستيۋمدەرى، بىرەگەي ينتەرپرەتاسياسى ۇيلەسىم تاپقان قويىلىم جاڭا نۇسقاسىنىڭ تۇساۋكەسەرى ءوتىپ، تەاتر رەپەرتۋارىندا قايتا جاڭعىردى. وپەرانىڭ سيۋجەتى – تاڭعاجايىپقا تولى ەلدەردىڭ ءبىرى، مادەنيەتى مەن ءداستۇرى ارقىلى ەرەكشەلەنەتىن جاپونيادا وتەدى.