14 جەلتوقساندا 2022 جىلى استانادا ءوزىنىڭ مەنشىكتى اۆياسيالىق-تەحنيكالىق ورتالىعىندا Air Astana اۋەكومپانيالار توبى 2022 جىلعى وپەراسيالىق قىزمەتىنىڭ ناتيجەلەرىن جاريالادى، دەپ حابارلايدى اlmaty-akshamy.kz.
Air Astana اۋەپاركى بيىل ءۇش Airbus A321LR ۇشاعىمەن تولىقتى. ەڭ جاڭا 10-شى A321LR بۇگىن تۇندە تىكەلەي گامبۋرگ زاۋىتىنان كەلدى. FlyArystan سونىمەن قاتار ءوز پاركىن ءۇش Airbus A320 ۇشاققا كوبەيتتى جانە جىل سوڭىنا دەيىن تاعى ءبىر Airbus A320neo ۇشاعى كەلمەك. بۇگىن اۋەكومپانيالار توبىنىڭ پاركىندە جالپى 42 ۇشاق بار. ولاردىڭ ورتاشا جاسى 5 جىل، بۇل الەمدەگى ەڭ جاڭا فلوتتارىنىڭ ءبىرى. كەلەسى جىلى Air Astana كومپانيالار توبىنىڭ پاركى التى ۇشاققا ۇلعايۋى جوسپارلانىپ جاتىر.
بيىل Air Lease كورپوراسياسىمەن 2025 جىلدان باستاپ وپەراسيالىق ليزينگكە ءۇش جاڭا كەڭ فيۋزەلياجدى Boeing 787-9 Dreamliner ۇشاعىن جەتكىزۋ تۋرالى كەلىسىمگە قول قويىلعان.
بۇگىنگى تاڭدا Air Astana اۋەكومپانياسىنىڭ مارشرۋتتىق جەلىسى 42 باعىتتى (27 حالىقارالىق جانە 15 ىشكى)، FlyArystan-نىڭ - 34 باعىتتى (8 حالىقارالىق جانە 26 ىشكى) قامتيدى. Air Astana بيىل يراكليون مەن بودرۋمعا جاڭا تۇراقتى رەيستەردى اشتى، سونىمەن قاتار الماتىدان بانگكوك پەن بەيجىڭگە رەيستەردى جانداندىردى. FlyArystan اقتاۋدان باكۋ مەن ىستامبۇلعا رەيستەردى ىسكە قوسىپ، شىمكەنت-كۋتايسي، اقتاۋ-دۋباي جانە شىمكەنت-دۋباي رەيستەرىن قالپىنا كەلتىردى. كەلەسى جىلى Air Astana اۋەكومپانياسى مەدينا مەن تەل-اۆيۆكە رەيستەردى اشۋدى جوسپارلاپ وتىر.
«بيىل مەرەيتويلىق جىلى Air Astana اۋەكومپانياسى FlyArystan-عا تيەسىلى ەكى Airbus A320 ۇشاعىنا C2-چەك تەحنيكالىق قىزمەت كورسەتۋدىڭ تەرەڭدەتىلگەن ءتۇرىن وزدىگىنەن ورىندادى. ءبىز 10-شى رەت «ورتالىق ازيا مەن تمد-داعى ۇزدىك اۋەكومپانيا» نوميناسياسى بويىنشا بەدەلدى Skytrax سىيلىعىنا يە بولدىق، بۇل جوعارى ساپا ستاندارتتارىنا ادال ەكەنىمىزدى دالەلدەدى. ءبىز بەتپە-بەت كەلگەن جاھاندىق جانە جەرگىلىكتى قيىندىقتارعا قاراماستان، جاڭا جەتىستىكتەردىڭ نەگىزىن قالاپ، ايماقتىق جانە حالىقارالىق نارىقتاردا ءوز ورنىمىزدى نىعايتا الدىق. ءبىزدىڭ پارككە Airbus A321LR جانە Boeing 787 سياقتى وزىق ۇشاقتارى قوسىلۋىمەن بولاشاعىمىز زور بولاتىنىنا كامىل سەنەمىز. مۇنىڭ ءبارى قىزمەتكەرلەرىمىزدىڭ كاسىبيلىگىسىز جانە تۇتىنۋشىلاردىڭ قولداۋىسىز مۇمكىن بولماس ەدى. 20 جىل بويى ءبىزدى تاڭداعاندارىڭىز ءۇشىن راقمەت»، - دەدى Air Astana توبىنىڭ پرەزيدەنتى پيتەر فوستەر.
اۋە كومپانياسى الداعى ۋاقىتتا دا كادرلاردى ىرىكتەۋ مەن وقىتۋعا ۇلكەن كوڭىل بولەتىن بولادى. اۋە تاسىمالداۋشى ۇشقىشتار مەن بورتسەرىكتەرگە مۇقتاج. ەكيپاجدى وزدىگىنەن دايىنداۋ ماقساتىندا قازاقستاندا العاش رەت استانادا تولىق ۇشۋ ترەناجەرىمەن، سونداي-اق Airbus A320 اپاتتىق-قۇتقارۋ راسىمدەرىن جاتتىقتىرۋعا ارنالعان ترەناجەرىمەن جابدىقتالعان وقۋ ورتالىعىن 2023 جىلعى ەكىنشى جارتىسىندا ىسكە قوسۋى جوسپارلانىپ جاتىر.
سونداي-اق، 2023 جىلدىڭ باسىندا 7 مەن 17 جاس ارالىعىنداعى دارىندى بالالارعا ارنالعان جولاقى گرانتىنىڭ الەۋمەتتىك باعدارلاماسىن ىسكە قوسۋى جوسپارلانۋدا. باعدارلاما بويىنشا بالالارعا جانە ولاردى الىپ جۇرۋشىلەرگە قازاقستاندا جانە شەتەلدە وتەتىن ءتۇرلى بايقاۋلار مەن جارىستارعا قاتىسۋ ءۇشىن تەگىن بيلەتتەر بەرىلەدى. باعدارلامانىڭ مەرزىمى مەن شارتتارى كەيىنىرەك حابارلانادى.