84 جىلجىمايتىن مۇلىك نىسانى قابىلداندى.
الماتىنىڭ كوممۋنالدىق مەنشىگىنە بيىل جاڭادان سالىنعان 84 جىلجىمايتىن مۇلىك نىسانى قابىلداندى. بۇل تۋرالى وڭىرلىك كوممۋنيكاسيالار قىزمەتىنىڭ ونلاين بريفينگىندە الماتى قالاسىنىڭ مەملەكەتتىك اكتيۆتەر باسقارماسىنىڭ باسشىسى ابزال ەگەمبەردييەۆ ايتتى، دەپ حابارلايدى Almaty-akshamy.kz.
مەملەكەت مەنشىگىنە بەرىلگەن نىساندار اراسىندا مەكتەپتەر، كوپ قاباتتى ۇيلەر، دەنە شىنىقتىرۋ-ساۋىقتىرۋ كەشەندەرى بار.
2022 جىلدىڭ 1 قاراشاسىنداعى جاعداي بويىنشا، قالانىڭ كوممۋنالدىق مەنشىگىنە جاڭادان سالىنعان 84 جىلجىمايتىن مۇلىك نىسانى قابىلداندى. ولاردىڭ اراسىندا جاڭا سالىنعان 18 ءبىلىم بەرۋ نىسانى (ونىڭ ىشىندە مەكتەپتەرگە جالعانىپ سالىنعان 14 جاپسارلاس قۇرىلىس)؛ 63 كوپ پاتەرلى تۇرعىن ءۇي جانە 3 دەنە شىنىقتىرۋ-ساۋىقتىرۋ كەشەنى بار.
«رەسپۋبليكالىق مەنشىكتەن كوممۋنالدىق مەنشىككە 99 جىلجىمايتىن مۇلىك نىسانى، بۇل - 88 پاتەر جانە مەكەنجاي بويىنشا 11 جىلجىمايتىن مۇلىك نىسانى قابىلداندى. 7 سىيعا تارتۋ شارتى بويىنشا 1 پاتەر، 2 عيمارات، 3 فۋتبول تۇرىندەگى انگار جانە باعدارلامالىق ءونىم قابىلداندى»، - دەپ اتاپ ءوتتى الماتى قالاسىنىڭ ماب باسشىسى.
بريفينگتە 2022 جىلدىڭ 1 قاڭتارىنان باستاپ 2022 جىلدىڭ 1 قاراشاسىنا دەيىن الماتى قالاسى اكىمدىگىنىڭ قاۋلىلارىنا سايكەس جاڭادان سالىنعان 32 ينجەنەرلىك نىسان قالانىڭ كوممۋنالدىق مەنشىگىنە قابىلدانعانى بەلگىلى بولدى. بۇل تىزىمدە سۋ جانە كارىز جەلىلەرى، قۇرىلىس جانە اۆتوكولىك جولدارىن رەكونسترۋكسيالاۋ نىساندارى، سىرتقى جارىقتاندىرۋ، تەلەفون جەلىلەرى مەن جول بەلگىلەرى، جىلۋ جەلىلەرى، ساياباق مۇلكى جانە ت.ب. بار.
سونىمەن قاتار، ابزال ەگەمبەردييەۆتىڭ ايتۋىنشا، 2019 جىلدىڭ 1 مامىرىنان باستاپ الماتى قالاسى بويىنشا مەملەكەتتىك ساتىپ الۋدىڭ جالعىز ۇيىمداستىرۋشىسى بولىپ الماتى قالاسىنىڭ مەملەكەتتىك اكتيۆتەر باسقارماسى تاعايىندالدى.
2022 جىلدىڭ 10 ايىندا جالپى سوماسى 254،6 ملرد تەڭگەگە 397 كونكۋرس جاريالاندى، ونىڭ ىشىندە: جۇمىستار بويىنشا، 177،7 ملرد تەڭگەگە 220 كونكۋرس؛ تاۋارلار بويىنشا 58،7 ملرد.تەڭگە سوماسىنا 49 كونكۋرس؛ قىزمەت كورسەتۋ بويىنشا 18،1 ملرد تەڭگە سوماسىنا 128 كونكۋرس. ساتىپ الۋدان تۇسكەن ۇنەمدەۋ 7،8 ملرد تەڭگەنى قۇرادى.