جەلىلەردى قالپىنا كەلتىرۋ جۇمىستارى بيىل اياقتالادى.
الماتى قالالىق موبيلدىلىك باسقارماسىنىڭ باسشىسى عاني مىرزاحانوۆ ونلاين بريفينگ بارىسىندا تروللەيبۋس پاركىن مودەرنيزاسيالاۋ تۋرالى ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
سپيكەردىڭ سوزىنشە، الماتىدا تروللەيبۋس جەلىلەرىن جاڭعىرتۋ جۇمىستارى جالعاسىپ جاتىر.
«172 شاقىرىم بايلانىس جەلىسى قايتا جاڭارتىلدى. 604 جاڭا تىرەك ورناتىلدى. جالپى، 38 كوشەدە جۇمىستار جۇرگىزىلمەك. جەلىلەردى قالپىنا كەلتىرۋ جۇمىستارى بيىل اياقتالادى»، - دەدى باسقارما باسشىسى.
سونىمەن قاتار، ول تروللەيبۋس پاركىن مودەرنيزاسيالاۋ اياسىندا 190 تروللەيبۋس ساتىپ الاتىنىن جەتكىزدى.
«10 قوسالقى ستانساسىن قايتا جاڭعىرتۋ جانە 190 تروللەيبۋس ساتىپ الۋ جوسپاردا. ەۋروپا قايتا قۇرۋ جانە دامۋ بانكىمەن (ەققدب) الدىن الا قارجىلاندىرۋ كەلىسىمىنە قول قويىلدى. بيىل 100 تروللەيبۋس ساتىپ الامىز. ولار جىل سوڭىنا دەيىن نەمەسە كەلەسى جىلدىڭ باسىندا قالاعا جەتكىزىلەدى. قالعان 90-ى ەكى جىل ىشىندە اكەلىنەدى»،-دەيدى عاني مىرزاحانوۆ.
ايتا كەتەيىك، 2021 جىلدىڭ تامىز ايىندا سەيفۋللين كوشەسىندەگى 1-ۆوكزالدان رايىمبەك داڭعىلىنا دەيىنگى تروللەيبۋستاردىڭ بايلانىس جەلىلەرى اۋىستىرىلدى.