الماتى اكىمىنىڭ ورىنباسارى مۇحيت ازىربايەۆ وڭىرلىك كوممۋنيكاسيالار قىزمەتى الاڭىندا مەگاپوليستە ءبىلىم بەرۋ، سپورت جانە دەمالىس ينفراقۇرىلىمىن دامىتۋ تۋرالى ايتىپ بەردى، دەپ حابارلايدى اlmaty-akshamy.kz
سپيكەردىڭ ايتۋىنشا، الماتىدا ءالى دە مەكتەپتەن تىس تەگىن ءبىلىم بەرۋمەن قامتۋ تومەن - جالپى كونتينگەنتتىڭ نەبارى 9%-ى.
«اتالعان ماسەلەنى شەشۋ ءۇشىن الاتاۋ جانە ناۋرىزباي اۋداندارىندا ەكى جاڭا وقۋشىلار سارايىنىڭ قۇرىلىسى باستالدى. ءارقايسىسىنىڭ قۋاتتىلىعى – 675 ادام. بۇل نىساندار قوسىمشا ءبىلىم بەرۋ جانە بالالاردىڭ بوس ۋاقىتىن وتكىزۋ باعدارلامالارىن جۇزەگە اسىرۋ ءۇشىن قولايلى جاعداي جاساۋعا مۇمكىندىك بەرەدى»، - دەدى اكىم ورىنباسارى.
بالاباقشالار مەن مەكتەپتەردەگى ورىن تاپشىلىعى ماسەلەسى دە بەلسەندى شەشىلۋدە.
مۇحيت ازىربايەۆ بيىل بيۋدجەت ەسەبىنەن ناۋرىزباي اۋدانىنىڭ «قالقامان-2»، الاتاۋ اۋدانىنىڭ «نۇركەنت»، «مادەنيەت» جانە «دارحان»، تۇركسىب اۋدانىنىڭ «قايرات» شاعىناۋداندارىندا بەس مەكتەپكە، سونداي-اق №9، 48، 191 - ءۇش مەكتەپكە قوسالقى قۇرىلىستىڭ سالىناتىنىن اتاپ ءوتتى.
«سايالى» جانە «زەردەلى» شاعىناۋداندارىندا بارلىعى 1100 وقۋشى ورىندى ەكى مەكتەپ، سونداي-اق قالانىڭ التى مەكتەبىنە - №59، 112، 148، 103، 65، 97 قوسالقى قۇرىلىس سالۋ جوسپارلانعان.
«مەكتەپكە دەيىنگى ءبىلىم بەرۋ نىساندارى بويىنشا ناۋرىزباي، الاتاۋ، اۋەزوۆ، جەتىسۋ جانە تۇركسىب اۋداندارىندا توعىز بالاباقشانىڭ جوبالىق-سمەتالىق قۇجاتتاماسىن دايىنداۋ جۇمىستارى جۇرگىزىلۋدە. 5 جىلعا دەيىنگى كەزەڭدە مەكتەپتەر مەن بالاباقشالارداعى تاپشىلىقتى جويۋ جوسپارلانۋدا»، - دەدى اكىمنىڭ ورىنباسارى.
ازىربايەۆ سپورت نىساندارىنا قاتىستى مىنالاردى حابارلادى.
«الاتاۋ اۋدانىندا 14 كورتقا ارنالعان تەننيس ورتالىعىنىڭ قۇرىلىسى اياقتالۋدا. ءبىرىنشى جارتىجىلدىقتا الاتاۋ، مەدەۋ جانە تۇركسىب اۋداندارىندا ءۇش دەنە شىنىقتىرۋ-ساۋىقتىرۋ كەشەنى (دسك) ىسكە قوسىلادى. ولارعا بارۋ بارلىق جاس ساناتتارى ءۇشىن، ونىڭ ىشىندە مۇمكىندىگى شەكتەۋلى ازاماتتار ءۇشىن قولجەتىمدى بولادى. دسك-دەرىندە ساناتىنا قاراي امبەباپ سپورت زالدارى، باسسەيندەر، ترەناجەر زالدارى، كۇشتىك دايىندىق، بوكس جانە حورەوگرافيا زالدارى، ۇستەل تەننيسىنە ارنالعان زالدار جانە شاحمات كلۋبى بولادى»، - دەدى سپيكەر.
سونىمەن قاتار، ونىڭ ايتۋىنشا، ناۋرىزباي، اۋەزوۆ، المالى جانە تۇركسىب اۋداندارىندا تاعى جەتى دسك جوبالانۋدا، ولاردىڭ قۇرىلىسى جىل سوڭىندا باستالادى.