قانداي وپەراسيالارعا سۇرانىس جوعارى؟
وڭتۇستىك استانادا جىل سايىن ءمامس ەسەبىنەن مىڭداعان قىمبات وپەراسيالار جاسالادى. جوعارى تەحنولوگيالاردىڭ كومەگىمەن جاسالاتىن مۇنداي وتالاردىڭ باعاسى كەم دەگەندە 1 ملن تەڭگە تۇرادى، ال ەڭ قىمبات وتا قۇنى 74 ملن تەڭگەگە جەتىپ جىعىلادى، دەپ حابارلايدى اlmaty-akshamy.kz.
وتكەن جىلى الماتىلىق دارىگەرلەر ءمامس قاراجاتى ەسەبىنەن 7 مىڭنان استام جوعارى تەحنولوگيالى وپەراسيا جاساعان. وعان قوردان 21،7 ملرد تەڭگە تولەنگەن بولسا، 2024 جىلى مۇنداي وتالارعا 25 ملرد تەڭگە ءبولىندى.
قوردىڭ الماتى فيليالى ماماندارى قالادا جاسالىپ جاتقان قىمبات ءارى ەڭ كوپ سۇرانىسقا يە وپەراسيالار تۋرالى ايتىپ بەردى. جۇرەككە قوسالقى يمپلانت جۇيەسىن ورناتۋ، قۇنى – 74،8 ملن تەڭگە.
باعاسى قىمبات بولىپ كەلەتىن وپەراسيالار كوشىن جۇرەكتىڭ سول جاق قارىنشاسىن اۋىستىرۋ (LVAD) وتاسى باستاپ تۇر. مۇنى سوزىلمالى جۇرە تاپشىلىعىمەن اۋىراتىن ناۋقاستاردى ەمدەۋدىڭ زاماناۋي ءتاسىلى ءارى جۇرەك الماستىرۋدىڭ بالاماسى دەۋگە بولادى.
سونى اپپارات جۇرەككە قان ايداۋعا كومەكتەسىپ، جۇرەك تاپشىلىعى بەلگىلەرىن جەڭىلدەتەدى. بۇل كەيبىر اۋىر ناۋقاستاردىڭ ءومىرىن ۇزارتۋدىڭ بىردەن-بىر جولى، دەيدى ماماندار. بۇرىن مۇنداي پاسيەنتتەر اعزانىڭ رەزەرۆى بىتكەنشە ءومىر سۇرۋگە ءماجبۇر بولسا، اپپاراتتىڭ كومەگىمەن قالىپتى ءومىر سۇرۋگە مۇمكىندىك الادى.
باعاسى وتە قىمبات تۇراتىن مۇنداي وتانى كەز-كەلگەن ەلدىڭ بيۋدجەتى كوتەرە بەرمەيدى. ال قازاقستاندا بۇل وپەراسيا ءمامس ەسەبىنەن جاسالىپ جاتىر.
اللوگەندىك گەموپوەتيكالىق ءدىڭ جاسۋشالارىن الماستىرۋ، قۇنى – 16،3 ملن تەڭگە.
ءدىڭ جاسۋشالارىن ترانسپلانتاسيالاۋ ءادىسى جۇلىنى زاقىمدانعان ناۋقاستاردى ەمدەۋ بارىسىندا قولدانىلادى.
سونداي-اق، اتالعان ءادىس وبىردى ەمدەگەن كەزدە زاقىمدانعان نەمەسە جويىلىپ كەتكەن قان جاسۋشالارىن الماستىرۋ ءۇشىن دە پايدالانىلىپ ءجۇر. ءمامس جۇيەسىنىڭ ارقاسىندا قولجەتىمدى بولىپ وتىرعان جاسۋشا الماستىرۋ وپەراسيالارىنىڭ تيىمدىلىگى 54-تەن 73 پروسەنتكە جەتىپ جىعىلۋى مۇمكىن، دەيدى ماماندار.
باۋىر الماستىرۋ، قۇنى – 8،3 ملن تەڭگە.
باۋىر الماستىرۋ – تاۋەكەلى جوعارى، ءقاۋىپتى وتالاردىڭ ءبىرى. سەبەبى باۋىر ادامنىڭ اعزا جۇيەسىنە جاپپاي اسەر ەتەتىن ماڭىزدى ورگان. ورگانيزمدە سۇزگى ءرولىن اتقاراتىن باۋىر الماستىرۋدا سايكەس كەلەتىن دونور تابۋ دا ۇلكەن ماسەلەنىڭ ءبىرى. الماستىرعاننان كەيىن ناۋقاس كۇتىنىپ، ۇزاق ۋاقىت وڭالتۋدان ءوتۋى ءتيىس.
وكىنىشكە وراي، قازاقستاندا باۋىرى زاقىمدانعان پاسيەنتتەر سانى از ەمەس. بۇل دەرت اسىرەسە، ەگدە جاستاعى ادامدار اراسىندا ءجيى كەزدەسەدى. بىلتىر الماتىدا 27 ناۋقاس ءمامس ەسەبىنەن باۋىر الماستىرعان.
اۆتوماتتى كارديوۆەرتەر نەمەسە دەفيبريللياتور ورناتۋ، قۇنى – 8 ملن تەڭگە.
الماتىلىق كلينيكالار اۋىر دەرت سالدارىنان جۇرەگى كەنەت توقتاپ قالۋ ءقاۋپى بار ناۋقاستارعا دەفيبريللياتور ورناتادى. جۇرەك تاپشىلىعىنا شالدىققان ناۋقاستار جۇرەگىنە ورناتىلعان اپپارات مونيتور ارقىلى قاشىقتان باقىلاۋ جۇيەسىنە قوسىلادى.
زاماناۋي تەحنولوگيا پاسيەنتتىڭ جاعدايىن الىستان باقىلاپ قانا قويماي، ەمدەۋ سحەماسىن رەتتەپ وتىرۋعا مۇمكىندىك بەرەدى. باقىلاۋ ناۋقاستىڭ تەلەفونىنا ورناتىلاتىن ارنايى قوسىمشانىڭ كومەگىمەن جۇرگىزىلەدى. بۇل اسىرەسە، شالعاي ايماقتاردا تۇراتىندىقتان رەسپۋبليكالىق ورتالىقتارعا ءجيى كەلىپ يمپلانتتى تەكسەرتە المايتىن ناۋقاستار ءۇشىن وتە ىڭعايلى.
ەلەكتروماگنيتتى ەستۋ اپپاراتىن ورناتۋ، قۇنى – 7،3 ملن تەڭگە.
شاعىن عانا ەلەكتروندى قۇرىلعى قۇلاعى ەستىمەي قالعان ادامداردىڭ ەستۋ قابىلەتىن قالپىنا كەلتىرۋگە مۇمكىندىك بەرەدى.
يمپلانت قۇلاقتىڭ زاقىمدانعان ىشكى بولىگىن اينالىپ ءوتىپ، ەستۋ جۇيكەسىن ستيمۋلياسيالايدى. ول ءوز كەزەگىندە ميعا يمپۋلس بەرىپ، ناتيجەسىندە قۇلاعى مۇلدە ەستىمەيتىن ناۋقاس ەستي باستايدى.
اورتا قاقپاقشاسىن الماستىرۋ، قۇنى – 6،5 ملن تەڭگە.
اورتا قاقپاقشاسىنىڭ تارىلۋى مەن جەتكىلىكسىز جۇمىس ىستەۋى ءجيى كەزدەسەتىن دەرت. كوپ جاعدايدا جۇمىس ىستەمەيتىن قاقپاقشا بيولوگيالىق نەمەسە مەحانيكالىق پروتەزبەن الماستىرىلادى.
وپەراسيا اعزاداعى قان اينالىمىن دۇرىستاپ، ءار ورگاندى جاسۋشالارمەن قامتاماسىز ەتەدى. وتانى تاجىريبەلى كارديوحيرۋرگ جاساعان جاعدايدا پاسيەنت 20-30 جىل بويى سول پروتەزبەن جۇرە بەرەدى.
باس پەن مويىن تامىرلارى ەمبوليزاسياسى (نەمەسە وككليۋزيا)، قۇنى – 5،8 ملن تەڭگە.
ەندوۆاسكۋليارلىق ەمبوليزاسيا انيەۆريزمگە شالدىققان تامىرلاردى ەمدەۋدىڭ ەڭ جەتىلدىرىلگەن ءادىسى. وتكەن جىلى الماتىلىق نەيروحيرۋرگتەر وسىنداي 586 وتا جاساعان.
ەمبوليزاسيا رەنتگەن اپپارات جانە كونتراست سۇيىقتىعىنىڭ كومەگىمەن جاسالادى.
نەيروحيرۋرگ رەنتگەن ارقىلى باقىلاي وتىرىپ تامىرعا كاتەتەر ەنگىزەدى، سودان سوڭ ارنايى قۇرىلعىنىڭ كومەگىمەن قان اينالىمىن رەتكە كەلتىرەدى.
ەكستراكورپورالدى ۇرىقتاندىرۋ (ەكۇ)، قۇنى – 1،2 ملن تەڭگە.
جاساندى ۇرىقتاندىرۋ قاتتى قىمبات بولماسا دا سوڭعى كەزدە ساقتاندىرىلعان ازاماتتار اراسىندا ۇلكەن سۇرانىسقا يە قىزمەت تۇرلەرىنىڭ ءبىرى. جىل سايىن ەلىمىزدە ءمامس ەسەبىنەن ەكستراكورپورالدى ۇرىقتاندىرۋعا 7000 كۆوتا بولىنەدى، ونىڭ 3241ء-ى – الماتىعا تيەسىلى.
ەكستراكورپورالدى ۇرىقتاندىرۋ – كەيىنگى كەزدە ۇرپاق اكەلەتىن جاستاعى ايەلدەر مەن ەرلەر اراسىندا بەلەڭ الىپ بارا جاتقان بەدەۋلىك پروبلەماسىنا قارسى كۇرەستىڭ ەڭ ءتيىمدى ءتاسىلى دەۋگە بولادى.