الماتى قالاسىنىڭ تۇرعىنى اسا ءىرى كولەمدە ەسىرتكى ساقتاعانى ءۇشىن ۇستالدى

الماتى پوليسياسى زاڭسىز اينالىمنان ەسىرتكىنىڭ ءىرى پارتياسى مەن قارۋدى تاركىلەدى.

پوليسيا قىزمەتكەرلەرى 52 جاستاعى ر. ەسىمدى ازاماتتىڭ پاتەرىنەن ەسىرتكىمەن قاتار، جاسىرىن ءتۇسىرىلىم مەن تەلەفوندى تىڭداۋعا ارنالعان ارنايى جابدىقتى تاپتى، دەپ حابارلايدى Almaty-akshamy.kz Polisia.kz-كە سىلتەمە جاساپ. 

سول جەردە وسا تراۆماتيكالىق تاپانشا، پنيەۆماتيكالىق اۆتومات جانە قىرلى قارۋدىڭ بەلگىلەرى بار التى ءتۇرلى پىشاق تابىلدى. 

«كۇدىكتىنىڭ پاتەرىن ءتىنتۋ كەزىندە 2 كەلىدەن استام ەرەكشە ءيىسى بار قوڭىر ءتۇستى زات، سونداي-اق قوڭىر ءتۇستى ەرەكشە ءيىسى بار تۇقىم تۇرىندەگى زات سالىنعان پوليەتيلەن بۋماسى تابىلدى جانە تاركىلەندى. بولجام بويىنشا ماسەلە گاشيش ەسىرتكىسى مەن قاراسورا تۇقىمى تۋرالى بولىپ وتىر. ەسىرتكى قىلمىسى جانە قارۋ ساقتاۋ دەرەگى بويىنشا سوتقا دەيىنگى تەرگەۋ امالدارى تىركەلدى. تەرگەۋ بارىسىندا كۇدىكتىنىڭ بۇرىن سوتتى بولعانى دا ەسكەرىلەتىن بولادى»، – دەدى الماتى قالالىق پد ەسىرتكى قىلمىسىنا قارسى كۇرەس باسقارماسىنىڭ باستىعى ەرلان الماعامبەتوۆ.

ءقازىر تەرگەۋ كۇدىكتىنىڭ ءشوپتى قايدان العانىن جانە ونى نە ءۇشىن ساقتاعانىن انىقتاپ جاتىر.  سونىمەن قاتار قارۋ-جاراق پەن ارنايى تەحنيكالىق قۇرالداردى ساقتاۋ ماقساتى بەلگىلى بولادى.