دەپۋتات شاردارا سۋ قويماسىن جەدەل تەكسەرۋدى سۇرادى

قۇدايبەرگەن ەرجان باس پروكۋروردىڭ اتىنا دەپۋتاتتىق ساۋال جولدادى.

ءماجىلىس دەپۋتاتى قۇدايبەرگەن ەرجان شاردارا سۋ قويماسىندا سۋ تاسقىنى ءقاۋپى بارىن ەسكەرتتى، دەپ حابارلادى Almaty-akshamy.kz Halyq Uni-نە سىلتەمە جاساپ.

ونىڭ ايتۋىنشا، باق-تا شاردارا سۋ قويماسىنىڭ تولىپ كەتۋ جانە سىرداريا وزەنىنىڭ بويىنداعى ەلدى مەكەندەردى سۋ باسۋ ءقاۋپى تۋرالى اقپارات جاريالانىپ جاتىر.

«سايلاۋشىلاردان وسى جونىندە حاتتار دا، قوڭىراۋ دا كەلىپ تۇسۋدە. حالىق قورقىپ، ۇرەيلەنىپ وتىر. ساردوبا سۋ قويماسىنىڭ جويىلۋىنىڭ سالدارى ءالى ۇمىتىلعان جوق. ولار شاردارا سۋ قويماسىنىڭ ودان بىرنەشە ەسە اسىپ تۇسەتىنىن جاقسى تۇسىنەدى»، - دەدى ول باس پروكۋرورعا جولداعان دەپۋتاتتىق ساۋالىندا.

قۇدايبەرگەن ەرجاننىڭ ايتۋىنشا، «شاردارا» سۋ ەلەكتر ستانسياسىنىڭ جۇمىسى جابدىقتار مەن قۇرىلىسقا تەرىس اسەر ەتەتىن شەكتى نورمادان اسقان. دەپۋتات باس پروكۋرور بەرىك اسىلوۆتان نىساندى تەكسەرۋدى سۇرادى.

«جاعالاۋدى بۇزادى جانە كوپىرلەردى جۋادى. بۇل شارۋالاردىڭ ەگىستىگىندە جەر استى سۋىنىڭ كوبەيۋىنە اكەلەدى. بەرىك نوعاي ۇلى، سىزدەن وسى ماسەلەلەردى قاتاڭ نازارعا الىپ، حالىق يگىلىگىن قورعاۋ ءۇشىن ءتيىستى شارالار قابىلداۋىڭىزدى سۇرايمىن، - دەدى دەپۋتات.

ايتا كەتەيىك، شاردارا سۋ قويماسى تۇركىستان وبلىسىندا ورنالاسقان. قويمانىڭ جالپى سىيىمدىلىعى – 5 ملرد 200 ملن تەكشە مەتر.