وزبەكستاندا سوتتالعان قازاقستاننىڭ 20 ازاماتى بار.
ءماجىلىستىڭ جالپى وتىرىسىندا «قازاقستان مەن وزبەكستان اراسىنداعى باس بوستاندىعىنان ايىرۋعا سوتتالعان ادامداردى جازاسىن ودان ءارى وتەۋ ءۇشىن بەرۋ تۋرالى شارتتى راتيفيكاسيالاۋ تۋرالى» زاڭى قابىلداندى، دەپ حابارلايدى Almaty-akshamy.kz.
«بۇل شارت ەلىمىزدىڭ كونستيتۋسياسىندا بەكىتىلگەن تالاپتاردى جۇزەگە اسىرۋعا باعىتتالعان. ەلىمىزدەن تىس اۋماقتا جۇرگەن ازاماتتاردى قورعاۋعا جانە ولارعا قامقورلىق جاساۋعا كەپىلدىك بەرىلگەن. ەكى ەلدىڭ اراسىنداعى شارت اتالعان نورمالاردى ىسكە اسىرۋعا باعىتتالعان. وسى ماندەگى نورما وزبەكستان كونستيتۋسياسىندا دا بار. بۇل كەلىسىم ەكى ەلدىڭ بىر-بىرىنە دەگەن سەنىمىنىڭ بەلگىسى. اتالعان قۇجاتقا قول قويۋ ءۇشىن بىرنەشە جىل كەلىسسوز جۇرگىزىلدى. شارتقا قول قويماس بۇرىن ەكى ەل اراسىنداعى ميگراسيالىق پروسەسس جانە قىلمىستىق احۋال زەردەلەندى»، - دەدى ق ر باس پروكۋرورىنىڭ ورىنباسارى اسەت شىندالييەۆ.
وسى ورايدا ول بۇل شارتتىڭ الەۋمەتتىك ماڭىزى بار ەكەنىن ايتتى.
«وتباسى مۇشەلەرىمەن، جاقىندارىمەن كەزدەسىپ تۇرسا، سوتتالعان ادامعا وڭ ىقپال ەتەتىنى ءسوزسىز. سوتتالعانداردى تۇزەتۋ ماقساتى تەك قانا ونى جازالاۋ ەمەس، سونىمەن بىرگە تاربيەلىك ىقپال ەتۋ، الەۋمەتتىك بايلانىستاردى ساقتاۋ. شارت ەرەجەسىنە توقتالساق، سوتتالعان ادامدى بەرۋ ءۇشىن، ەڭ الدىمەن، ونىڭ كەلىسىمى قاجەت. ول جازاسىن ءوز ەلىندە وتەيتىنى تۋرالى ءوتىنىش بەرۋى ءتيىس. ءقازىر بىزدە سوتتالعان 225 وزبەكستان ازاماتى ءوز ەلىندە جازاسىن وتەۋ تۋرالى ءوتىنىش ءبىلدىرىپ وتىر. ياعني وسى ماسەلە بويىنشا سوتتالعاندار اراسىندا ارنايى ساۋالناما جۇرگىزگەنبىز»، - دەدى باس پروكۋروردىڭ ورىنباسارى.
سونىمەن قاتار ول وزبەكستاندا سوتتالعان قازاقستاننىڭ 20 ازاماتى بار ەكەنىن ايتتى.
«21 مەملەكەتپەن وسىنداي شارتتى بەكىتتىك. قۇجات بيۋدجەتتەن قوسىمشا قاراجات تالاپ ەتپەيدى. ونى جۇزەگە اسىرۋ ەكونوميكالىق، الەۋمەتتىك جانە قۇقىقتىق تەرىس سالدارعا اكەپ سوقپايدى»، - دەدى ءا.شىندالييەۆ.