الماتى قالاسىنىڭ بوستاندىق اۋدانىندا كوتتەدج سالۋ تۋرالى ءىس سوتقا بەرىلدى

بۇگىن الماتى اكىمى ەربولات دوسايەۆ بوستاندىق اۋدانى تۇرعىندارىمەن كەزدەستى. 

ونىڭ بارىسىندا اۋدان تۇرعىندارى باسشىلىققا وزدەرىن تولعاندىرعان جايتتارعا قاتىستى سۇراقتارىن قويدى، دەپ حابارلايدى Almaty-akshamy.kz.

اۋدان تۇرعىندارىنىڭ ءبىرى:

«مەن بوستاندىق اۋدانىندا "الاتاۋ-2" باۋ-باقشا سەرىكتەستىگىندە تۇرامىن. مەندە بۇرىنعى سايدىڭ ورنىندا Baganashil Hills كوتتەدج قالاشىعىن سالۋ تۋرالى سۇراعىم بار. 15 جىل بۇرىن بۇل جىرا تولتىرىلدى. ەندى ولار كوتتەدج قالاشىعىن سالۋدى جوسپارلاپ وتىر - 74 كوتتەدجدى. قۇرىلىستىڭ  سالدارىنان كەيبىر كورشىلەردىڭ ۇيلەرىنىڭ قابىرعالارى جارىلىپ جاتىر. بىرنەشە جىلدان كەيىن بۇل بارلىعىنا قيىندىق تۋدىرۋى مۇمكىن، ويتكەنى جىرا – قۇرعاعان وزەن ارناسى. بۇل سۋ قايتا اعۋى مۇمكىن، ونى كەز كەلگەن سۋ مامانى راستاي الادى»، - دەگەن ماسەلەنى كوتەردى.  

وعان الماتى قالاسى قالا قۇرىلىسىن باقىلاۋ باسقارماسىنىڭ باسشىسى باقىتجان ناۋرىزبەكوۆ:

«بۇگىنگى كۇنى ءبىز  قۇرىلىستى بۇزۋ ءۇشىن سوتقا جۇگىندىك. وندا 10-عا جۋىق نىساننىڭ - جتق، ەكى قاباتتى ۇيلەردىڭ قۇرىلىسى زاڭسىز باستالدى. قۇرىلىسقا تىيىم سالۋ بويىنشا تالاپ-ارىز دايىندالۋ ۇستىندە»، - دەپ جاۋاپ بەردى.