سپورتتىق گيمناستيكادان ەل ۇزدىكتەرى الماتىعا جينالدى

الماتىدا سپورتتىق گيمناستيكادان كەزەكتى، ياعني، 6-شى جازعى سپارتاكيادا باستالدى.

4 جىلدا ءبىر وتەتىن بايراقتى باسەكەگە 100-گە جۋىق قاتىسۋشى جينالدى. ياعني، ەرلەر اراسىندا 40، ايەلدەر اراسىندا 50 سپورتشى ءوزارا مىقتىنى انىقتايدى. جارىس 3 كۇنگە سوزىلادى، دەپ حابارلايدى Almaty-akshamy.kz 24.kz-كە سىلتەمە جاساپ. 

وسى ارالىقتا بىرنەشە جاس دەڭگەيى بويىنشا جەڭىمپازدار انىقتالادى جانە جالپى ەسەپتەگى ۇزدىك ايماقتار دا بەلگىلى بولادى. كەيىن جاقسى ناتيجە كورسەتىپ، ەرەكشە كوزگە تۇسكەن سپورتشىلاردان قوس بىردەي ۇلتتىق قۇراما جاساقتالماق. ياعني، العاشقىسى جازدا قىتايداعى ازيا ويىندارىنا قاتىسسا، كەيىنگىسى كۇزدە بەلگياداعى الەم چەمپيوناتىندا ەل نامىسىن قورعايدى. ايتا كەتەيىك، الەم چەمپيوناتىندا الداعى پاريج وليمپياداسىنىڭ جولدامالارى ساراپقا سالىنادى.

«جارىس جاقسى دەڭگەيدە ءوتىپ جاتىر. ەڭ باستىسى – جاراقات العاندار جوق. جىل وتكەن سايىن ەلدەگى سپورتتىق گيمناستيكانىڭ دەڭگەيى ءوسىپ كەلەدى. وسى باسەكەلەر قورىتىندىسى بويىنشا جەڭىمپازدارعا سپورتتىق اتاقتار بەرىلەدى. بۇعان قوسا، حالىقارالىق، قۇرلىقتىق جانە الەمدىك الاماندارعا قاتىسۋعا مۇمكىندىك اشىلادى»، - دەيدى سپورتتىق گيمناستيكادان قازاقستان ايەلدەر قۇراماسىنىڭ باس باپكەرى ناديرا يۋنۋسوۆا.