جاڭا بالاباقشا الماتىنىڭ بوستاندىق اۋدانىندا مەكتەپكە دەيىنگى مەكەمەلەرىندەگى ورىن تاپشىلىعىن تورتتەن بىرىنە ازايتۋعا مۇمكىندىك بەرەدى..
الماتى قالاسىنىڭ بوستاندىق اۋدانىندا 480 ورىندىق جاڭا بالاباقشا سالىنادى، دەپ حابارلايدى Almaty-akshamy.kz.
الماتى قالاسىنىڭ 2021-2025 جىلدارعا ارنالعان دامۋ جوسپارىن ىسكە اسىرۋ اياسىندا بوستاندىق اۋدانىنداعى وربيتا-3 شاعىن اۋدانىندا 480 ورىندىق جاڭا بالاباقشا اشىلادى. الماتى اكىمى ەربولات دوسايەۆ جۇمىس ساپارى بارىسىندا مەكتەپكە دەيىنگى مەكەمەنى سالۋ جونىندەگى جوسپارمەن تانىستى. بالاباقشا 2 گا الاڭدا ورنالاسقان 2 عيماراتتان تۇراتىن بۇرىنعى №1 بالالار ءۇيىنىڭ ورنىندا سالىنادى.
نىسان 2021 جىلى كوممۋنالدىق مەنشىككە بەرىلدى. قۇرىلىس باسقارماسى ءبىلىم باسقارماسىمەن بىرلەسىپ عيماراتتى قايتا قۇرۋ تۋرالى شەشىم قابىلدادى. قۇرىلىس باسقارماسىنىڭ باسشىسى الماس شابداربايەۆ قالا باسشىسىنا جوباعا سايكەس نىساندا ءۇي-جايلاردى قايتا جوسپارلاۋ، تىرەك كونسترۋكسيالارىن كۇشەيتۋ، قولدانىستاعى گالەرەيانى بۇزۋ جانە اۋماقتى اباتتاندىرۋ قاراستىرىلعانىن باياندادى.
بۇرىنعى بالالار ءۇيىنىڭ بوس تۇرعان عيماراتىن بالاباقشاعا قايتا جاڭارتۋ مەكتەپكە دەيىنگى مەكەمەلەردەگى ورىن تاپشىلىعىن 25% - عا تومەندەتۋگە مۇمكىندىك بەرەدى. قازىرگى ۋاقىتتا بوستاندىق اۋدانىندا 2 مىڭنان استام بالا بالاباقشاعا كەزەكتە تۇر.
قالا باسشىسى مەردىگەردى انىقتاۋ ءراسىمىن جەدەلدەتۋدى جانە اعىمداعى جىلدىڭ سوڭىنا دەيىن كونكۋرس وتكىزۋدى تاپسىردى. قۇرىلىستىڭ نورماتيۆتىك مەرزىمى - 12 اي. وسىلايشا، نىساندى تاپسىرۋ مەرزىمى 2024 جىلدىڭ سوڭى مەن 2025 جىلدىڭ باسىنا بەلگىلەنگەن.
انىقتاما:
بوستاندىق اۋدانىندا اعىمداعى جىلى 603 ورىندىق قوسىمشا 15 جەكە بلباباقشا اشىلدى. "اكۆارەل" تۇرعىن ءۇي كەشەنىندە اعىمداعى جىلدىڭ ءبىرىنشى جارتىجىلدىعىندا 300 ورىندىق №189 بالاباقشا پايدالانۋعا بەرىلدى. ناۆوي كوشەسىندەگى №113 بوبەكجاي عيماراتىن سەيسميكالىق كۇشەيتۋ جانە كۇردەلى جوندەۋ جۇمىستارى اياقتالادى.