ەربولات دوسايەۆ الماتىداعى بۇرالقى يتتەردى ۇستاۋ ماسەلەسىنە توقتالدى، دەپ حابارلايدى Almaty-akshamy.kz
بوستاندىق اۋدانى تۇرعىنىنىڭ سۇراعى: - ەربولات اسقاربەك ۇلى، تۇڭعىش پرەزيدەنت ساياباعىنداعى بۇرالقى يتتەردىڭ ماسەلەسىن شەشۋگە كومەك بەرسەڭىز. بالالارمەن بىرگە جۇرۋگە قورقامىز.
الماتى اكىمى ەربولات دوسايەۆتىڭ جاۋابى:- بۇل ماسەلەنى مۇمكىندىگىنشە شەشەمىز. بيىل قالادا 200 ورىندىق يتتەردى ۋاقىتشا ۇستاۋ پۋنكتى اشىلدى، وسى جۇمىستى جالعاستىرۋدى جوسپارلاپ وتىرمىز.
بۇرالقى جانۋارلاردى چيپتەيدى، ەمدەيدى، ءبىراق ۇزاق ۋاقىت ۇستاي المايدى. زاڭ بويىنشا بىزدە ورتالىقتاندىرىلعان قىزمەت بولۋى كەرەك. اۋداندىق اكىمدىكتەر بۇل ماسەلەلەردى ءوز بەتىنشە شەشە المايدى. بۇل ماسەلەنى قالالىق ءماسليحاتتا تالقىلاۋ جوسپارلانىپ وتىر.
ايتا كەتەيىك، 2023 جىلدىڭ اقپان ايىندا الماتىدا ءۇي جانۋارلارىن ۇستاۋ مەن سەرۋەندەتۋدىڭ جاڭا ەرەجەسى كۇشىنە ەندى. 2022 جىلدىڭ ناۋرىزىنا دەيىن ۇستالعان جانۋارلاردىڭ يەسى تابىلعانعا دەيىن ءۇش كۇن بويى ارنايى ورىندا بولادى، ال ەشكىم ىزدەمەگەن جانۋارلار دارى-دارمەكپەن جانسىزداندىرىلادى. ەندى بۇرالقى يتتەر ۋاقىتشا ۇستاۋ پۋنكتىندە تورعا نەمەسە ۇيشىككە ورنالاستىرىلىپ، جۇقپالى اۋرۋلارعا دياگنوستيكالىق زەرتتەۋلەر جۇرگىزىلەدى. تىركەلگەننەن كەيىن جانۋارلاردىڭ فوتوسۋرەتتەرى @اulau_kyzmeti Instagram پاراقشاسىندا جاريالانادى.
ۇۇۆب (ۇستاۋ-ۇرىقسىزداندىرۋ-ۆاكسيناسيا-بوساتۋ) باعدارلاماسى اياسىندا سۇراۋى جوق جانۋارلار اگرەسسياعا تەكسەرىلگەننەن كەيىن بيركا تاعىلىپ، بۇرىنعى جەرىنە جىبەرىلەدى.