الماتىنىڭ بوستاندىق اۋدانىندا 4 مىڭ ورىندىق ەكى «جايلى مەكتەپ» پايدا بولادى
بوستاندىق اۋدانىنىڭ تۇرعىندارىمەن كەزدەسۋ بارىسىندا الماتى اكىمى ەربولات دوسايەۆ الەۋمەتتىك ينفراقۇرىلىم نىساندارىن دامىتۋ بويىنشا جۇرگىزىلىپ جاتقان جۇمىستار تۋرالى ايتىپ بەردى، دەپ حابارلايدى aqshamnews.kz
مەملەكەت باسشىسىنىڭ تاپسىرماسى بويىنشا باستالعان «جايلى مەكتەپ» ۇلتتىق جوباسىن ىسكە اسىرۋ اياسىندا اۋداندا 4 مىڭ ورىندىق ەكى جاڭا مەكتەپ سالىنۋدا. قالا اكىمى اتاپ وتكەندەي، ەگىزبايەۆ كوشەسىندەگى 2500 ورىندىق مەكتەپتى كەلەسى وقۋ جىلى باستالعانعا دەيىن پايدالانۋعا بەرۋ جوسپارلانۋدا. روزىباكييەۆ كوشەسىندەگى 1500 ورىندىق ەكىنشى مەكتەپ 2024 جىلدىڭ سوڭىنا دەيىن اياقتالادى.
ەستەرىڭىزگە سالا كەتەيىك، الماتىدا قالالىق اكىمدىكتىڭ جوبالىق كەڭسەسىنىڭ قولداۋىمەن جۇزەگە اسىرىلاتىن «جايلى مەكتەپ» جوباسى اياسىندا 36،8 مىڭ ورىندىق 22 مەكتەپ جۇمىس ىستەيتىن بولادى. ءبىرىنشى مەكتەپ وسى جىلدىڭ 1 قىركۇيەگىندە اۋەزوۆ اۋدانىندا № 97 ەسكى مەكتەپ-گيمنازيا ورنىندا اشىلدى.
ءبىلىم بەرۋ نىساندارىن جاڭعىرتۋ ءۇشىن بيىل 5 وقۋ ورنىن سەيسميكالىق كۇشەيتۋمەن كۇردەلى جوندەۋ جوسپارلانعان. ونىڭ ىشىندە №70 جالپى ءبىلىم بەرەتىن مەكتەپتە جوندەۋ جۇمىستارى اياقتالدى، ال №138 گيمنازيادا وسى جىلدىڭ قازان ايىندا اياقتالادى.
قىركۇيەك ايىندا №189 جانە №191 جالپى ءبىلىم بەرەتىن مەكتەپتەردە جۇمىس باستالدى، ولار 2025 جىلدىڭ تامىزىندا اياقتالادى. №73 مەكتەپتە 2025 جىلدىڭ سوڭىندا اياقتالاتىن 450 ورىندىق قوسىمشا قۇرىلىسىمەن جوندەۋ جوسپارلانعان.
اۋداننىڭ مەكتەپكە دەيىنگى ۇيىمدارىندا ورىن تاپشىلىعىن ازايتۋ بويىنشا دا بەلسەندى جۇمىس جۇرگىزىلۋدە. جىل باسىنان بەرى 13 جەكەمەنشىك بالاباقشا اشىلدى، №113 بوبەكجايعا كۇردەلى جوندەۋ جۇرگىزىلدى، جالپى جوبالىق قۋاتى 480 ورىندىق بالاباقشالارعا ارنالعان عيماراتتار قايتا جاڭارتىلدى جانە №81 بالاباقشا جوندەلۋدە. سونىمەن قاتار، 2025 جىلدىڭ سوڭىندا اياقتالاتىن ءۇش بالاباقشانى جوندەۋ جوسپارلانعان.