سپيكەردىڭ ايتۋىنشا، 2024 جىلدىڭ ەپيدەميولوگيالىق ماۋسىمى باستالعالى الماتى قالاسىندا جرۆي جانە تۇماۋ اۋرۋلارى بويىنشا جاعداي تۇراقتى.
الماتى قالاسى سانيتارلىق-ەپيدەميولوگيالىق باقىلاۋ دەپارتامەنتىنىڭ باسشىسى الپىسباي ۇلى كاسىمحان بۇگىن الماتى قالاسىنىڭ وڭىرلىك كوممۋنيكاسيالار قىزمەتى ۇيىمداستىرعان ونلاين-بريفينگتە ءسوز سويلەدى، دەپ حابارلايدى aqshamnews.kz
2024 جىلدىڭ 43 اپتاسىنا دەيىن قالادا ءجرۆي-دىڭ 12 413 جاعدايى تىركەلدى، بۇل وتكەن اپتاعا قاراعاندا 20،5%-عا جانە وتكەن جىلمەن سالىستىرعاندا 40،1%-عا تومەن. اۋرۋدىڭ 58،7%-ىن بالالار قۇرايدى.
«جاڭا ەپيدەميولوگيالىق ماۋسىمنىڭ 40-شى اپتاسىنان 43ء-شى اپتاسىنا دەيىنگى ارالىقتا ءجرۆي-دىڭ 64 145 جاعدايى تىركەلدى، بۇل وتكەن جىلمەن سالىستىرعاندا 39،6%-عا از. قالالىق زەرتحانالىق مونيتورينگ بارىسىندا تۇماۋ ۆيرۋسى انىقتالماعانىمەن، رينوۆيرۋس، پاراگريپپ، ادەنوۆيرۋس جانە ماۋسىمدىق كوروناۆيرۋس سياقتى باسقا جرۆي ۆيرۋستارى تىركەلدى»، - دەدى سپيكەر.
سونداي-اق، الماتى قالاسىندا 2024-2025 جىلدارداعى ەپيدەميولوگيالىق ماۋسىمعا دايىندىق ماقساتىندا كەشەندى شارالار اتقارىلۋدا. قازاقستان رەسپۋبليكاسىنىڭ باس مەملەكەتتىك سانيتاريالىق دارىگەردىڭ №7 قاۋلىسىنا سايكەس كەلەسى ءىس-شارالار قولعا الىنعان:
• الماتى قالاسى دسب-نىڭ 2024 جىلعى 3 قىركۇيەكتەگى №330ء-و/02.1-26 بۇيرىعىنا سايكەس سانيتاريالىق-پروفيلاكتيكالىق جانە ەپيدەمياعا قارسى ءىس-شارالار وتكىزىلۋدە؛
• 2024 جىلعى 27 قىركۇيەكتە مەديسينا قىزمەتكەرلەرى ءۇشىن قالالىق سەمينار ۇيىمداستىرىلدى، سونداي-اق 1 قازاندا رەسپۋبليكالىق كونفەرەنسياعا قاتىسۋ مۇمكىندىگى بەرىلدى؛
• مەديسينالىق ۇيىمداردا جرۆي جانە تۇماۋ جاعدايلارىنا جەدەل قىزمەت كورسەتۋ ءۇشىن 121 بايلانىس تەلەفونى جانە 102 اۆتوكولىك بولىنگەن؛
• جرۆي جانە تۇماۋعا شالدىققان ناۋقاستاردى جاتقىزۋ ءۇشىن 453 توسەك دايىندالىپ، قوسىمشا 90 توسەك ورىن ازىرلەندى؛
• تۇماۋعا قارسى پرەپاراتتاردىڭ (تاميفليۋ – 15 423 قاپتاما، رەلەنزا – 213 قاپتاما، وكسولين جاقپامايى – 4868 تۇتىك) جەتكىلىكتى قورى قامتاماسىز ەتىلگەن، سونداي-اق ماسكالار مەن دەزينفەكسيالىق قۇرالدار بار.
2024 جىلى جەرگىلىكتى بيۋدجەت قاراجاتىنا «تاۋەكەل توبىنداعى» ادامداردى ۆاكسيناسيالاۋ ءۇشىن 200 000 دوزا مولشەرىندە رەسەيلىك «گريپپول پليۋس» ءۇش ۆالەنتتى تۇماۋعا قارسى ۆاكسيناسى ساتىپ الىنعان. قالادا 19 قىركۇيەكتە بۇل ساناتقا ۆاكسينا ەگۋ باستالعان.
«2024 جىلعى 01 قاراشاداعى جاعداي بويىنشا الماتى قالاسىندا تۇماۋعا قارسى 201 946 ادام ەگىلدى، بۇل قالانىڭ جالپى حالقىنىڭ 8،8%-ىن قۇرايدى، ونىڭ ىشىندە 200 000 «تاۋەكەل توبىنداعى» (100%) ادام. ولاردىڭ اراسىندا 19 692 مەديسينا قىزمەتكەرى، 14 جاسقا دەيىنگى 20 635 بالا، 6074 جۇكتى ايەل، 2145 جابىق مەكەمەلەر كونتينگەنتى (قارتتار ۇيلەرى جانە بالالار ۇيلەرى)، 16 748 وقۋشى، جانە 132 350 سوزىلمالى اۋرۋلارى بار ەرەسەكتەر بار. سونداي-اق، اقىلى نەگىزدە جەكە مەديسينالىق ورتالىقتاردا 1946 ادام، ونىڭ ىشىندە جۇمىس بەرۋشىلەردىڭ قاراجاتىنا 813 ادام جانە ءوز قاراجاتىنا 1133 ادام ەگىلدى»، - دەپ اتاپ ءوتتى سپيكەر.
سونىمەن قاتار، سپيكەر جەكە مەديسينالىق ورتالىقتاردا اقىلى نەگىزدە تۇماۋعا قارسى ەكپە العىسى كەلەتىن ادامدارعا، ونىڭ ىشىندە جۇمىس بەرۋشىلەردىڭ قاراجاتى ەسەبىنەن ءتۇرلى سالاداعى قىزمەتكەرلەرگە ۆاكسيناسيا جۇرگىزىلەتىنىن ايتتى.
«قولدا بار دەرەكتەر بويىنشا قازىرگى ۋاقىتتا «فارماكوم» ج ش س ۆاكسيناسيا كلينيكاسىندا جانە «MC» مو-دا 4 ۆالەنتتى «گريپپول پليۋس» ۆاكسيناسى بار. ايتا كەتەتىن ءجايت، ۆاكسيناسيا حالىقتى تۇماۋ ۆيرۋسىن جۇقتىرۋدان قورعاپ قانا قويمايدى، سونىمەن قاتار اسقىنۋلار مەن ءولىم-جىتىمدى ايتارلىقتاي ازايتادى. تۇماۋعا قارسى ۆاكسينا الداعى ماۋسىمدا اينالىمى ورىن الۋى مۇمكىن ۆيرۋستاردان قورعاۋعا كومەگى زور. ءۇش ۆالەنتتى ۆاكسينالار، الەمدەگى ەڭ كوپ تارالعان، ءۇش تۇماۋ ۆيرۋسىنان: ەكى ا ءتيپتى شتامى جانە ءبىر ۆ شتامىنان قورعايدى. ءتورت ۆالەنتتى ۆاكسينالار، وسى جىلى ددۇ ۇسىنعان تۇماۋدىڭ ءتورت تۇرىنەن قورعاۋعا ارنالعان – بۇرىنعى شتامدارعا تاعى ءبىر ۆ ءتيپتى ۆيرۋس قوسىلادى»، - دەپ ءتۇسىندىردى الماتى قالاسىنىڭ باس سانيتار دارىگەرى.
تۇماۋ – تەمپەراتۋرانىڭ كۇرت جوعارىلاۋىمەن، السىزدىكپەن، قالتىراۋمەن، باس اۋرۋىمەن، دەنەدە بۇلشىقەت اۋرۋىمەن سيپاتتالاتىن اۋرۋ. ينفەكسيا كوزى – اۋرۋعا شالدىققان ادام، اسىرەسە اۋرۋعا جاڭا شالدىققان ناۋقاستان العاشقى 1-2 كۇنىندە اۋرۋ جۇقتىرۋ ءقاۋپى وتە جوعارى. تۇماۋ ءارتۇرلى اسقىنۋلارمەن بىرگە جۇرەدى: پنيەۆمونيا، برونحيت، جۇرەك-قان تامىرلارى، جۇيكە جۇيەسىنىڭ اسقىنۋى، سوزىلمالى اۋرۋلاردىڭ ءورشۋى. سوندىقتان، العاشقى بەلگىلەر پايدا بولعان كەزدە ءوزىن-وزى ەمدەمەي، دارىگەرگە جۇگىنىپ، نۇسقاۋلار بويىنشا ەمدەلۋدى باستاۋ ماڭىزدى.
اۋرۋعا شالدىعۋ ءقاۋپى جوعارى كەزدە قالا تۇرعىندارى جرۆي جانە تۇماۋعا قارسى كەلەسى پروفيلاكتيكالىق شارالاردى ۇستانۋى ءتيىس:
• جرۆي-عا شالدىققان ناۋقاستارمەن قارىم-قاتىناستى شەكتەۋ، قاجەت بولسا ماسكا تاعۋ؛
• اۋرۋعا شالدىققان جاعدايدا ۇيدە بولۋ، ءوزىن-وزى ەمدەۋمەن اينالىسپاۋ، دارىگەرگە جۇگىنۋ؛
• تۇشكىرۋ جانە جوتەلۋ كەزىندە اۋىزدى مايلىقپەن نەمەسە ورامالمەن جابۋ، قولدى ءجيى جۋۋ، ءۇي-جايلاردى جەلدەتىپ، ىلعالدى تازالاۋ جۇرگىزۋ؛
• يممۋندىق جۇيەنى نىعايتۋ ءۇشىن دارىگەردىڭ كەڭەسى بويىنشا س دارۋمەنى مەن باسقا دا ۆيتاميندەردى قولدانۋ؛
• ادامدار كوپ جينالاتىن جەرلەرگە بارۋدان، بۇقارالىق ءىس-شارالارعا قاتىسۋدان باس تارتۋ، ماۋسىمعا سايكەس كيىنۋ؛
• سىرقات بالالاردى مەكتەپتەرگە جانە مەكتەپكە دەيىنگى مەكەمەلەرگە جىبەرمەۋ.
وسى قاراپايىم شارالاردى ساقتاۋ سىزدەردى جرۆي جانە تۇماۋ اۋرۋلارىنان قورعاۋعا كومەكتەسەدى.