قۇجاتتاردى ونلاين تۇردە admission.apa.kz جۇيەسى ارقىلى 1–30 قاراشا ارالىعىندا تاپسىرۋعا بولادى.
2024 جىلعى 1 قاراشادان باستاپ قازاقستان رەسپۋبليكاسى پرەزيدەنتىنىڭ جانىنداعى مەملەكەتتىك باسقارۋ اكادەمياسى مودۋلدىك وقىتۋ ءپرينسيپى بويىنشا ماگيستراتۋرا باعدارلامالارىنا قوسىمشا قابىلداۋدى باستادى، دەپ حابارلايدى aqshamnews.kz
قابىلداۋدىڭ باستالعانى تۋرالى الماتى قالالىق فيليالىنىڭ ديرەكتورى ايگەرىم ابيلوۆا الماتى قالاسىنىڭ وڭىرلىك كوممۋنيكاسيالار قىزمەتى الاڭىندا وتكەن بريفينگتە مالىمدەدى.
اكادەميا 1994 جىلى ۇلتتىق جوعارى مەملەكەتتىك باسقارۋ مەكتەبى رەتىندە قۇرىلدى جانە بيىل 30 جىلدىعىن اتاپ وتۋدە. ول مەملەكەتتىك قىزمەتشىلەر مەن باسقا دا مامانداردى دايارلايتىن، قايتا دايارلايتىن جانە بىلىكتىلىگىن ارتتىراتىن ەرەكشە مارتەبەسى بار وقۋ ورنى بولىپ تابىلادى. اكادەميانىڭ باستى ماقساتى – مەملەكەتتىك سەكتورعا جوعارى كاسىبي كادرلاردى دايىندايتىن ءبىلىم بەرۋ جانە زەرتتەۋ مەكتەبىن قۇرۋ.
ايگەرىم ابيلوۆانىڭ ايتۋىنشا، اكادەميادا ماگيستراتۋرا باعدارلامالارى اياسىندا مودۋلدىك وقىتۋ 2020 جىلدان باستاپ ەنگىزىلىپ، تانىمال وقىتۋ فورماتىنا اينالدى. 2022 جىلدان باستاپ اكادەميا وسى فورماتتاعى باعدارلامالار بويىنشا قىسقى قوسىمشا وقىتۋدى ۇسىنا باستادى. مودۋلدىك وقىتۋ نەگىزگى جۇمىس ورنىنان اجىراماي، بىلىكتىلىكتى ارتتىرۋعا مۇمكىندىك بەرەدى، بۇل مەملەكەتتىك قىزمەتشىلەر، كۆازيمەملەكەتتىك سەكتور قىزمەتكەرلەرى جانە ءماسليحات دەپۋتاتتارى ءۇشىن ماڭىزدى. وقۋ جىلى 6 مودۋلدەن تۇرادى، ولار وفلاين جانە قاشىقتىقتان وتەدى.
ۇمىتكەرلەرگە ۇسىنىلاتىن ءبىر جىلدىق باعدارلامالار:
• Executive MPA – مەملەكەتتىك باسقارۋ: باسشىلىق قىزمەتتە كەمىندە 2 جىل ەڭبەك ءوتىلى قاجەت.
• Master of Regional Development – وڭىرلىك دامۋ: جالپى جۇمىس ءوتىلى كەمىندە 2 جىل بولۋى كەرەك.
قابىلداۋ ءۇشىن مەملەكەتتىك ورگاننىڭ جولداماسى (مەملەكەتتىك قىزمەتشىلەرگە ارنالعان)، مەملەكەتتىك ءتىلدى B1 دەڭگەيىنەن تومەن ەمەس دەڭگەيدە مەڭگەرگەنىن راستايتىن QAZAQ RESMI TEST نەمەسە قازتەست سەرتيفيكاتى جانە باسقا دا قۇجاتتار قاجەت. اكادەميا 11-26 قاراشا ارالىعىندا وتەتىن QRT-تەستىن تاپسىرۋعا ارنالعان قازاق ءتىلى بويىنشا دايىندىق كۋرستارىن ۇسىنادى.
سپيكەر، سونداي-اق 2024 جىلعى قابىلداۋ ەرەجەلەرىندەگى نەگىزگى وزگەرىستەر تۋرالى ايتتى:
1. اكادەميا مەملەكەتتىك قىزمەتشىلەرگە ارنالعان مودۋلدىك باعدارلامالارعا قابىلداۋدى قايتا باستادى.
2. مەملەكەتتىك ورگاننىڭ جولداماسىن ۇسىنۋ تالابى ەنگىزىلدى، بۇل جۇمىس جانە وقۋ كەستەلەرىن ۇيلەستىرۋگە مۇمكىندىك بەرەتىن ءۇشجاقتى شارت ارقىلى جۇزەگە اسىرىلادى.
3. مودۋلدەر سانى 4-تەن 6-عا دەيىن ۇلعايتىلدى، بۇل اكادەميادا ۇزاق ۋاقىت بولۋ قاجەتتىلىگىن ازايتادى.
قابىلداۋ كەزەڭدەرى:
• وتىنىمدەر بەرۋ مەرزىمى: 1–30 قاراشا.
• ىرىكتەۋ كەزەڭدەرى: اناليتيكالىق ەسسە جازۋ جانە سۇحبات كەزەڭى 4–7 جەلتوقسان ارالىعىندا وفلاين فورماتتا وتكىزىلەدى.
• وقۋ باستالۋى: 2025 جىلدىڭ 13 قاڭتارىندا.
وقۋعا ءتۇسۋ ەرەجەلەرى جانە قاجەتتى قۇجاتتار ءتىزىمى تۋرالى تولىق اقپارات اكادەميانىڭ رەسمي سايتىندا https://www.apa.kz/ ورنالاستىرىلعان. قابىلداۋ كوميسسياسى ۇمىتكەرلەرگە كورسەتىلگەن تەلەفوندار جانە الەۋمەتتىك جەلىلەر ارقىلى كەڭەس بەرۋدە.
قاجەتتى قۇجاتتار ءتىزىمى:
1. مەملەكەتتىك ورگاننىڭ جولداماسى (مەملەكەتتىك قىزمەتشىلەرگە ارنالعان).
2. جەكە باسىن كۋالاندىراتىن قۇجاتتىڭ سكان كوشىرمەسى.
3. جوعارى ءبىلىم تۋرالى قۇجاتتىڭ قوسىمشاسىمەن بىرگە سكان كوشىرمەسى.
4. QAZAQ RESMI TEST نەمەسە قازتەست سەرتيفيكاتى (شەتەل ازاماتتارىن قوسپاعاندا).
5. قىزمەتتىك ءتىزىم (مەملەكەتتىك قىزمەتشىلەرگە ارنالعان) نەمەسە ەڭبەك قىزمەتىن راستايتىن قۇجات.
6. ءوتىنىش (ەسق قولىمەن).