18 جەلتوقساندا اباي الاڭىندا جاڭا جىلدىق مەرەكەلەردىڭ رەسمي باستالۋىن بىلدىرەتىن ءداستۇرلى قالالىق مادەني شارا – الماتى قالاسىنىڭ باس شىرشاسىنىڭ شامدارىن جاعۋ ءراسىمى وتەدى، دەپ حابارلايدى aqshamnews.kz
قالانىڭ باس شىرشاسىنىڭ بيىكتىگى 22 مەتر قۇرايدى. ونى بەزەندىرۋ ءۇشىن 7 كيلومەترلىك جاڭا جىلدىق گيرلياندالار، سونداي-اق كوپ ءتۇرلى جارقىن دەكوراتيۆتىك ەلەمەنتتەر، ءىرى جانە ۇساق شىرشا شارلارى، تاقىرىپتىق جاڭا جىلدىق ويىنشىقتار جانە سىيلىق يلليۋميناسيالارى پايدالانىلعان.
قالا تۇرعىندارى مەن قوناقتارى ءۇشىن زاماناۋي مۋلتيمەديالىق تەحنولوگيالار، اۋقىمدى جارىق ەلەمەنتتەرىمەن بەزەندىرۋ مەن قازاقستاندىق ەسترادانىڭ تانىمال ارتىستەرىنىڭ قاتىسۋىمەن وتەتىن مەرەكەلىك كونسەرتتىك باعدارلاما ۇيىمداستىرىلادى.
كەشتىڭ ماڭىزدى ءساتى – قالا تۇرعىندارى مەن قوناقتارىنىڭ جانە جاڭا جىلدىڭ باستى كەيىپكەرى اياز اتامەن بىرگە قالانىڭ باس شىرشاسىنىڭ شامدارىن سالتاناتتى تۇردە جاعۋ ءراسىمى بولماق. كونسەرتتىك كەش اياسىندا اياز اتا مەن اقشاقار قالا تۇرعىندارىن كەلە جاتقان جاڭا جىلمەن قۇتتىقتاپ، كورەرمەندەرگە ارنالعان ينتەراكتيۆتى جانە ويىن-ساۋىق باعدارلامالارىن ۇسىنادى.
مەرەكەلىك كەشتىڭ اشىلۋى قازاقستاندىق ەسترادا جۇلدىزدارى، شوۋ-بالەت ارتىستەرى مەن مانەرلەپ سىرعاناۋشىلار ورىندايتىن «كەل، جاڭا جىل!» اتتى ۆوكالدى-حورەوگرافيالىق قويىلىمىمەن باستالادى.
سونىمەن قاتار، كونسەرتتىك باعدارلاما اياسىندا قازاقستاننىڭ حالىق ءارتىسى روزا رىمبايەۆا، الي وقاپوۆ، ءمادي رىمبايەۆ، «كەشYOU»، «جىگىتتەر»، «Astra» توپتارى، بالجان بيداش جانە Kodi سىندى تانىمال ورىنداۋشىلار ونەر كورسەتەدى.
سونداي-اق، قالاداعى بارلىق سەگىز اۋدانىندا جاڭا جىلدىق شىرشالاردىڭ شامدارىن جاعۋعا ارنالعان سالتاناتتى راسىمدەر وتەدى. بارلىق ءىس-شارالار 18 جەلتوقساندا ساعات 19:00-دە كەلەسى مەكەنجايلاردا ۇيىمداستىرىلادى:
جەتىسۋ اۋدانى – «گۇلدەر» ساياباعى (سەرىكوۆ كوشەسى، 2ا)؛
بوستاندىق اۋدانى – «اتاكەنت» كىىو؛
اۋەزوۆ اۋدانى – «Family Park»؛
مەدەۋ اۋدانى – «28 گۆاردياشى-پانفيلوۆشىلار اتىنداعى ساياباق»؛
الاتاۋ اۋدانى – «الماتى ارەنا» سپورت كەشەنى؛
ناۋرىزباي اۋدانى – شۇعىلا شاعىناۋدانى، 347 (امفيتەاتر)؛
تۇركسىب اۋدانى – №6 وقۋشىلار ءۇيى (سەيفۋللين كوشەسى، 13/1)؛
المالى اۋدانى – اباي اتىنداعى وپەرا جانە بالەت تەاترى الاڭى.