قارجى نارىعىن رەتتەۋ جانە دامىتۋ اگەنتتىگى قازاقستاندا باعالى قاعازدار نارىعى تۋرالى جاڭا زاڭ جوباسىن ازىرلەۋ باستالعانىن العاش رەت رەسمي تۇردە راستادى.
اگەنتتىك جاڭا زاڭ جوباسىمەن جۇمىس باستالعانىن ءوز ءتوراعاسى ءمادينا ءابىلقاسىموۆانىڭ ەۋروپالىق قايتا قۇرۋ جانە دامۋ بانكىنىڭ (ەقدب) قارجى ينستيتۋتتارى دەپارتامەنتىنىڭ باسقارۋشى ديرەكتورى فرانسيز ماليدجبەن كەزدەسۋدەن كەيىن مالىمدەدى.
اگەنتتىك قور نارىعىنىڭ تۇراقتىلىعى مەن تيىمدىلىگىن ارتتىرۋعا، ينۆەستورلاردىڭ قۇقىقتارىن قورعاۋدى كۇشەيتۋگە جانە يننوۆاسيالاردى ەنگىزۋگە جاعداي جاساۋعا باعىتتالعان باعالى قاعازدار نارىعى تۋرالى جاڭا زاڭدى ازىرلەۋگە كىرىستى، دەلىنگەن قنردا حابارلاماسىندا.
ۆەدومستۆو وكىلدەرىنىڭ ايتۋىنشا، جاھاندىق قارجى جۇيەسى جىلدام وزگەرىپ جاتقان قازىرگى جاعدايدا قازاقستانعا قور نارىعىندا قۇرىلىمدىق رەفورمالار جۇرگىزۋ قاجەت.
زاڭ جوباسى تۋرالى نە بەلگىلى؟
ءمادينا ءابىلقاسىموۆا باعالى قاعازدار نارىعى تۋرالى زاڭدى قايتا جازۋ جوسپارلانىپ وتىرعانىن قاراشا ايىندا وتكەن قازاقستان قارجىگەرلەرىنىڭ كونگرەسىندە جاريا ەتكەن. ول كەزدە اگەنتتىك نەگىزگى جۇمىستى 2026 جىلعا قالدىرۋدى كوزدەپ وتىرعانىن ايتقان ەدى.
ءبىز باعالى قاعازدار نارىعى تۋرالى زاڭنىڭ نورمالارىن قاراپ شىقتىق. كوپتەگەن تالاپتار جەتىلدىرۋدى قاجەت ەتەدى، ءبىر بولىگى ەسكىرگەن. مىسالى، سيفرلىق قارجى اكتيۆتەرىنە قاتىستى وزگەرىستەردى ءبىز باعالى قاعازدار تۋرالى زاڭعا تىكەلەي ەمەس، بانكتەر تۋرالى ىلەسپە زاڭ جوباسى ارقىلى ەنگىزۋگە ءماجبۇر بولدىق. سونىڭ سالدارىنان كەيبىر سايكەسسىزدىكتەر پايدا بولدى. مۇنىڭ ءبارىن جۇيەلەۋ قاجەت، دەگەن بولاتىن اگەنتتىك ءتوراعاسى.
وسىلايشا، قازاقستاندا قور نارىعىن جاڭعىرتۋعا باعىتتالعان جاڭا زاڭ جوباسىن ازىرلەۋ ءىس جۇزىندە باستالىپ كەتتى.