بۇدان وزگە، قالا تۇرعىندارىن جۇمىسقا ورنالاستىرۋ بويىنشا باعدارلامالار جۇمىس ىستەيدى.
الماتى قالاسى اۋەزوۆ اۋدانىنىڭ اكىمى سايران سايفەدەنوۆ وڭىرلىك كوممۋنيكاسيالار قىزمەتىنىڭ باسپا ءسوز كونفەرەنسياسىندا وسى ماقساتتارعا 2021 جىلى 189 ميلليون تەڭگە باعىتتالعانىن ايتتى، دەپ حابارلايدى Almaty-akshamy.kz
سايران سايفەدەنوۆ اتاپ وتكەندەي، اۋداندا 584 وتباسىنان 2 784 ادام ااك الادى. وتباسىنىڭ ءبىر مۇشەسىنە اي سايىنعى تولەمدەردىڭ ورتاشا مولشەرى 8 571 تەڭگەنى قۇرادى.
اۋداندا حالىقتىڭ از قامتىلعان الەۋمەتتىك وسال توپتارىنان بارلىعى 14 378 ادام بار. ونىڭ ىشىندە 6 707 مۇگەدەك، 3 756 كوپ بالالى جانە از قامتىلعان وتباسى، 3 915 ەڭ تومەنگى زەينەتاقى الاتىن زەينەتكەرلەر بار.
اۋدان اكىمدىگىنىڭ ۆولونتەرلەرى مەن قىزمەتكەرلەرى بيىل 4 541 وتباسىن قاجەتتى ازىق-تۇلىكپەن قامتاماسىز ەتتى: «حالىق» قورىنان 648 مۇقتاج وتباسىعا جانە دەمەۋشىلەردەن 3 893 وتباسىنا كومەك كورسەتىلدى.
بۇدان وزگە، قالا تۇرعىندارىن جۇمىسقا ورنالاستىرۋ بويىنشا باعدارلامالار جۇمىس ىستەيدى. وسى جىلى اۋەزوۆ اۋدانىندا 5 000-نان استام تۇرعىن جۇمىسپەن قامتىلدى.
جەرگىلىكتى اتقارۋشى ورگاندار جۇمىس ىزدەۋگە كومەكتەسىپ قانا قويماي، بىلىكتىلىكتى ارتتىرۋ كۋرستارىنا جىبەرەدى، ءوز ءىسىن اشۋعا جاردەمدەسەدى، جاڭا داعدىلارعا ۇيرەتەدى، - دەدى اۋدان اكىمى.
مىسالى، «ەڭبەك» باعدارلاماسى بويىنشا بيىل 5085 ادام جۇمىسقا ورنالاستىرىلدى: تۇراقتى جۇمىسقا – 3 048، الەۋمەتتىك جۇمىس ورىندارىنا – 175، قوعامدىق جۇمىستارعا – 1 200، جاستار تاجىريبەسىنە وقۋ ورىندارىنىڭ 267 تۇلەگى جىبەرىلدى. بيزنەس اشۋعا 203 الماتىلىق گرانت السا، قىسقا مەرزىمدى كۋرستاردان 163 ادام ءوتتى جانە 29 ادام العاشقى جۇمىس ورنىنا قىزمەتكە ورنالاستىرىلدى.
سايران سايفەدەنوۆ جەرگىلىكتى اتقارۋشى ورگانداردىڭ الەۋمەتتىك بەيىمدەلۋگە جانە كاسىپتىك باعدار بەرۋگە دە ىقپال ەتەتىنىن اتاپ ءوتتى. «قولداۋ» باعدارلاماسى بويىنشا اۋەزوۆ اۋدانىنىڭ 14 تۇرعىنى ءوز بيزنەسىن اشۋعا 2-5 ميلليون تەڭگەگە دەيىن گرانت الدى. گرانتتىق قولداۋدىڭ جالپى سوماسى 45 ميلليون تەڭگەدەن استى.