ءبىلىم وشاقتارىن پايدالانۋعا بەرۋ 2022-2023 جىلدارعا جوسپارلانىپ وتىر
اۋەزوۆ اۋدانىنىڭ اكىمى سايران سايفەدەنوۆ وڭىرلىك كوممۋنيكاسيالار قىزمەتىنىڭ باسپا ءسوز كونفەرەنسياسىندا جەكە مەكتەپتەر سالۋ جانە بەس مەملەكەتتىك مەكتەپتى كەڭەيتۋ تۋرالى ايتىپ بەردى، دەپ حابارلايدى Almaty-akshamy.kz
سپيكەردىڭ مالىمەتىنشە، بۇگىندە اۋداندا 33 مەملەكەتتىك (50 855 بالاعا) جانە 12 جەكە (2505 بالاعا) مەكتەپ جۇمىس ىستەيدى. 2021-2022 وقۋ جىلىندا وقۋشىلاردىڭ جالپى كونتينگەنتى – 53 360 بالا.
« 2020 جىلى وقۋشى ورىندارىنىڭ تاپشىلىعى 4 699 ورىندى قۇرادى، بۇگىنگى كۇنى كونتينگەنتتىڭ ۇلعايۋىنا بايلانىستى تاپشىلىق 5 169 ورىندى قۇرايدى. بۇل ماسەلەنى شەشۋ ءۇشىن وتكەن جىلى №6، 117، 121، 132، 133 - بارلىعى 5 مەكتەپتە جالپى 3 600 وقۋشى ورنىنا ەسەپتەلگەن جاپسارجاي قۇرىلىسى باستالدى. قازىرگى ۋاقىتتا ءۇش مەكتەپتە جۇمىس اياقتالدى، ەكەۋى جىل سوڭىنا دەيىن اياقتالادى»، – دەدى اۋەزوۆ اۋدانىنىڭ اكىمى.
سايران سايفەدەنوۆ بيىل ەكى جەكەمەنشىك مەكتەپ – 160 ورىندىق اۆس جانە 100 ورىندىق «كەمەل» مەكتەپتەرى اشىلعانىن ايتتى. جىل سوڭىنا دەيىن تاعى دا ەكى جەكەمەنشىك مەكتەپ – 400 ورىندىق «وركەن» جانە 300 ورىندىق Almaty-High school اشۋ جوسپارلانىپ وتىر.
جوعارىدا اتالعان نىساندار پايدالانۋعا بەرىلگەننەن كەيىن 2021 جىلدىڭ سوڭىندا تاپشىلىق وتكەن جىلمەن سالىستىرعاندا 4 560 ورىنعا تومەندەپ، 609 ورىندى قۇرايتىن بولادى.
سونداي-اق، قازىرگى ۋاقىتتا اۋداندا 7 مەكتەپتى سەيسميكالىق كۇشەيتۋگە جانە كۇردەلى جوندەۋگە جسق ازىرلەنۋدە. ولار - №127، 9، 97، 141، 122، «ءبىلىم-يننوۆاسيا»، №155 مەكتەپ فيليالىن قايتا قۇرۋ. قۇرىلىس-مونتاج جۇمىستارى 2022-2023 جىلدارعا جوسپارلانعان.
مەكتەپكە دەيىنگى ءبىلىم بەرۋگە كەلەتىن بولساق، قازىرگى ۋاقىتتا اۋدان بويىنشا بالاباقشالاردا تاپشىلىق 8 047 ورىندى قۇرايدى. بيىل 752 ورىندىق 10 جەكەمەنشىك بالاباقشا اشىلدى.
№23 جانە №186 بالاباقشالاردا كۇردەلى جوندەۋ اياقتالدى. شاعىن اۋداندا بالاباقشا قۇرىلىسىنا جسق ازىرلەنۋدە. 120 ورىنعا ارنالعان "التىن بەسىك"، سونداي-اق، "اقساي-2" شاعىناۋدانى، 2 ءۇي، "اقساي-2" شاعىناۋدانى، 58 ءۇي مەكەنجايلارىنداعى بوبەكجاي عيماراتتارىنىڭ سەيسموتۇراقتىلىعىن كۇشەيتۋ جانە كۇردەلى جوندەۋ جوبالارىن ازىرلەنەدى. نىسانداردى پايدالانۋعا بەرۋ 2022-2023 جىلدارعا جوسپارلانىپ وتىر.