23 ماۋسىم كۇنى بۇكىل الەم حالىقارالىق وليمپيادا كۇنىن اتاپ وتەدى.
وسى ورايدا، Olympic.kz ەل وڭىرلەرىندەگى سپورت قاھارماندارى تۋرالى ماتەريالدار تىزبەگىن ۇسىندى، دەپ حابارلايدى Almaty-akshamy.kz.
الماتى قالاسى وتاندىق سپورتتىڭ وركەندەۋىنە زور ۇلەس قوستى. الاتاۋ باۋرايىنداعى سپورتشىلار الەمدىك جارىستار مەن وليمپيادا ويىندارىندا تۇعىردان كورىندى.
جەڭىل اتلەت ولگا شيشيگينا 2000 جىلعى سيدنەي وليمپياداسىندا توپ جاردى. ول 100 مەترگە كەدەرگىلەر ارقىلى جۇگىرۋدەن چەمپيون اتاندى. سونداي-اق، شيشيگينا الەم چەمپيوناتىنىڭ كۇمىس جانە قولا جۇلدەگەرى، ازيا چەمپيونى، ازيا ويىندارىنىڭ ەكى دۇركىن چەمپيونى، جابىق عيماراتتاعى الەم چەمپيوناتىنىڭ جەڭىمپازى.
الماتىدان شىققان تاعى ءبىر وليمپيادا چەمپيونى – دميتريي بالاندين. ول 2016 جىلعى ريو وليمپياداسىندا 200 مەترگە براسس ادىسىمەن جۇزۋدەن چەمپيون اتاندى. ودان بولەك، بالاندين ازيا ويىندارىنىڭ ءۇش دۇركىن چەمپيونى، ۋنيۆەرسيادا جەڭىمپازى جانە ازيا ويىندارىنىڭ ءۇش دۇركىن قولا جۇلدەگەرى.
مانەرلەپ سىرعاناۋدان قازاقستانعا وليمپيادا مەن الەم چەمپيوناتىنىڭ تۇڭعىش ءارى تاريحي جۇلدەسىن سىيلاعان دەنيس تەن الماتى قالاسىنىڭ تۋماسى. دەنيس مانەرلەپ سىرعاناۋدان سوچي وليمپياداسىنىڭ قولا جۇلدەگەرى، الەم چەمپيوناتتارىنىڭ كۇمىس جانە قولا جۇلدەگەرى، ازيا ويىندارىنىڭ چەمپيونى، ءتورت قۇرلىق چەمپيوناتىنىڭ جانە قىسقى ۋنيۆەرسيادانىڭ جەڭىمپازى. سپورتشى 2018 جىلى بۇزاقىلار قولىنان قازا تاپتى.
مەرگەن سەرگەي بەليايەۆ الماتىنىڭ اتاعىن الىسقا اپارعان سپورتشى. ول نىسانا كوزدەۋدەن اتلانتا وليمپياداسىنىڭ ەكى دۇركىن كۇمىس جۇلدەگەرى. ازيا ويىندارىنان جالپى ەسەبى 4 التىن، 2 كۇمىس، 4 قولا يەلەنگەن.
نىسانا كوزدەۋ سپورتىنىڭ تاعى ءبىر جارقىن وكىلى ۆلاديمير ۆوحميانين الماتىنىڭ اتىنان الەمدىك جارىستارعا قاتىستى. ول بارسەلونا جانە اتلانتا وليمپيادالارىنىڭ قولا جۇلدەگەرى، ەكى دۇركىن الەم، ەكى دۇركىن ەۋروپا چەمپيونى. ازيا چەمپيوناتىنىڭ التىن جۇلدەگەرى. جازعى ازيا ويىندارىندا 1 التىن، 1 كۇمىس جانە 2 قولا مەدال ەنشىلەگەن.
بياتلوننان ۆانكۋۆەر وليمپياداسىنىڭ كۇمىس جۇلدەگەرى ەلەنا حرۋستاليەۆا مەن ەركىن كۇرەستەن ەكى دۇركىن الەم چەمپيونى، وليمپيادانىڭ قولا جۇلدەگەرى محيتار مانۋكيان دا الماتىنىڭ اتىنان سىنعا ءتۇستى.
شاڭعىمەن تۇعىردان سەكىرۋدەن ليللەحامەردەگى وليمپيادا ويىندارىنىڭ قاتىسۋشىسى، بۇگىندە باپكەرلىك قىزمەتتى قولعا العان قايرات بيەكەنوۆ تا الماتى وڭىرىنەن. ونىڭ جەتەكشىلىگىمەن قازاقستان 2011 جىلعى ازيا ويىندارىندا 1 التىن، 1 كۇمىس جانە 2 قولا مەدال جەڭىپ الدى. سونداي-اق، يليا ميزەرنىح جاسوسپىرىمدەر وليمپياداسىندا توپ جاردى.
