كەڭەس وداعىنىڭ باتىرى، № 1 حالىق قاھارمانى، قازاقستاننىڭ تۇڭعىش قورعانىس ءمينيسترى ارميا گەنەرالى ساعادات نۇرماعامبەتوۆتىڭ تۋعانىنا 100 جىل تولۋىنا وراي ۇيىمداستىرىلعان ءىس-شارا اسكەري-پاتريوتتىق كلۋبتار، اسكەري مەكتەپتەر مەن ۋچيليششەلەر تاربيەلەنۋشىلەرى اراسىندا ەرەكشە اسەر قالدىردى.
اسكەري-پاتريوتتىق جيىنعا ازەربايجان، بەلارۋس، قازاقستان، قىرعىزستان، وزبەكستان جانە رەسەي قۇرامالارىنان 750 ادام قاتىستى، دەپ حابارلايدى Almaty-akshamy.kz.
قازاقستان كوماندالارى اتىنان وڭىرلەردەن، ق ر قارۋلى كۇشتەرىنىڭ، باسقا دا اسكەرلەر مەن اسكەري قۇرالىمداردىڭ اسكەري-پاتريوتتىق كلۋبتارىنان، ق ر قورعانىس مينيسترلىگىنىڭ استانالىق اسكەري كوللەدجىنەن، "جاس ۇلان" رەسپۋبليكالىق مەكتەپتەرىنەن، "ارىستان" مامانداندىرىلعان ليسەيىنەن جانە وبلىستىق اسكەري مەكتەپ-ينتەرناتتاردان جارىسقا قاتىستى.
جاس پاتريوتتار جارىسىنىڭ اياقتالۋ راسىمىندە قورعانىس ءمينيسترىنىڭ ورىنباسارى گەنەرال-مايور شايح-حاسان جازىقبايەۆ ءسوز سويلەدى.
– سەندەر تياناقتى دايىندالعان شارا ءوز مارەسىنە جەتتى. بۇل سايىستار سەندەردىڭ اقىل-ويلارىڭدى، كۇش-قۋات دايىندىقتارىڭدى، كوماندادا قالاي جۇمىس ىستەيتىندەرىڭدى كورسەتتى. جاڭا دوستار، قىزىقتى كەزدەسۋلەر مەن تاجىريبەلەر ەستەرىڭدە ماڭگى قالادى دەپ ويلايمىن. سەندەرگە ساتتىلىك تىلەيمىن جانە وركەندەي بەرىڭدەر، – دەدى ءمينيستردىڭ ورىنباسارى.
ماراپاتتاۋ راسىمىنە "قارۋلى كۇشتەر ارداگەرلەرى" رقب ءتوراعاسىنىڭ ورىنباسارى وتستاۆكاداعى گەنەرال-مايور مارات ناعۇمانوۆ قاتىستى. ءوز سوزىندە ول جيىننىڭ حالىقارالىق دەڭگەيى جاستاردىڭ جەڭىس باتىرلارىنا دەگەن قۇرمەتى مەن ۇرپاقتار ساباقتاستىعىن كورسەتەتىنىن اتاپ ءوتتى. ءتۇرلى ەل وكىلدەرىنىڭ جيىنعا قاتىسۋى وسىنداي سايىستارعا اسكەرگە دەيىنگى جاستاردىڭ دايىندىق ساپاسىن ارتتىرۋعا سەپتىگىن تيگىزەدى.
جيىن ەرەجەسى بويىنشا باس جۇلدەنى "كۇشىمىز بىرلىكتە" فينالدىق ويىنىندا جەڭىمپاز اتانعان الادى. وعان ءوز ساناتتارىندا ۇزدىك دەپ تانىلعان كوماندالار قاتىسقانىن ايتا كەتۋ كەرەك. بۇل تارتىسقا تولى سايىستا قاراعاندى قالاسىنداعى تالعات بيگەلدينوۆ اتىنداعى "جاس ۇلان" رەسپۋبليكالىق مەكتەبىنىڭ قۇراماسى جەڭىسكە جەتتى. وسى كوماندانىڭ كاپيتانىنا "ايبىن-2024" X حالىقارالىق اسكەري-پاتريوتتىق جاستار جيىنىنىڭ باس جۇلدەسى تابىستالدى.
ۇيىمداستىرۋشىلار ساناتتار بويىنشا جارىستىڭ بارلىق ءتۇرىن قورىتىندىلادى. قاتىسۋشى مەملەكەتتەر كوماندالارى اراسىندا ءبىرىنشى ورىندى قازاقستاننىڭ نامىسىن قورعاعان ساعادات نۇرماعامبەتوۆ اتىنداعى قورعانىس مينيسترلىگى اسكەري كوللەدجىنىڭ كادەتتەرى ولجالادى. ەكىنشى ورىندا – وزبەكستان قۇراماسى، ءۇشىنشى ورىندا – بەلورۋسسيادان كەلگەن مينسك سۋۆوروۆ اسكەري ۋچيليششەسىنىڭ كومانداسى.
وڭىرلەر ساناتىندا اقمولا وبلىسىنىڭ "ايبىن" اسكەري-پاتريوتتىق كلۋبى، ەكىنشى ورىندا تۇركىستان وبلىسىنىڭ "ارىس" كومانداسى، ءۇشىنشى ورىندا اباي وبلىسىنىڭ "اباي قىراندارى" كومانداسى جەڭىسكە جەتتى.
قارۋلى كۇشتەردىڭ، باسقا دا اسكەرلەر مەن اسكەري قۇرالىمداردىڭ اسكەري-پاتريوتتىق كلۋبتارى اراسىندا دەسانتتىق-شابۋىلداۋ اسكەرلەرىنىڭ "جاس دەسانتشىلار" كومانداسى، ەكىنشى ورىندا – "وڭتۇستىك" وڭىرلىك قولباسشىلىعىنىڭ "بولاشاق"، ءۇشىنشى ورىندا – اۋە قورعانىسى كۇشتەرىنىڭ "بەس قارۋ" كومانداسى ۇزدىك دەپ تانىلدى.
رەسپۋبليكالىق مەكتەپتەر مەن وبلىستىق اسكەري ينتەرناتتار ىشىندە ءبىرىنشى ورىندى قاراعاندى قالاسىنىڭ "جاس ۇلان" رەسپۋبليكالىق مەكتەبى، ەكىنشى ورىندى اباي وبلىسى سەمەي قالاسىنىڭ "جاس ۇلان" ارنايى ەرلەر مەكتەپ-ينتەرناتى، ءۇشىنشى ورىندى الماتى وبلىسىنىڭ "ارىستان" مامانداندىرىلعان ليسەيى يەلەندى.
جارىس جەڭىمپازدارى كۋبوكتارمەن، مەدالدارمەن، ديپلومدارمەن جانە ەستەلىك سىيلىقتارمەن ماراپاتتالدى.