جالپى سوماسى - 1 ترلن 40 ملرد تەڭگە.
الماتى قالاسى ءماسليحاتىنىڭ VII سايلانىم دەپۋتاتتارى 2022 جىلعا ارنالعان قالا بيۋدجەتىن قولداپ، كەزەكتى XIII سەسسيادا بەكىتتى، دەپ حابارلايدى Almaty-akshamy.kz
كەلەسى جىلعا ارنالعان بيۋدجەت جوباسىن دەپۋتاتتارعا الماتى قالاسىنىڭ اكىمى باقىتجان ساعىنتايەۆ تانىستىردى. وتكەن جىلدارداعىداي، مەگاپوليستىڭ باستى قارجىلىق قۇجاتى الەۋمەتتىك باعدارلانعان بولىپ قالىپ وتىر.
وسىلايشا، ءبىلىم بەرۋ سالاسىنا 197،3 ملرد تەڭگە ءبولىندى. قاراجات جالپى سانى 310 مىڭ وقۋشىسى بار 204 مەكتەپتى، 15 ينتەرنات مەكەمەلەرىن، 48 كوللەدجدى ۇستاۋعا ارنالعان. بۇدان باسقا، كەلەسى جىلدان باستاپ ءبىلىم بەرۋ وبەكتىلەرىنىڭ بۇرىن جەكەشەلەندىرىلگەن عيماراتتارىن كوممۋنالدىق مەنشىككە قايتارۋ جوسپارلانۋدا. وسىنىڭ ارقاسىندا تەك اۋەزوۆ جانە بوستاندىق اۋداندارىندا وقۋشى ورىندىرىنىڭ تاپشىلىعىن قىسقارتۋ قاراستىرىلىپ وتىر.
سونداي-اق، "اينابۇلاق"، "سايالى-2"، "اقجار" ىقشاماۋداندارىندا 640 ورىندىق ءۇش بالاباقشانىڭ قۇرىلىسىن باستاۋ، الاتاۋ جانە ناۋرىزباي اۋداندارىندا بەس مەكتەپ پەن بالاباقشانى سەيسميكالىق نىعايتۋ، يننوۆاسيالىق شىعارماشىلىقتىڭ ەكى ورتالىعىن سالۋ جوسپارلانۋدا.
دەنساۋلىق ساقتاۋ سالاسىندا 38،7 ملرد تەڭگە كولەمىندە شىعىندار جوسپارلانىپ وتىر. كەڭەيتىلگەن مەديسينالىق كومەك كورسەتۋ ءۇشىن "مامىر-5"، "مامىر-6" ىقشاماۋداندارىندا 200 كەلۋشىگە ارنالعان وتباسىلىق-دارىگەرلىك امبۋلاتوريا سالۋ جوسپارلانۋدا.
از قامتىلعان جانە كوپ بالالى وتباسىلارعا كومەك كورسەتۋ ءۇشىن اتاۋلى الەۋمەتتىك كومەكتى تولەۋ جانە ازىق-تۇلىك سەبەتتەرى مەن ءبىرىنشى كەزەكتە قاجەتتى تاۋارلار بەرۋ جوسپارلانعان، وعان 947،5 ملن تەڭگە بولىنەدى.
بەكىتىلگەن الەۋمەتتىك كومەك تىزبەسىنە سايكەس، 4 مىڭ زەينەتكەردى ساناتورلىق-كۋرورتتىق ەمدەۋ بويىنشا جەڭىلدىكتەرگە 2،1 ملرد تەڭگە، 9 مامىرعا ۇوس قاتىسۋشىلارىنا، از قامتىلعان ازاماتتارعا ءبىر رەتتىك ماتەريالدىق كومەك قاراستىرىلعان. مۇمكىندىگى شەكتەۋلى تۇلعالارعا 2 720 جەكە كومەكشىلەر مەن قيمىلمەن كورسەتۋ ءتىلى ماماندارىنىڭ قىزمەتىنە 3،3 ملرد. تەڭگە قاراستىرىلعان.
حالىقتى جۇمىسپەن قامتۋ باعدارلاماسىن قارجىلاندىرۋ اياسىندا جاستار پراكتيكاسىنا، قوعامدىق جۇمىسقا جانە ەرەكشە قاجەتتىلىكتەرى بار 500 ادامنىڭ ەڭبەك اقىسىن سۋبسيديالاۋعا قاراجات قاراستىرۋ جوسپارلانعان. جالپى، اتالمىش باعدارلاما اياسىندا 8 مىڭنان استام ادام قامتىلاتىن بولادى.
سونىمەن قاتار، كولىك سالاسىندا بارلىق باعىتتارداعى اۆتوبۋس جولاۋشىلار تاسىمالدارىن، سونداي-اق تەمىرجول قالا ماڭى قاتىناستارى مەن مەتروپوليتەندەگى تاسىمالداردى سۋبسيديالاۋ جالعاستىرىلادى.
تۇرعىن ءۇي سالاسىندا «نۇرلى جەر» مەملەكەتتىك باعدارلاماسى بويىنشا ومىرلىك قيىن جاعدايدا جۇرگەن ادامدار مەن وتباسىلارعا الەۋمەتتىك كومەك رەتىندە 1 مىڭ تۇرعىن ءۇي سەرتيفيكاتى قاراستىرىلعان. سونىمەن قاتار، «الماتى جاستارى» باعدارلاماسى اياسىندا جاستارعا «وتباسى بانك» ارقىلى جەڭىلدەتىلگەن نەسيە بەرۋ جوسپارلانعان.
كوممۋنالدىق ينفراقۇرىلىمدى دامىتۋعا 64،5 ملرد تەڭگە، ونىڭ ىشىندە 50 مىڭعا جۋىق "قۇرىلىسشى"، "وجەت"، "سايالى"، "كەمەل"، "جاس قانات"، "قارعالى"، "شاڭىراق-2" جانە باسقا شاعىناۋدانداردىڭ تۇرعىندارىن سۋمەن قامتاماسىز ەتۋگە باعىتتاۋ جوسپارلانۋدا. مەدەۋ، الاتاۋ، ناۋرىزباي اۋداندارىندا يەسىز جەلىلەردى قايتا جاڭارتۋ جۇمىستارىن جالعاستىرۋ جوسپارلانۋدا.
جول-كولىك ينفراقۇرىلىمىن دامىتۋعا 42،3 ملرد تەڭگە ءبولىندى. ونىڭ ىشىندە 200 شاقىرىم جول جابىنىن جوندەۋ جوسپارلانعان. بۇقتىرما كوشەسى – قۇلجا تراكتىسى، سەيفۋللين داڭعىلى – جانسۇگىروۆ كوشەسى، ساين كوشەسى – موڭكە بي كوشەسى قيىلىسىنداعى كولىك جولايىرىقتارىنىڭ قۇرىلىسى جالعاستىرىلادى.
سونداي-اق، سپورتتى، تۋريستىك ينفراقۇرىلىمدى دامىتۋعا، اۋماقتاردى كوگالداندىرۋعا قاراجات قاراستىرىلعان.
2022 جىلعا ارنالعان بيۋدجەت جوباسى قالانىڭ بولجامدى دامۋ پارامەترلەرى مەن الەۋمەتتىك-ەكونوميكالىق دامۋ بولجامىن نەگىزگە الا وتىرىپ قالىپتاستىرىلدى. 2021 جىلدىڭ قورىتىندىسى بويىنشا بيۋدجەتكە تۇسەتىن تۇسىمدەردى كۇتىلەتىن باعالاۋعا سايكەس، ءوسىم 2020 جىلعا ارنالعان ناقتى تۇسىمدەردىڭ 115% دەڭگەيىندە بولجانىپ وتىر.