قازاقتىڭ ۇلى قولباسشى باتىرىنىڭ دۋلىعاسى مۇراجايعا تاپسىرىلدى

بوگەنباي باتىردىڭ دۋلىعاسى ەلورداداعى اسكەري-تاريحي مۇراجاي تورىنەن ورىن تەپتى

بۇعان دەيىن جادىگەر داڭقتى باتىردىڭ جەتىنشى ۇرپاعى جاباي كەنجاليننىڭ قولىندا ساقتالىپ كەلگەن. ەندى ول سالتاناتتى تۇردە مۇراجاي قورىنا تاپسىرىلدى. مامانداردىڭ ايتۋىنشا، ەرلىك پەن ەلجاندىلىقتىڭ كوزى بولعان كونە جادىگەر ەرەكشە تاريحي قۇندىلىققا يە، دەپ حابارلايدى Almaty-akshamy.kz

قازاقتىڭ ۇلى قولباسشىسى ءۇش ءجۇزدىڭ اسكەرىن باسقارىپ، حالقىمىزدىڭ ەگەمەندىگى ءۇشىن كۇرەسكەنى بارشاعا ايان. سوندىقتان ءىس-شارانىڭ ەل تاۋەلسىزدىگىنىڭ 30 جىلدىق مەرەيتويىنا ارنالىپ وتىرعانى كەزدەيسوق ەمەس.

ايتا كەتەيىك، باتىر قايتىس بولعاننان كەيىن جەكە قارۋ-جاراعىنىڭ كەيبىر زاتتارى ءۇش عاسىر بويى ونىڭ وتباسىندا قاسيەتتى جادىگەر رەتىندە ساقتالىپ، ۇرپاقتان-ۇرپاققا ميراس بولىپ كەلگەن. ەندى بەلگىلى تۇلعانىڭ باس كيىمىن ءاربىر قازاقستاندىق كورە الادى.

«بۇل بۇكىل قازاقستان حالقى، اسىرەسە، جاس ۇرپاق ءۇشىن وتە ماڭىزدى. ونىڭ وتان ءۇشىن جاساعان بارلىق ەرلىگى - وسكەلەڭ ۇرپاققا ۇلگى. ءبىز اتا-بابالارىمىزدىڭ، باتىرلارىمىزدىڭ ەڭبەگىن ءارقاشان ەستە ساقتاۋىمىز كەرەك. وسىلايشا بۇگىن تاۋەلسىزدىگىمىزدىڭ 30 جىلدىعىن تويلاپ جاتقان ءبىز 3000 جىلعا ۇمتىلۋىمىز كەرەك. «ماڭگىلىك ەل» – وتە جاقسى يدەيا. وسى ماقساتتا ءبارىمىز ەڭبەك ەتۋىمىز كەرەك»، - دەيدى «قارۋلى كۇشتەردىڭ ارداگەرلەرى» رەسپۋبليكالىق قوعامدىق بىرلەستىگى ءتوراعاسىنىڭ ورىنباسارى مارات ناعىمانوۆ.