الماتى قالاسى بويىنشا ق ر پرەزيدەنتى سايلاۋىنان حابار تاراتۋ جونىندەگى باسپا ءسوز ورتالىعى الاڭىندا «ەل ەرتەڭى» قق مۇشەلەرىنىڭ قاتىسۋىمەن بريفينگ ءوتتى.
تاۋەلسىز باقىلاۋشىلار سايلاۋ ۋچاسكەلەرىندە 17.00-دەگى ۋاقىت بويىنشا ەشقاندايدا قۇقىقبۇزۋشىلىق تىركەلمەگەنىن اتاپ ءوتتى. ساياساتتانۋشى تالعات جانىسباي ازاماتتاردى داۋىس بەرۋگە، سايلاۋ ۋچاسكەلەرىندە باقىلاۋشى بولۋعا شاقىردى.
«الماتى قالاسى بويىنشا ءبىر اي بۇرىن قوعام بەلسەندىلەرىن جيناقتادىق، ازاماتتارىمىزدى باقىلاۋشى بولۋعا شاقىردىق. بۇگىنگى تاڭدا الماتى قالاسىندا 531 سايلاۋ ۋچاسكىسىن تولىق قامتىپ وتىرمىز. قازىرگى ۋاقىتتاعى دەرەكتەر بويىنشا، الماتى قالاسىندا، باسقا وڭىرلەرگە قاراعاندا، سايلاۋ پروسەسى، سايلاۋشىلاردىڭ سايلاۋعا بارۋى تومەندەۋ. سوڭعى اقپاراتتار بويىنشا 25% كورسەتكىش كورسەتىپ تۇر. بىزدە ءسات سايىن ءوزىمىزدىڭ باقىلاۋشىلارمەن بايلانىسىپ، الەۋمەتتىك جەلىلەر ارقىلى جىلدام حابار الماسىپ جاتىرمىز. قازىرگى تاڭدا بارلىق سايلاۋ ۋچاسكەلەرىندە ءبىر سارىندا ءوتىپ جاتىر. قازىرگى ۋاقىتتا 17.00- دە ەشقاندايدا قۇقىقبۇزۋشىلىق، زاڭ بۇزۋشىلىق فاكتىلەر ورىن العان جوق. سول سەبەپتەن بۇل سايلاۋدى جوعارعى دەڭگەيدە جانە ءادىل ءوتىپ جاتىر دەپ ايتۋعا بولادى»، - دەيدى ساياساتتانۋشى، تاريحشى، ساياسي بەلسەندى تالعات جانىسباي.
سونداي-اق، سپيكەرلەر جۋرناليستەردىڭ سۋراقتارىنا جاۋاپ بەرىپ، سايلاۋدىڭ ەرەكشەلىگىنە توقتولىپ ءوتتى.
«حالىقتىڭ سايلاۋعا دەگەن قۇلشىنىسى، بەلسەندىلىگى ارتقان. سايلاۋشىلار ينستيتۋتى قالىپتاسقان. سوندىقتان دا باسقا سايلاۋعا قاراعاندا وسى جولعى سايلاۋ مادەنيەتىنىڭ ارتقاندىعىمەن ەرەكشەلەنەدى. قازىرگى ۋاقىتتا جاستاردىڭ اراسىندا سايلاۋ ءادىل وتپەيدى دەگەن جاڭساق پىكىرلەر بارشىلىق. بۇل ستەرەوتيپتى بۇزۋ ءۇشىن ءوزىم دە تاۋەلسىز باقىلاۋشى بولۋعا بەل بايلادىم»، - دەيدى بلوگەر، جۋرناليست اناستاسيا ۋلچەنكو.