توپتىق جارىس بويىنشا ازيا چەمپيونى يگور چجان الداعى ەكى ماۋسىمدا الەمدىك تۋردا ونەر كورسەتەتىن قازاقستاندىق Astana Qazaqstan Team كومانداسىنىڭ نامىسىن قورعايدى. بۇل تۋرالى Almaty-akshamy.kz Inbusiness.kz-كە سىلتەمە جاساپ حابارلايدى.
23 جاستاعى قازاقستاندىق شاباندوز ەلوردالىق ۇجىم ساپىندا ءۇش اي تاجىريبەدەن ءوتىپ، ءتورت جارىسقا قاتىسقاننان كەيىن "استانامەن" ەكى جىلدىق كەلىسىمشارتقا قول قويدى.
"مەن ءۇشىن سپورتتىق مانسابىمنىڭ جاڭا ءارى وتە ماڭىزدى تاراۋى باستالادى. ارينە، مەن Astana Qazaqstan Team كومانداسىمەن كەلىسىمشارتقا وتىرعانىما جانە الەمدىك تۋردا الەمنىڭ ەڭ ۇزدىك شاباندوزدارىمەن باس قوسىپ، الەمدىك ۆەلوسپورتتىڭ جوعارعى ليگاسىندا ءوز ەلىمنىڭ نامىسىن قورعاۋ مۇمكىندىگىنە قول جەتكىزگەنىمە وتە قۋانىشتىمىن. وعان قوسا، ارينە، بۇل ۇلكەن جاۋاپكەرشىلىك. ويتكەنى الدا اتقارار جۇمىس كوپ. كوماندا باسشىلىعىنا ماعان سەنىم ارتقانى ءۇشىن العىس ايتامىن. سەنىمدى اقتاۋعا تىرىسامىن"، - دەدى يگور چجان.
ۇلتتىق قۇرامانىڭ نامىسىن قورعايتىن يگور چجاننىڭ 2022 جىلعى ماۋسىمداعى باستى جەتىستىگى ازيا چەمپيوناتىنىڭ توپتىق جارىسىندا جەڭىسكە جەتۋى بولدى. سونىمەن قاتار ول قازاقستان چەمپيوناتىندا "جەكەلەي ۋاقىتقا ارنالعان" جارىس بويىنشا ەكىنشى ورىن يەلەنىپ، ءبىر كۇندىك "الانيا گران-پريىندە" جەڭىمپاز اتاندى، "ساكاريا تۋرىنىڭ" جالپى ەسەبىندە ءۇشىنشى ورىنعا يە بولدى.
Astana Qazaqstan Team كومانداسىندا تاجىريبەدەن ءوتۋ بارىسىندا چجان ءۇش كوپكۇندىك جارىسقا (نورۆەگيانىڭ اركتيكالىق جارىسى، سلوۆاكيا تۋرى جانە لانگكاۆي تۋرى) جانە ءبىر كۇندىك جارىسقا (گراند پەمونت) قاتىستى. وسى جارىستاردا كوماندا كوشباسشىلارىنا كومەكتەسۋمەن قاتار، يگور چجان "نورۆەگيانىڭ اركتيكالىق" جارىسىنىڭ شەشۋشى تاۋلى كەزەڭىندە 9-شى جانە "سلوۆاكيا تۋرىنىڭ" جالپى ەسەبىندە 20-شى ناتيجە كورسەتتى.
"ءبىز بىرنەشە جىل بويى يگور چجاننىڭ ناتيجەلەرىن مۇقيات قاداعالاپ كەلەمىز. سوڭعى ەكى جىلدا شاباندوز العا جىلجىپ، تاماشا ناتيجە كورسەتتى. سوندىقتان ونىڭ ءبىزدىڭ كوماندادا تاجىريبەدەن ءوتۋى لوگيكالىق قادام بولدى. يگور Astana Qazaqstan Team ساپىندا ب ا ق سىناعان جارىستاردا ءوزىن لايىقتى كورسەتە ءبىلدى. كوشباسشىلارعا جاقسى قولداۋ كورسەتتى جانە تاجىريبە جيناقتادى. بىرگە اتقاراتىن جۇمىس كوپ. ءبىزدىڭ كوماندانى جاس وتاندىق شاباندوزداردى دامىتۋعا، ولارعا الەمدىك تۋردا، الەمدىك ۆەلوسپورتتىڭ باستى ليگاسىندا ءوزىن كورسەتۋگە مۇمكىندىك بەرەتىن ەڭ جاقسى ورىن دەپ ەسەپتەيمىن"، - دەدى الەكساندر ۆينوكۋروۆ.