مەملەكەت باسشىسىنىڭ تاپسىرماسى بويىنشا استانا قالاسىنداعى كوشەلەردىڭ بىرىنە اسقار زابيكۋليننىڭ ەسىمى بەرىلىپ، ءبيۋستى ورناتىلادى. مەملەكەت باسشىسى قاسىم-جومارت توقايەۆ قىزمەتتىك بورىشىن اتقارۋ كەزىندە اۋىر جاراقات الىپ، اۋرۋحانادا كوز جۇمعان اسقار سەرىك ۇلى زابيكۋليننىڭ وتباسىنا كوڭىل ايتتى، دەپ جازادى Almaty-akshamy.kz Inbusiness.kz-كە سىلتەمە جاساپ.
"اسقار سەرىك ۇلى توتەنشە جاعدايلار سالاسىندا ەڭبەك ەتىپ، ەلىمىزگە ادال قىزمەت ەتۋدىڭ ۇلگىسىن كورسەتە بىلگەن ازامات ەدى. استاناداعى كوپ قاباتتى ۇيدە بولعان ءورت كەزىندە وقيعا ورنىنا شۇعىل جەتىپ، بىرنەشە ادامنىڭ ءومىرىن ساقتاپ قالدى. وسى ءبىر ارەكەتى ارقىلى ول وتان الدىنداعى ازاماتتىق انتىنا بەرىك ەكەنىن جانە جانقيارلىق ەرلىگىن كورسەتتى. ونىڭ ەسىمى مەن جارقىن بەينەسى حالقىمىزدىڭ جۇرەگىندە ساقتالادى. مارقۇمنىڭ جانى ءجانناتتا، يمانى سالامات بولسىن"، – دەپ جازىلعان جەدەلحاتتا.
سونداي-اق مەملەكەت باسشىسىنىڭ تاپسىرماسى بويىنشا ەرجۇرەك ءورت ءسوندىرۋشىنىڭ ەسىمىن ماڭگى ەستە ساقتاۋ ماقساتىندا استانا قالاسىنداعى كوشەلەردىڭ بىرىنە اسقار زابيكۋليننىڭ ەسىمى بەرىلىپ، ءبيۋستى ورناتىلادى.
استانا قالاسى توتەنشە جاعدايلار دەپارتامەنتى ءورت ءسوندىرۋ جانە اۆاريالىق-قۇتقارۋ جۇمىستارى قىزمەتى جەدەل كەزەكشىسىنىڭ كومەكشىسى اسقار زابيكۋلين، ءورت ءسوندىرۋ كەزىندە العان اۋىر جاراقاتتان 20 قاراشا كۇنى اۋرۋحانادا كوز جۇمعان بولاتىن. ونىڭ ارتىندا جۇبايى مەن ەكى بالاسى قالدى.