الماتى قالاسى توتەنشە جاعدايلار دەپارتامەنتى ءورت ءسوندىرۋ جانە اپاتتىق-قۇتقارۋ جۇمىستارى قىزمەتى جەكە قۇرامىنىڭ شتاتى بيىل ۇلعايتىلدى. بۇل تۋرالى وڭىرلىك كوممۋنيكاسيالار قىزمەتىنىڭ بريفينگىندە تجد كادر ساياساتى باسقارماسىنىڭ باسشىسى ساۋلە شاكالوۆا مالىمدەدى، دەپ حابارلايدى Almaty-akshamy.kz
سپيكەردىڭ ايتۋىنشا، شتات كەستەسى قازاقستان رەسپۋبليكاسى ۇكىمەتىنىڭ قاۋلىسىنا سايكەس ۇلعايتىلعان. الماتىدا قاتارداعى جانە كىشى باسشى قۇرامنىڭ، اتاپ ايتقاندا، ءورت سوندىرۋشىلەردىڭ، جۇرگىزۋشىلەر مەن تەلەفونيستەردىڭ قوسىمشا 262 بوس ورنى پايدا بولدى.
ساۋلە شاكالوۆا ىزدەنۋشىلەردىڭ ازاماتتىق قورعاۋ جۇيەسىنە قىزمەتكە قالاي ورنالاسۋعا بولاتىنىن ايتىپ بەردى. قىزمەتكە ورتا ءبىلىمى بار، جاسى 35-تەن اسپاعان بارلىق كامەلەتكە تولعان قازاقستاندىقتار تۇرا الادى. جۇمىسقا ورنالاسۋ ءۇشىن كانديداتتىڭ كاسىپكەرلىك قىزمەتپەن اينالىسپاۋى جانە قىلمىستىق جاۋاپكەرشىلىككە تارتىلماۋى ماڭىزدى.
«بارلىق كانديداتتار دەنساۋلىق جاعدايى، جەكە جانە ىسكەرلىك قاسيەتتەرى، زاڭنامانى ءبىلۋى، سونداي-اق دەنە شىنىقتىرۋ دايىندىعى بويىنشا سىناقتاردان وتەدى»، - دەدى تجد كادر ساياساتى باسقارماسىنىڭ باسشىسى.
ءورت ءسوندىرۋ قىزمەتىنىڭ بولاشاق ساربازدارىن العاش وقىتۋ مالىك عابدۋللين اتىنداعى ازاماتتىق قورعانىس اكادەمياسىنىڭ وقۋ ورتالىعى بازاسىندا وتەدى. ءورت سوندىرۋشىلەر كۇنتىزبە بويىنشا 35 كۇن، جۇرگىزۋشىلەر 14 كۇن، قالعان ۇمىتكەرلەر اپتا بويىنا وقيدى. دايىندىق كەزەڭىندە تىڭداۋشىلار بيۋدجەت قاراجاتى ەسەبىنەن تاماقپەن جانە تۇراتىن ورىنمەن قامتاماسىز ەتىلەدى، تاعىلىمداما كەزەڭىندەگى جالاقى شامامەن 100 000 تەڭگەنى قۇرايدى.
ساۋلە شاكالوۆا ايەلدەردىڭ دە تجد-نە، مىسالى، راديوتەلەفونيست بولىپ ورنالاسا الاتىنىن ايتتى.
سپيكەر ەلىمىزدە وفيسەرلەر كادرلارىن دايىندايتىن جوعارى وقۋ ورنى – كوكشەتاۋ قالاسىندا مالىك عابدۋللين اتىنداعى ازاماتتىق قورعانىس اكادەمياسى بار ەكەنىن ايتتى. كۋرسانتتاردى وقىتۋ رەسپۋبليكالىق بيۋدجەت ەسەبىنەن جۇرگىزىلەدى.
كۋرسانتتار تەگىن كيىم-كەشەكپەن،تاماقپەن، ستيپەنديامەن قامتاماسىز ەتىلەدى. اكادەميانى ءتامامداعان سوڭ، ولارعا «ازاماتتىق قورعانىس لەيتەنانتى» اتاعى بەرىلىپ، جۇمىسقا مىندەتتى تۇردە ورنالاستىرىلادى. كانديداتتاردى ىرىكتەۋ جىل سايىن تجد قاڭتار مەن مامىر ايىندا جۇرگىزىلەدى»، - دەپ حابارلادى س. شاكالوۆا.
ەگەر ءسىز ازاماتتىق قورعانىس ورگاندارىندا قىزمەت ەتكىڭىز كەلسە، وندا ءتجد-نىڭ «ءورت ءسوندىرۋ جانە اۆاريالىق-قۇتقارۋ جۇمىستارى قىزمەتى» كادر ساياساتى بولىمىنە حابارلاسىڭىز. ونىڭ مەكەنجايى: قونايەۆ كوشەسى، 132 نەمەسە 261-28-92 تەلەفون نومىرىنە حابارلاسىڭىز.