الماتى قالاسى اكىمىنىڭ ورىنباسارى نۇرلان ءابدىراحىم مەن قوعامدىق دەنساۋلىق ساقتاۋ باسقارماسىنىڭ باسشىسى مارات پاشيموۆ جۇمىس ساپارىمەن مەديسينالىق ۇيىمداردى ارالادى، دەپ حابارلايدى aqshamnews.kz
ساپار بارىسىندا ولار جەتەكشى قالالىق كلينيكالاردىڭ جۇمىسىمەن، مەديسينالىق كومەك كورسەتۋ جاعدايىمەن جانە دەنساۋلىق ساقتاۋ ينفراقۇرىلىمىن دامىتۋ جوسپارىمەن تانىستى.
ەڭ اۋەلى ولار قالالىق جەدەل شۇعىل كومەك كورسەتۋ اۋرۋحاناسىنا باردى. اۋرۋحانا الماتىلىقتار مەن وزگە وڭىردەن كەلگەن پاسيەنتتەرگە شۇعىل جانە جوسپارلى مەديسينالىق كومەك كورسەتەدى. ساپار بارىسىندا ولار اۋرۋحانانىڭ قابىلداۋ ءبولىمى، جانساقتاۋ جانە وتا جاساۋ بلوكتارى، سونداي-اق جاعدايدى تالداۋ ورتالىعىندا بولىپ، 2026 جىلعا جوسپارلانعان عيماراتتىڭ قاسبەتىن كۇردەلى جوندەۋ جانە سيفرلىق تەحنولوگيا ەنگىزۋ ماسەلەلەرىنە ەرەكشە نازار اۋداردى.
ودان كەيىن قالالىق كارديولوگيالىق ورتالىعىن كورىپ شىقتى. مۇندا كارديوحيرۋرگيا سالاسىنداعى جەتىستىكتەر تانىستىرىلدى. يننوۆاسيالىق ادىستەر مەن زاماناۋي جابدىقتىڭ ەنگىزىلۋى ارقاسىندا ورتالىققا قارالۋشىلار سانى ارتقان، ال ءولىم كورسەتكىشى ەداۋىر تومەندەگەن.
ودان كەيىن قالالىق ريەۆماتولوگيالىق ورتالىققا - قالاداعى بىرەگەي مونوتالداۋلى كلينيكاعا باردى. مۇندا كۇنىنە 150-دەن استام پاسيەنتكە كونسۋلتاسيالىق كومەك كورسەتىلىپ، جىل سايىن شامامەن 2700 ادام ستاسيونارلىق ەم الادى. مۇندا قالاداعى جالعىز اۋتويممۋندىق دياگنوستيكا زەرتحاناسى بار
كەيىن باسشىلار قالالىق ادام رەپرودۋكسياسى ورتالىعىندا بولىپ، وندا اياقتالعان كۇردەلى جوندەۋمەن تانىستى. مۇندا پرەناتالدىق جانە نەوناتالدىق سكرينينگتەن باستاپ، «ءبىر كۇندىك كلينيكا» فورماتىنداعى قىزمەتتەر مەن بالالار گينەكولوگياسىنا دەيىنگى كەڭ اۋقىمدى مەديسينالىق كومەك كورسەتىلەدى. الداعى ۋاقىتتا ەكو ورتالىعى مەن گەنەتيكالىق زەرتتەۋلەر ينستيتۋتىن اشۋ جوسپارلانعان.
سونداي-اق، دەلەگاسيا ورتالىق قالالىق كلينيكالىق اۋرۋحاناعا دا باردى. مۇندا جاڭا كورپۋستىڭ قۇرىلىسى جوباسىمەن تانىسىپ، كت جانە مرت كابينەتتەرى بار دياگنوستيكالىق بولىمدە بولدى.
جۇمىس ساپارى اياسىندا ولار بالالار شۇعىل مەديسينالىق كومەك كورسەتۋ ورتالىعىندا دا بولدى. 352 ورىنعا ارنالعان ستاسيوناردا جىل سايىن شامامەن 100 مىڭ بالاعا كومەك كورسەتىلەدى. 2024 جىلدان باستاپ مۇندا حالىقارالىق Emergency ستاندارتىنا ساي جاڭا قابىلداۋ ءبولىمى، جانساقتاۋ جانە وتا جاساۋ بلوگى جۇمىس ىستەيدى. ورتالىق زاماناۋي دياگنوستيكالىق قۇرالدارمەن جابدىقتالعان ءارى ەلدىڭ وڭتۇستىك وڭىرىندەگى جالعىز بالالار كۇيىك بولىمىمەن جانە قازاقستانداعى جالعىز بالالار وفتالمولوگيالىق بولىمىمەن ەرەكشەلەنەدى.
ءقازىر ورتالىقتا 60 جىلدىق تاريحى بار نەگىزگى عيماراتتى كەزەڭ-كەزەڭمەن قايتا جاڭعىرتۋ جوباسى ازىرلەنىپ جاتىر، وعان ينجەنەرلىك جۇيە مەن ينفراقۇرىلىمدى جاڭارتۋ كىرەدى.
سونداي-اق، دەلەگاسيا بالالار قالالىق كلينيكالىق جۇقپالى اۋرۋلار اۋرۋحاناسىندا بولدى. 360 ورىنعا ارنالعان بۇل ستاسيوناردا 1980 جىلى سالىنعان عيماراتتى كۇردەلى جوندەۋ ماسەلەسى تالقىلاندى. اۋرۋحانا تاۋلىك بويى جۇقپالى اۋرۋمەن اۋىراتىن بالالارعا كومەك كورسەتىپ، قالانىڭ ينفەكسيالىق قىزمەتىندەگى نەگىزگى بۋىن بولىپ تابىلادى.
قالالىق قان ورتالىعىنا بارۋمەن ساپار اياقتالدى. مۇندا دونورلىق قاندى سكرينينگتەن وتكىزۋگە ارنالعان بەسىنشى بۋىنداعى زاماناۋي جابدىق ورناتىلعان، بۇل ادام فاكتورىن تولىقتاي جويادى. 2025 جىلدىڭ توعىز ايىندا ورتالىقتا شامامەن 14 مىڭ رەت قان مەن ونىڭ كومپونەنتتەرى دونورلىققا قابىلداندى.
جۇمىس ساپارى الماتى قالاسىندا مەديسينالىق كومەك ساپاسىن ارتتىرۋ جانە قالالىق دەنساۋلىق ساقتاۋ جۇيەسىن جەتىلدىرۋ باعىتىنداعى جۇيەلى جۇمىستىڭ ءبىر بولىگى بولىپ تابىلادى.